Yosua 8:1-35
8 Imane Yehowa khö Yosua, ”Böi ataʼufi mazui maniziʼö.+ Ohe fefu zaradadu ba miʼofanö ba wolawa Gaʼi. No ubeʼe ba dangau razo Gaʼi, ono mbanuania, banuania hegöi soinia.+
2 Simane nifaluamö ba mbanua Yerikho hegöi khö razonia,+ simane daʼö göi falua ba mbanua Gaʼi hegöi khö razonia. Tola mirabu gama-gama awö guriföra. Fataro ndra saradadu tanö furi mbanua ba wamaʼuʼu yaʼira.”
3 Möi Yosua hegöi ira saradadu ba wolawa banua Gaʼi. Ifili 30.000 ndra saradadu sagabölö Yosua ba iwaʼö khöra wofanö ba zi bongi.
4 Imane, ”Mibiniʼö ami furi mbanua ba wamaʼuʼu yaʼira. Böi miʼaröuʼö ami ba enaʼö mifaʼanö ami.
5 Yaʼodo hegöi si fao khögu mahatöʼö ndraʼaga ba mbanua daʼö. Na möi ira baero wamaondragö yaʼaga simane ba zilalö,+ malau moloi.
6 Na lagohi ndraʼaga, maʼalui lala ba wondrönisi yaʼira enaʼö fandröndröu ira moroi ba mbanua daʼö. Lawalinga soloi ndraʼaga simane ba zilalö.+ Daʼö nifaluama.
7 Aefa daʼö, miʼae baero moroi ba naha wamini ba mirabu mbanua daʼö. Hasambalö ibeʼe khömi mbanua daʼö Yehowa Lowalangimi.
8 Na no aefa mirabu mbanua andrö ba mitunu.+ Mifalua moloʼö si no iwaʼö taromali Yehowa. Daʼö niwaʼögu khömi.”
9 Aefa daʼö, iwaʼö khöra Yosua enaʼö mofanö ira. Möi ira ba naha wamini yaʼia daʼö ba gotalua Mbetieli faoma Gaʼi, tanö ba gaekhula Gaʼi. Ba daʼö mörö Yosua fao ira ndraono Gizaraʼeli bongi daʼö.
10 Mahemolunia, maoso Yosua sihulö wongi sibai ba iʼowuloi ndra saradadunia. Ba möi ia ba mbanua Gaʼi simanö göi ndra sondröniaʼö iraono Gizaraʼeli.
11 Fao ia khö ndra saradadu+ ba lafaʼoli ira ba mbawa göli mbanua daʼö. Lafazökhi nosera tanö yöu Gaʼi ba so ndraso gotaluara.
12 No ifataro mato 5.000 ndra matua ba wamaʼuʼu banua daʼö+ ba gotalua Mbetieli+ faoma Gaʼi, tanö ba gaekhula Gaʼi.
13 Saradadu si oföna, toröi ira tanö yöu mbanua daʼö+ ba saradadu sanarogö moroi furi tanö ba gaekhula.+ Bongi daʼö, möi Yosua ba dalu ndraso.
14 Me iʼila daʼö razo Gaʼi, ihulö wongi wofanö hegöi ira matua si so ba mbanua daʼö ba wolawa iraono Gizaraʼeli ba zi sambua nahia föna ba danö si mate. Hizaʼi, lö iʼila wa so ndra saradadu moroi furi samaʼuʼu banuania.
15 Me möi niha Gaʼi ba wanuwö yaʼira, moloi Yosua awö ndra saradadu Gizaraʼeli ba danö si mate.+
16 Aefa daʼö, ifaretakö fefu niha si so bakha ba mbanua enaʼö lagohi ndraono Gizaraʼeli. Fandröndröu ira moroi ba mbanuara börö wolohi Yosua.
17 Ahori möi fefu ndra matua mbanua Gaʼi hegöi Betieli ba wolohi iraono Gizaraʼeli. Latehegö manö teboka mbawa göli mbanua andrö.
18 Imane Yehowa khö Yosua, ”Oroʼö doho si so ba dangamö tanö ba Gaʼi,+ börö me ubeʼe khömö mbanua daʼö.”+ Iʼoroʼö dohonia Yosua ba gamaudu mbanua andrö.
