Sura Yuda 1:1-25
1 Moroi khö Yuda, sawuyu Yesu Keriso ba talifusö Yakobo,+ nifaʼema ba niha nikaoni+ niʼomasiʼö Namada Lowalangi, nilumöʼö ba khö Yesu Keriso.+
2 Yafahöna khömi waʼahakhö dödö, faʼohahau dödö, ba faʼomasi.
3 Yaʼami ira talifusö niʼomasiʼö, hewaʼae uforege wanura sura khömi sanandrösa ba wangorifi si no faoma tatema,+ iadaʼa terou dödögu woʼamenesi yaʼami enaʼö lö mamalö mirorogö wamatimi,+ nifaʼema sakali irugi zi lö aetu ba niha niʼamoniʼö andrö.
4 Börö me so ba gotaluami zaminiʼö yaʼia ba zi lö midöna-döna weʼamöi ba mbanua niha Keriso, si no mutatugöi mböröta ba Mbuku Niʼamoniʼö enaʼö tehuku. Yaʼira andre niha si lö mamosumange Lowalangi. Laʼogunaʼö waʼasökhi dödö sebua* moroi khö Lowalangi si tobali dane-dane ba wamalua amuata si lö faʼaila.*+ No oroma wa faröi ira khö zokhö yaʼira si ha samösa, ba khö Zoʼaya yaʼita Yesu Keriso.+
5 Hewaʼae no miʼila, omasido ufuli ufasugi ba dödömi, me no iʼefaʼö mbanuania Yehowa* moroi ba danö Miserai,+ ihori niha si lö mamati.+
6 Aefa daʼö, ira malaʼika sondröi dadaomara ba wamobörö hegöi nahiara sindruhu ba zorugo,+ no irate ba dalu zogömi-gömi enaʼö tehuku ira ba luo sebua andrö khö Lowalangi.+
7 Fagölö ira Zodoma awö Gomora hegöi banua si fasui yaʼira samalua amuata wohorö* ba faʼomasi nösi.+ Tehori ira sagötö faʼara,* irege tobali famahaʼö hegöi famangelama khöda.+
8 Hewaʼae simanö, niha saminiʼö yaʼira ba gotaluami andrö no niha sarörö ba wangifi, lataʼunöisi mbotora, lö lafosumange zamatörö ba laʼoʼaya niha solakhömi.+
9 Me fasoso Mikhaʼeli+ kafalo malaʼika andrö+ khö Gafökha ba wamadöni amatela Moze,+ lö barani ia wanguhuku Afökha faoma fehede fangoʼaya.+ Imane, ”Akha itegu ndraʼugö Yehowa.”*+
10 Hizaʼi, ira niha daʼa laʼoʼaya zi lö aboto ba dödöra,+ hulö gurifö si lö era-era,+ irege lafakiko mbotora samösa.
11 Alai ira börö me latara lahe Gaʼino,+ lagohi lala Mbileamo+ somasi manema sulö, ba tehuku ira me laʼoʼö wehede famadaö+ niwaʼö Gora!+
12 Sagötö wefaora khömi ba gowasa nifaluami ba wangoromaʼö faʼomasi,+ hulö gara samaʼala si tobini ba nasi ira, hulö gubalo si lö faʼataʼu ba wemanga gönia,+ hulö lawuo niʼoloiʼö nangi misa ba lö iʼasogö deu,+ hulö geu si lö mowua na baŵania, sindruhu-ndruhu no mate* ba laboʼa waʼania,
13 hulö ndrulu nasi sabölö-bölö solohe sasao saila ita ba gawu,+ hulö ndröfi si lö tatu lala, no mubeʼe ba dalu zogömi-gömi sagötö faʼara.+
14 No mamaʼeleʼö Henokhi,+ ngaʼötö si fitu iʼotarai Gadamo. Imane sanandrösa khöra, ”Hiza! Tohare Yehowa* awö ngafulu ribu malaʼika niʼamoniʼö andrö khönia+
15 ba wanguhuku fefu niha,+ hegöi samalua horö si lö mamosumange yaʼia, börö me no lafalua zi lö sökhi ba laʼoʼaya ia.”+
16 Mukökö-kökö ira,+ lö ahono dödöra ba waʼaurira, laʼoʼö zomasi dödöra samösa,+ fayawa ira, ba lasuno-suno niha böʼö ba wangalui hare.+
17 Hizaʼi, yaʼami ira talifusö niʼomasiʼö, mitörö tödömi hadia zi no irai lawaʼö* ira sinenge Zoʼaya yaʼita Yesu Keriso.
18 Lamane me föna, ”Ba ngaluo safuria, tohare dania zangoʼaya, lafalua zi lö sökhi somasi dödöra.”+
19 Lafaʼudu niha,+ hulö gurifö, lö khöra eheha Lowalangi.
20 Yaʼami ira talifusö niʼomasiʼö, miʼazökhi ba miʼamoniʼö wamatimi, miʼangandrö si fao fanuturu lala moroi ba geheha niʼamoniʼö,+
21 enaʼö lö tebulö so ami ba lumö waʼomasi Lowalangi,+ ba mibaloi waʼahakhö dödö Zoʼaya yaʼita Yesu Keriso solohe yaʼami ba waʼauri si lö aetu.+
22 Baero daʼö, böi miböhöli wamalua faʼahakhö dödö+ ba niha sangiwa tödö.+
23 Miʼorifi ba midöni ira+ moroi ba waʼatekiko sagötö faʼara.* Böi miböhöli wamalua faʼahakhö dödö ba miʼangelama göi, miʼogorofi nukhara si no taʼunö ba horö.+
24 Ba khö Lowalangi si tola mondrorogö yaʼami enaʼö lö awuwu ba wamati, lö raʼiö,+ ba omuso dödömi föna lakhöminia,
25 khö Lowalangi si ha sambua andrö, Sangorifi yaʼita börö Yesu Keriso, Soʼaya yaʼita, khönia lakhömi, faʼasalawa, faʼabölö ba kuaso, iʼotarai me föna, iadaʼa, irugi zi lö aetu. Yaduhu.
Nisura ba gahe zura
^ Faigi Geluaha Ngawua Wehede.
^ Mazui ”amuata si lö mangila wetahögö”. Ba li Yunani: aselgeia. Faigi Geluaha Ngawua Wehede.
^ Sin.: ”ba galitö si lö mate-mate”.
^ Faigi Geluaha Ngawua Wehede.
^ Sin.: ”no dua kali mate”.
^ Mazui ”lafaʼeleʼö”.
^ Sin.: ”ba galitö”.
