Zakharia 3:1-10
3 Aefa daʼö, iforomaʼö khögu Lowalangi gere sebua sotöi Yosua.+ No mozizio Yosua föna malaʼika Yehowa ba no göi mozizio Zatana+ ba gambölö Yosua ba wolawa yaʼia.
2 Imane malaʼika Yehowa khö Zatana, ”He Satana,+ akha itegu ndraʼugö Yehowa! Akha itegu ndraʼugö Yehowa si no mamili Yeruzalema!+ Hadia tenga no amaedola geu si hasara nidöni ba galitö Yosua andre?”
3 No ifake nukha si taʼunö Yosua me mozizio ia föna malaʼika andrö.
4 Imane malaʼika daʼö ba zi fao khönia, ”Heta nukhania si taʼunö.” Ba imane khö Yosua, ”Hiza, no uheta zala nifaluamö. Öʼonukha dania nukha si sökhi.”*+
5 Umane, ”Fasa khönia mböbö högö si lö taʼunö.”+ Lafasa mböbö högö andrö ba labeʼe nukhania, ba no mozizio malaʼika Yehowa ba zingania.
6 Imane malaʼika Yehowa khö Yosua,
7 ”Daʼa niwaʼö Yehowa samatörö saradadu zorugo: ’Na ötörö lalagu ba öfalua zi tobali foʼömöu fönagu, hasambalö tobali ndraʼugö sangetuʼö huku ba nomogu+ ba sondrorogö olayama nomogu. Utehegö khöu weʼamöi fönagu simane tanö böʼö si zizio ba daʼa.’
8 ”’Fondrondrongo yaʼugö ere sebua sotöi Yosua hegöi ira ere sodadao fönania, yaʼami zi tobali tandra dania. Ufatenge genonigu+ andrö sotöi Liwiö.+
9 Faigi atö gara si no ubeʼe föna Yosua! Ba gara daʼö so fitu hörö, ba no uhaogö wanura ba daʼö. Ha ba zi maʼö-maʼökhö, uheta fefu zala soi daʼö,’+ iwaʼö Yehowa samatörö saradadu zorugo.
10 ”Imane Yehowa samatörö saradadu zorugo, ’ba luo daʼö, faoma mikaoni nawömi zamösana, ba fao ami wedadao barö lumö geu nagu awö geu ara khömi.’”+
Nisura ba gahe zura
^ Mazui ”nukha waʼarazo”.