19 Me ifazawa dangania, fagohi ndra saradadu weʼamöi bakha ba mbanua andrö ba larabu. Iʼanemaiʼö latunu mbanua daʼö.+
20 Me lafaigi furi ira niha Gaʼi, laʼila zimbo sebua si möi yawa moroi ba mbanuara irege atata dölara ba tebai moloi ira saʼae. Aefa daʼö, mangawuli furi ndraono Gizaraʼeli soloi ba danö si mate ba wolawa yaʼira.
21 Me iʼila Yosua hegöi ira saradadu wa no larabu mbanua daʼö ira samaʼuʼu banua andrö, ba me no laʼila numalö miyawa zimbo andrö, lafuli ira furi ba wanuwö banua Gaʼi.
22 Ira saradadu si so bakha ba mbanua möi ira lasuwö irege teʼuʼu niha Gaʼi ba gotalua ndraono Gizaraʼeli si otarai moroi föna hegöi moroi furi. Ahori labunu fefu niha Gaʼi, samösa lö sauri.+
23 Hizaʼi, laraʼu razo Gaʼi+ ba laʼohe khö Yosua.
24 Me no lagohi ba labunu fefu niha Gaʼi si so ba danö si mate, ba me no labunu ira fefu faoma föda, mangawuli ndraono Gizaraʼeli ba Gaʼi ba lasuwö mbanua andrö faoma föda.
25 Fefu niha Gaʼi si mate me luo daʼö, ira matua hegöi ira alawe so 12.000 niha waʼato.
26 Lö iböhöli Yosua wangoroʼö toho si so ba dangania+ irege ahori labunu fefu niha Gaʼi.+
27 Hizaʼi, larabu fefu gurifö hegöi gama-gama ba mbanua daʼö iraono Gizaraʼeli, simane niwaʼö Yehowa khö Yosua.+
28 Aefa daʼö, itunu mbanua Gaʼi andrö Yosua, ba tobali adudula+ irugi maʼökhö.
29 Itawi razo Gaʼi ba döla geu irugi tanö owi. Me arakhagö aekhu luo, iwaʼö Yosua enaʼö laheta gamatela razo andrö moroi ba döla geu.+ Ba latiboʼö ba göli mbanua ba lafalaete gara ba wombalugö yaʼia. So manö gara daʼö irugi maʼökhö.
30 Me luo daʼö, ifazökhi Yosua naha wameʼe sumange khö Yehowa Lowalangi ndraono Gizaraʼeli ba Hili Gebala,+
31 simane niwaʼö Moze enoni Yehowa andrö ba ndraono Gizaraʼeli ba simane si no tesura ba Goroisa Moze,+ yaʼia daʼö ”naha wanunu sumange moroi ba gara si lö irai mutoto faoma siʼöli”.+ Ba detenia labeʼe zumange nitunu ba sumange fangatulö khö Yehowa.+
32 Aefa daʼö, isura ba dete gara nösi Goroisa+ si no isura Moze föna ndraono Gizaraʼeli.+
33 Mosindro fefu ndraono Gizaraʼeli, ira sondröniaʼö, ira sohalöwö, ira sangetuʼö huku ba zinga Dawöla faoma fatambai, föna ndra ere Lewi solohe tawöla amabuʼula li Yehowa. So ba daʼö zindruhu ndraono Gizaraʼeli hegöi si fatewu.+ Matonga zosindro tanö föna Hili Garisi ba si matonga tö föna Hili Gebala+ (simane niwaʼö Moze enoni Yehowa andrö mböröta),+ ba wamahowuʼö iraono Gizaraʼeli.
34 Aefa daʼö, iʼebuaʼö linia Yosua wombaso ösi Goroisa Moze maʼafefu,+ howu-howu+ ba fangelifi,+ moloʼö si no tesura ba mbuku Goroisa.
35 Lö hadöi ngawua wehede si so ba goroisa andrö si lö ibaso Yosua ba ndraono Gizaraʼeli maʼafefu,+ he khö ndra alawe, ba ndraono awö niha si fatewu+ si toröi ba gotaluara.*+
Nisura ba gahe zura
^ Sin.: ”si fao khöra”.
