Yosua 24:1-33
24 Aefa daʼö, iʼowuloi fefu mado Gizaraʼeli Yosua si so ba Zikhema ba ikaoni zondröniaʼö iraono Gizaraʼeli, satua mbanua, sanguhuku hegöi ira sohalöwö,+ mosindro ira föna Lowalangi sindruhu.
2 Imane Yosua ba soi daʼö, ”Daʼa niwaʼö Yehowa Lowalangi Gizaraʼeli: ’Yefo Nungo Nidanö Oiferati andrö toröi ndra tuami mböröta,+ fao ba daʼö Dera ama Gaberahamo ba ama Nakhori, ba lafosumange lowalangi tanö böʼö.+
3 ”’Aefa daʼö, ufili duami Aberahamo+ moroi yefo Nungo Nidanö Oiferati ba uwaʼö khönia enaʼö iʼanöröi fefu danö Ganaʼana. Uʼoyaʼö ngaʼötönia,+ ubeʼe khönia Gizaʼaki.+
4 Ba khö Gizaʼaki, ubeʼe Yakobo ba Ezau.+ Aefa daʼö khö Gezau, ubeʼe Hili Zeʼira tobali tana khönia,+ ba Yakobo faoma ononia matua numalö ba Miserai.+
5 Ba gafuriata, ufatenge Moze awö Gaʼaroni,+ ba uhuku* Miserai.+ Lö ara, uheta ami ba daʼö.
6 Me uheta ndra tuami moroi ba danö Miserai+ ba me larugi zinga nasi, möi niha Miserai ba wolohi yaʼira faoma kureta wasuwöta ba saradadu si fakudo ofeta ba Nasi Soyo.+
7 Labörögö wangandrö fanolo khö Yehowa.+ Andrö ubeʼe lawuo saitö ba gotaluara niha Miserai ba uhöndrögö niha Miserai ba nasi.+ Ba miʼila samösa hadia nifaluagu ba Miserai.+ Aefa daʼö, toröi ami ba danö si mate hauga wulu fakhe* waʼara.+
8 ”’Uʼohe ami ba mbanua niha Gamori si so yefo* Nungo Nidanö Yoridano, ba lasuwö ami.+ Hizaʼi, ubeʼe ba dangami ira enaʼö tola mirabu mbanuara ba uhori ira fönami.+
9 Ba maoso Mbalaki ono Zifori razo niha Moabi, isuwö ndraono Gizaraʼeli. Ikaoni Mbileamo ono Mbeori ba wangelifi yaʼami.+
10 Ba lö omasido ufondrondrongo niwaʼö Mbileamo.+ Daʼö mbörö wa ifahowuʼö ami ba zi hauga kali,+ hizaʼi uʼefaʼö ami moroi ba dangania.+
11 ”’Aefa daʼö, miʼötö Nungo Nidanö Yoridano+ ba mirugi Yerikho.+ Lasuwö ami ira sondröniaʼö* ba Yerikho, niha Gamori, niha Weresi, niha Ganaʼana, Niha Kheti, niha Girigasi, niha Hewi hegöi niha Yebusi, hizaʼi ubeʼe ira ba dangami.+
12 Fatua lö tohare ami uʼalui lala enaʼö afatö dödöra,* daʼö mbörö wa moloi ira fönami+ simane salua khö razo niha Gamori si darua. Tenga börö wöda faoma fanami.+
13 Simane daʼö wameʼegu khömi tanö ba zi lö erege dödömi hegöi banua si lö erege dödömi wamazökhi,+ ba toröi ami ba daʼö. Miʼa mbua zinanö ba kabu nagu awö mbua zaitu si lö irai mitanö.’+
14 ”Börö daʼö, miʼataʼufi Yehowa ba mifosumange ia, böi mifaröi khönia ba böi raʼiö ami.+ Miheta fefu ngawalö nadu nifosumange ndra tuami yefo Nungo Nidanö Oiferati hegöi ba Miserai,+ ba mifosumange Yehowa.
15 Na lö omasi ami mifosumange Yehowa, mitatugöi iadaʼa haniha nifosumangemi,+ lowalangi nifosumange ndra tuami mböröta yefo Nungo Nidanö Oiferati+ mazui lowalangi niha Gamori si toröi yaʼami.+ Hizaʼi, yaʼo hegöi ösi nomogu, mafosumange Yehowa.”
