Yosua 9:1-27
9 Oi larongo fefu zalua ira razo si so tanö ba gaekhula Nungo Nidanö Yoridano,+ yaʼia daʼö razo-razo ba mbanua si so ba hili, ba Zefela, ba zinga Nasi Sebolo,*+ ba föna Libano, ira niha Kheti, niha Gamori, niha Ganaʼana, niha Weresi, niha Hewi ba niha Yebusi.+
2 Mangosara ira ba wolawa Yosua hegöi iraono Gizaraʼeli.+
3 Larongo göi banua Gibeona+ nifalua Yosua ba mbanua Yerikho+ faoma ba Gaʼi.+
4 Laʼonekhesi göi ira. Labeʼe göra bakha ba goni satua ba labeʼe ba hulu galide, simanö göi naha* nagu sasika si no labalo.
5 Lafake göi nukha ba sandrala sagatua si no afönu balo-balo. Fefu göra roti si no laʼohe ahori oköli ba tekiko.
6 Aefa daʼö, lafalukhaisi Yosua ba nose Giligala.+ Lamane khönia hegöi khö ndra matua Gizaraʼeli, ”Yaʼaga si otarai mbanua saröu. Lau fawuʼu li khöma.”
7 Lamane ira matua ndraono Gizaraʼeli ba niha Hewi andrö,+ ”Alai na sahatö ba daʼa mbanuami. Hewisa wa tola malau fawuʼu li khömi?”+
8 Lamane khö Yosua, ”Yaʼaga andre enonimö.”*
Isofu khöra Yosua, ”Haniha ami andrö? Hezo moroi mbanuami?”
9 Ba lamane, ”Yaʼaga enonimö andre, maʼotarai mbanua fondrege zaröu+ börö döi Lowalangimö Yehowa. Asese marongo sanandrösa khönia ba fefu nifaluania ba Miserai+
10 awö nifaluania khö razo Gamori si darua tanö yefo* Nungo Nidanö Yoridano, Razo Zihona+ moroi ba Hesibona ba Razo Ogi+ moroi ba Mbazana si toröi ba Gasaroti.
11 Börö daʼö, lawaʼö khöma ira sondröniaʼö ba fefu niha mbanuama enaʼö mafaʼanö mbalazoma ba wamalukhaisi yaʼami. Lafatenge ndraʼaga ba wangumaʼö khömi, ’Yaʼaga andre enonimö.+ Lau fawuʼu li khöma.’+
12 Me mofanö ndraʼaga moroi ba nomo weʼamöi ba daʼa, aukhu-aukhu nasa göma roti andre. Iadaʼa no ahori oköli ba tekiko.+
13 Simanö göi naha* nagu andre khöma, bohou me mafoʼösi.+ Hizaʼi, no asika iadaʼa. No ahori tekiko nukha awö zandralama börö waʼaröu danö matörö.”
14 Aefa daʼö, lafareso* ösa zi toröi mbalazo ndra niha daʼö ira matua Gizaraʼeli, hizaʼi lö laʼandrö wanuturu lala moroi khö Yehowa.+
15 Andrö fawuʼu li khöra Yosua+ ba mangatulö ira wa itehegö auri ira. Möi nasa ba hölu khöra ndra sondröniaʼö iraono Gizaraʼeli.+
16 Tölu hari me no lalau fawuʼu li, awena larongo iraono Gizaraʼeli wa sahatö ba zingara mbanua ndra niha daʼö.
17 Lö ara, mofanö ndraono Gizaraʼeli ba larugi mbanua ndra niha daʼö ba ngaluo si tölu. Banua daʼö yaʼia Gibeona,+ Kafira, Beʼeroti, ba Kiriati-yeari.+
18 Hizaʼi, lö lasuwö mbanua daʼö iraono Gizaraʼeli börö me no möi khöra ba hölu zondröniaʼö ba döi Yehowa+ Lowalangi ndraono Gizaraʼeli. Lua-luania, mukökö fefu zato khö ndra sondröniaʼö.
19 Börö daʼö, lamane ira sondröniaʼö ba zato, ”No möi ndraʼaga khöra ba hölu ba döi Yehowa Lowalangi ndraono Gizaraʼeli, andrö wa tebai tafakao ira.
20 Daʼa nifaluada: Tatehegö auri ira, enaʼö lö mofönu khöda Lowalangi börö me no möi ndraʼaga khöra ba hölu.”+
21 Latohugö wangumaʼö ira sondröniaʼö, ”Tehegö auri ira, hizaʼi tobali ira sangowuloi eu ba sanaʼu idanö ba mbanua daʼa.” Daʼö nifabuʼu ndra sondröniaʼö khöra.
22 Ikaoni ira Yosua ba manofu ia khöra, ”Hana wa falimo ami khöma ba miwaʼö wa si otarai mbanua saröu ami, sindruhunia ahatö ba daʼa toröi ami?+
23 Iʼotarai iadaʼa, göna ami fangelifi+ ba tobali ami sawuyu sangowuloi eu ba sanaʼu idanö ba nomo Lowalangigu.”
24 Latema linia, ”Sindruhu-ndruhu aboto ba dödö ndra enonimö andre wa no iwaʼö Yehowa Lowalangimö khö genoninia Moze ba wameʼe khömi tanö daʼa fefu ba ihori fönami niha mbanua si so ba daʼö.+ Andrö wa mafalua daʼa börö waʼataʼuma na mibunuga.+
25 Balazi ami iadaʼa,* gofu hadia nifaluami khöma si sökhi ba satulö ba wamaigimi.”
26 Daʼö nifalua Yosua. Itehegö auri ira ba lö labunu ira iraono Gizaraʼeli.
27 Iʼotarai daʼö, ifohalöwö ira Yosua tobali sangowuloi eu ba sanaʼu idanö ba nono mbanua+ hegöi ba naha wameʼe sumange si no itatugöi khö Yehowa,+ daʼö halöwöra irugi maʼökhö.+
Nisura ba gahe zura
^ Eluahania Asi Mediterania (Laut Tengah).
^ Nifazökhi moroi ba guli gurifö.
^ Mazui ”sawuyumö”.
^ Eluahania tanö ba gatumbukha.
^ Nifazökhi moroi ba guli gurifö.
^ Mazui ”lahalö”.
^ Sin.: ”Ba dangami so ndraʼaga”.
