Yosua 5:1-15
5 Fefu razo niha Gamori+ tanö ba gaekhula* Nungo Nidanö Yoridano ba fefu razo niha Ganaʼana+ ba zinga nasi, oi larongo wa no iʼoköliʼö Nungo Nidanö Yoridano andrö Yehowa föna ndraono Gizaraʼeli irege tola laʼötö. Lua-luania, modögö dödöra+ ba lö si barani* wolawa iraono Gizaraʼeli.+
2 Me luo daʼö imane Yehowa khö Yosua, ”Fazökhi khöu rosö moroi ba gara alitö ba suna+ fefu ndra matua Gizaraʼeli sakali tö.”
3 Börö daʼö, ifazökhi rosö moroi ba gara alitö Yosua ba isuna fefu ndra matua Gizaraʼeli ba Gibea-arolati.*+
4 Daʼa mbörö wa isuna ira Yosua: Fefu ndra matua si no mangawuli moroi ba danö Miserai yaʼia daʼö ira saradadu,* no ahori mate ira ba lala ba danö si mate.+
5 Fefu niha sangawuli moroi ba danö Miserai no ahori lasuna, hizaʼi lö nisuna fefu niha si tumbu sagötö fofanöra ba danö si mate me no aheta ira ba danö Miserai.
6 No 40 fakhe+ mowaö-waö ndraono Gizaraʼeli ba danö si mate irege ahori ira fefu, yaʼia daʼö ira saradadu saheta moroi ba danö Miserai si lö moloʼö niwaʼö Yehowa.+ No möi ba hölu Yehowa wa lö itehegö khöra wamaigi tanö+ nifabuʼu Yehowa ba nono mbanuania, si no möi ia ba hölu khö ndra tuara,+ tanö si fahöna susu ba wewani.+
7 Iraonora zi tobali salahira.+ Iraonora andre nisuna Yosua börö me lö nisuna ira sagötö weʼasora ba lala.
8 Me no ahori lasuna ira, molombase ira ba nose irege döhö waʼafökhö.
9 Aefa daʼö, imane Yehowa khö Yosua, ”Maʼökhö andre no uheta wangoʼaya* Miserai khömi.” Börö daʼö, irugi maʼökhö, lafotöi nahia daʼö Giligala.*+
10 Ba latohugö manö iraono Gizaraʼeli waʼatoröi ba Giligala. Ba ngaluo si 14 ba mbaŵa daʼö,+ lafalua Gowasa Fasa ba zi bongi ba Danö si Mate Yerikho.
11 Sahari me no aefa Gowasa Fasa, ibörögö laʼa mbua zinanö ba soi daʼö. Me luo daʼö, laʼa roti si lö mufaruka ragi+ hegöi bua nowi nifakoe.
12 Me laʼa mbua zinanö ba soi daʼö iraono Gizaraʼeli, lö saʼae tebeʼe khöra mana.+ Ba ndröfi daʼö, labörögö wemanga bua zinanö moroi ba soi Ganaʼana.+
13 Me ahatö ba Yerikho so Yosua, iʼila samösa ndra matua+ sozizio fönania ba no igogohe wöda.+ Iʼondrasi ia Yosua ba imane, ”Hadia si fao khöma ndraʼugö mazui si faʼudu khöma?”
14 Itema li, ”Tenga si fao khömi ba tenga göi si faʼudu khömi. Yaʼodo andre kafalo* zaradadu moroi khö Yehowa.”+ Mangalulu khönia Yosua imane, ”Hadia niwaʼöu khö zawuyumö andre?”
15 Imane khönia kafalo zaradadu Yehowa andrö, ”Heta zandralamö börö me ba danö niʼamoniʼö mozizio ndraʼugö.” Iʼanemaiʼö ifalua daʼö Yosua.+
Nisura ba gahe zura
^ Sin.: ”tanö sangotahögö asi moroi ba”.
^ Sin.: ”lö si terou tödö”.
^ Eluahania ”Hili Nahia Wanaba Uli Wamatua”.
^ Mazui ”ira matua si no ibönö döfi weʼamöi fasuwö”.
^ Sin.: ”no ufagaölö”.
^ Eluahania Famagaölö.
^ Mazui ”sondröniaʼö”.
