Yosua 23:1-16
23 Ibeʼe waʼohahau dödö Yehowa ba ndraono Gizaraʼeli+ ba lö hadöi udu ba zi fasuira sametaʼu yaʼira. Ara aefa daʼö, me no atua Yosua ba numalö ndröfinia,+
2 ikaoni fefu ndraono Gizaraʼeli,+ ira sondröniaʼö, satua mbanua, sanguhuku hegöi ira sohalöwö.+ Imane khöra, ”No atua ndraʼo ba numalö ndröfigu.
3 No miʼila samösa nifalua Yehowa Lowalangimi ba soi andrö fefu börö me Yehowa Lowalangimi zi fasuwö salahimi.+
4 No ufalua dahö-dahö+ ba wombagi tanö ba madomi, si tobali tanö ondröita+ iʼotarai Nungo Nidanö Yoridano ofeta ba Nasi Sebolo* tanö ba gaekhula luo, he tanö niʼiagö soi böʼö nasa hegöi tanö okhöta soi si no ufakiko.+
5 Yehowa Lowalangimi zangeheta ba samofanö yaʼira börö ami,+ ba no mirabu danöra simane nifabuʼu Yehowa Lowalangimi khömi.+
6 ”Iadaʼa, yatedou waʼabölömi ba enaʼö barani ami woloʼö hegöi ba wamalua fefu Oroisa Moze+ si no tesura. Böi miholeʼö ami ba gambölö mazui ba gabera,+
7 böi mifariawö ba soi böʼö+ si toröi ba khömi. Böi mitötöi döi lowalangira+ mazui fahölu ami ba döi daʼö ba böi mifosumange mazui mangalulu ami khöra.+
8 Böi mifaröi khö Yehowa Lowalangimi,+ simane nifaluami irugi maʼökhö.
9 Ifofanö fönami soi segebua ba sabölö andrö Yehowa,+ börö me lö hadöi niha si tola molawa yaʼami irugi maʼökhö.+
10 Tola kala nudumi si saribu+ hewaʼae na ha samösa zolawa yaʼia moroi ba gotaluami börö me Yehowa Lowalangimi zi fasuwö salahimi+ simane nifabuʼunia khömi.+
11 Andrö, böi aetu-aetu mitörö tödömi+ ba wangomasiʼö Yehowa Lowalangimi.+
12 ”Hizaʼi, na faröi ami ba miʼoʼö soi böʼö si toröi ba gotaluami,+ fariawö ami ba faoma mihalö umönömi nono nawömi,+
13 moguna miʼila wa lö ifofanö* saʼae soi andrö Yehowa Lowalangimi börö ami.+ Tobali ira tandrawa, fesu, ba bözi-bözi ba hulumi,+ ba hulö ndroi ira ba hörömi irege ahori ami moroi ba soi andrö si no ibeʼe Yehowa Lowalangimi khömi.
14 ”Lö ara tö mate ndraʼo,* ba no miʼila samösa soroi ba dödömi awö nosomi* maʼasambua wa no itörö fefu zi no ifabuʼu Yehowa Lowalangimi khömi. No ahori ifalua. Lö zi lö itörö.+
15 Simane famalua Yehowa Lowalangimi ngawalö mbuʼusa linia si sökhi khömi,+ simanö göi wamalua Yehowa ngawalö wamakao si no ifabuʼu khömi,* ba ihori ami moroi ba danö si sökhi andre nibeʼe Yehowa Lowalangimi khömi.+
16 Na misawö mbuʼusa li Yehowa Lowalangimi si lö tola löʼö mifalua, ba na mifosumange lowalangi tanö böʼö ba mangalulu ami khöra, daʼö mbörö wa mofönu Yehowa+ ba hasambalö ihori ami moroi ba danö si sökhi si no iʼamualagö khömi.”+
Nisura ba gahe zura
^ Eluahania Asi Mediterania (Laut Tengah).
^ Mazui ”irabu”.
^ Sin.: ”utörö göi zimane nitörö niha gulidanö”.
^ Faigi Geluaha Ngawua Wehede.
^ Mazui ”ngawalö wehede fangelifi”.
