Yosua 3:1-17
-
Laʼötö Nungo Nidanö Yoridano iraono Gizaraʼeli (1-17)
3 Maoso Yosua ba zihulö wongi sibai. Aefa daʼö, mofanö ia awö ndraono Gizaraʼeli fefu laʼotarai Ziti+ ofeta ba Nungo Nidanö Yoridano. Ba daʼö mörö ira fatua lö laʼötö nidanö andrö.
2 Tölu hari aefa daʼö, latöröi nose ira sondröniaʼö+
3 ba labeʼe fareta ba soi daʼö, ”Na miʼila lafazawa ira ere Lewi+ dawöla amabuʼula li Lowalangimi Yehowa, miʼofanö ba miʼoʼö ira.
4 Hizaʼi, mifoʼotalua ami mato 890 meter* furira. Böi mifahatö ami enaʼö miʼila hezo mitörö, börö me lö irai mitörö lala daʼö.”
5 Imane Yosua ba soi daʼö, ”Miʼamoniʼö ami,+ ifalua khömi zahöli-höli dödö Yehowa mahemolu.”+
6 Aefa daʼö, imane Yosua khö ndra ere, ”Mifazawa dawöla+ amabuʼula li ba miʼofanö föna soi andrö.” Ba lafalua zi no iwaʼö Yosua.
7 Imane Yehowa khö Yosua, ”Iʼotarai maʼökhö, uʼalawaʼö ndraʼugö föna ndraono Gizaraʼeli,+ enaʼö aboto ba dödöra wa yaʼo zanolo yaʼugö+ simane fanologu Moze.+
8 Faʼema wehede daʼa khö ndra ere solohe tawöla amabuʼula li, ’Na mirugi zinga Nungo Nidanö Yoridano, miʼaeʼe bakha ba miʼosindro ba nidanö andrö.’”+
9 Imane Yosua ba ndraono Gizaraʼeli, ”Miʼaine ba daʼa ba mifondrondrongo niwaʼö Yehowa Lowalangimi.”
10 Aefa daʼö imane Yosua, ”Aboto ba dödömi iadaʼa wa so ba gotaluami Lowalangi sauri,+ ba hasambalö iheta fönami niha Ganaʼana, niha Kheti, niha Hewi, niha Weresi, niha Girigasi, niha Gamori, ba niha Yebusi.+
11 Mifaigi! Tawöla amabuʼula li andrö khö Lowalangi samatörö ulidanö, no idari-dari weʼamöi ba Nungo Nidanö Yoridano.
12 Iadaʼa, mifili 12 ndra matua moroi ba mado ndraono Gizaraʼeli, samösa ero sambua mado.+
13 Na lahundragö sibai dania Nungo Nidanö Yoridano ira ere solohe Tawöla amabuʼula li Yehowa, Lowalangi samatörö ulidanö, iʼanemaiʼö aetu wofanö nidanö moroi ba lulu. Tebato nidanö andrö hulö mbaʼa-baʼa.”*+
14 Börö daʼö, mofanö soi andrö moroi ba nosera ba laʼötö Nungo Nidanö Yoridano. Mowaö-waö fönara ndra ere solohe tawöla+ amabuʼula li.
15 (Inötö wamasi me luo daʼö, ba möi yawa nidanö andrö irugi ngöfi.)+ Me no larugi ba lahundragö zinga nidanö ira ere solohe Tawöla,
16 iʼanemaiʼö tebato nidanö andrö moroi ba lulu. Möi yawa nidanö andrö hulö mbaʼa-baʼa ba nahia saröu, yaʼia daʼö ba Gadamo (banua sahatö ba Zareta). Alö nidanö sofeta ba Nasi Garaba, mazui Asi Sasi-asi.* Aetu lulu nidanö, ba laʼötö iraono Gizaraʼeli gamaudu föna mbanua Yerikho.
17 Mozizio manö ndra ere solohe tawöla amabuʼula li Yehowa andrö ba dete danö sabeʼe+ bakha ba dalu Nungo Nidanö Yoridano. Gasa-gasa daʼö, fefu ndraono Gizaraʼeli laʼötö dete danö sabeʼe+ ba ofeta ira yefo Yoridano.