16 Ba latema linia niha sato, ”Lö irai tumbu ba dödöma ba wondröi Yehowa ba mafosumange lowalangi böʼö.
17 Yehowa Lowalangida zangeheta yaʼita hegöi ira tuada moroi ba danö Miserai,+ nahia wangosawuyu* yaʼita.+ Oya ifalua dandra sahöli-höli dödö fönada+ ba lö aetu irorogö ita sagötö fofanöda, simanö göi me tatörö soi böʼö.+
18 Ihori fefu soi daʼö Yehowa fönada, fao niha Gamori si no irai toröi ba soi daʼa mböröta. Daʼö wa mafosumange Yehowa börö me yaʼia Lowalangima.”
19 Imane Yosua ba niha sato, ”Hadia sindruhu-ndruhu lö aetu mifosumange Yehowa? Yaʼia andrö Lowalangi niʼamoniʼö.+ Iʼandrö khömi enaʼö ha khönia mibeʼe zumange.+ Na lö mifalua daʼö, ba lö iʼefaʼö zalami* hegöi horö nifaluami.+
20 Na miröi Yehowa ba mifosumange lowalangi böʼö, hasambalö ilawa ba ihori ami hewaʼae na sökhi nifaluania khömi ba zilalö.”+
21 Latema linia niha sato, ”Ha Yehowa nifosumangema!”+
22 Imane Yosua ba niha sato, ”Yaʼami zamaduhuʼö wa no mifili wamosumange Yehowa.”+ Latema linia, ”Yaʼia, yaʼaga zamaduhuʼö.”
23 ”Na simane daʼö, miheta lowalangi adu si so ba zi fasuimi, ba mifaolo dödömi khö Yehowa Lowalangi ndraono Gizaraʼeli.”
24 Latema linia niha sato, ”Mafosumange Yehowa Lowalangima, ba mafondrondrongo linia!”
25 Me luo daʼö, fawuʼu li Yosua ba soi andrö ba ibeʼe khöra gamakhoita awö huku ba Zikhema.
26 Aefa daʼö, isura wehede daʼa Yosua ba mbuku Goroisa Lowalangi.+ Ihalö sambua gara sebua+ ba ibeʼe ba narö geu sebua sahatö ba naha niʼamoniʼö khö Yehowa.
27 Imane Yosua ba niha sato, ”Hiza! Kara andre zi tobali samaduhuʼö khöda,+ börö me irongo kara andre fefu niwaʼö Yehowa khöda, ba daʼa zi tobali samaduhuʼö khömi enaʼö lö miʼosilöʼögö Lowalangimi.”
28 Aefa daʼö, itehegö mofanö ira Yosua ba lasawa danö ondröita khöra zamösana.+
29 Me no awai daʼö fefu, mate Yosua ono Nuni, enoni Yehowa andrö. Döfinia me mate ia 110 fakhe.+
30 Lakoʼo ia ba danö ondröita ba Dimenata-zera,+ ba mbanua si so ba hili Geferai, tanö yöu Hili Gasi.
31 Lö faröi ndraono Gizaraʼeli ba wamosumange Yehowa sagötö faʼauri Yosua ba sagötö faʼauri ndra sondröniaʼö me no aefa Yosua awö zangila nifalua Yehowa fefu ba ndraono Gizaraʼeli.+
32 Töla Yosefo+ niʼohe ndraono Gizaraʼeli moroi ba danö Miserai, lakoʼo ba Zikhema ba mbenua niʼöli Yakobo si 100 firö+ khö ndraono Hemori,+ ama Zikhema si tobali tanö ondröita ba ngaʼötö Yosefo.+
33 Mate göi Geleazari ono Gaʼaroni.+ Aefa daʼö lakoʼo ia ba Hili Wineha, ba mbanua si so ba hili Geferai si no ibeʼe khö nononia Fineha.+
Nisura ba gahe zura
^ Mazui ”uʼasogö wamakao ba”.
^ Sin.: ”hari”.
^ Eluahania tanö ba gatumbukha.
^ Mazui te ”ira sokhö tanö”.
^ Mazui te ”ataʼu ira”.
^ Sin.: ”omo wangosawuyu”.
^ Mazui ”wamadaömi”.
