Yosua 4:1-24
-
Kara si tobali fanörö tödö (1-24)
4 Me no laʼötö Nungo Nidanö Yoridano iraono Gizaraʼeli fefu, imane Yehowa khö Yosua,
2 ”Fili 12 ndra matua moroi ba soi daʼa, samösa ero sambua mado,+
3 ba waʼö khöra, ’Mihalö 12 ngawua gara moroi ba dalu Nungo Nidanö Yoridano ba gamaudu naha wesindro ndra ere.+ Miʼohe gara andrö ba mibeʼe gamaudu naha si mörö ami bongi daʼa.’”+
4 Börö daʼö, ikaoni ndra matua si 12 andrö Yosua si no ifili moroi ba gotalua ndraono Gizaraʼeli, samösa ero sambua mado.
5 Imane khöra Yosua, ”Miʼaeʼe ba dalu Nungo Nidanö Yoridano tanö föna Dawöla Yehowa Lowalangimi. Mihalö sambua gara ero samösa ba mibeʼe ba galisimi. Faʼoya gara andrö enaʼö simane faʼoya mado ndraono Gizaraʼeli.
6 Daʼö zi tobali tandra khömi. Na manofu dania ndraonomi, ’Hana wa so gara ba daʼa?’+
7 mimane khöra, ’Börö me aetu Nungo Nidanö Yoridano föna dawöla+ amabuʼula li Yehowa. Tebato wofanö nidanö me lafaʼötö Dawöla andrö. Kara daʼa zi tobali tandra si möi famasugi ba dödö ndraono Gizaraʼeli sagötö faʼara.’”+
8 Ba lafalua ira matua andrö hadia niwaʼö Yosua khöra. Lahalö 12 ngawua gara moroi ba dalu Nungo Nidanö Yoridano moloʼö faʼato mado ndraono Gizaraʼeli, simane niwaʼö Yehowa khö Yosua. Laʼohe gara andrö ba labeʼe ba gamaudu naha si mörö ira na bongi.
9 Ifaʼanö gara si 12 ngawua andrö Yosua bakha ba dalu Nungo Nidanö Yoridano, ba gamaudu naha wesindro ndra ere solohe tawöla amabuʼula li andrö.+ So manö nasa gara daʼö irugi maʼökhö.
10 Lö tebulö mozizio ndra ere solohe Tawöla ba dalu Nungo Nidanö Yoridano, irege lafalua fefu niwaʼö Yehowa simane nifaʼemania khö Yosua, yaʼia daʼö fefu niwaʼö Moze khö Yosua. Gasa-gasa daʼö, laʼaliokö wanörö iraono Gizaraʼeli.
11 Me no dozi laʼötö nidanö andrö fefu, lafaʼötö göi Dawöla Yehowa ira ere föna soi daʼö.+
12 Mado Rubeno, mado Gado ba matonga moroi ba mado Manase, laʼötö nidanö andrö simane na lafaʼanö ira ba wasuwöta,+ laʼagö föna ndraono Gizaraʼeli tanö böʼö simane niwaʼö Moze khöra.+
13 So mato 40.000 zaradadu solohe fakake wasuwöta, sowaö-waö föna Yehowa numalö ba Danö si Mate Yerikho.
14 Me luo daʼö iʼalawaʼö Yosua andrö Yehowa föna ndraono Gizaraʼeli.+ Lafosumange* ia sandrohu faʼaurinia simane famosumangera Moze.+
15 Imane Yehowa khö Yosua,
16 ”Waʼö khö ndra ere solohe tawöla+ Wamaduhuʼö enaʼö laheta ira moroi ba Nungo Nidanö Yoridano.”
17 Börö daʼö, imane Yosua khö ndra ere, ”Miheta ami ba Nungo Nidanö Yoridano.”
18 Me aheta ndra ere solohe tawöla+ amabuʼula li Yehowa moroi ba Nungo Nidanö Yoridano ba me lahundragö danö sabeʼe, ifuli fahalö nidanö andrö irege möi yawa irugi ngöfi+ simane si toʼölö.
19 Laʼötö Nungo Nidanö Yoridano ba mbaŵa siföföna ba ngaluo si fulu. Lafazökhi nosera ba Giligala+ ba nola Yerikho tanö ba gatumbukha.
20 Ba Giligala, ifaʼanö gara si 12 ngawua andrö Yosua nihalö moroi ba Nungo Nidanö Yoridano.+
21 Aefa daʼö imane ba ndraono Gizaraʼeli, ”Na samuza inötö dania lasofu khömi iraonomi, ’Hadia geluaha gara daʼa?’+
22 mimane khöra, ’Laʼötö Nungo Nidanö Yoridano soi Gizaraʼeli ba dete danö sabeʼe+
23 me iʼoköliʼö nidanö andrö Lowalangimi Yehowa fönara irege ahori laʼötö fefu. Fagölö ira me ifabali Nasi Soyo Lowalangimi Yehowa fönama irege ahori maʼötö fefu.+
24 Andrö wa ifalua daʼa Yehowa enaʼö aboto ba dödö niha ba zi sagörö ulidanö wa no sabeʼe dangania andrö+ ba enaʼö lö tebulö lafosumange* Lowalangida Yehowa.’”
