Zakharia 4:1-14
4 Ifuli zui tohare malaʼika si fahuhuo khögu andrö ba isusugi ndraʼo simane fanusugi niha si no mörö.
2 Imane, ”Hadia niʼilamö?”
Umane, ”Uʼila naha wandru nifazökhi moroi ba ganaʼa.+ So sambua mako ba naha wandru andrö, ba so fitu ngawua wandru ba detenia.+ Ero sambua fandru so sara pipa.
3 Ba zi tambainia, so dua ngaʼeu döla zaitu,+ sambua ba gambölö mako ba sambua ba gabera.”
4 Aefa daʼö, manofu ndraʼo khö malaʼika si fahuhuo khögu, ”Hadia geluaha daʼa fefu Pa?”
5 Manofu khögu malaʼika daʼö, ”Hadia lö öʼila?”
Umane, ”Löʼö Pa.”
6 Imane khögu, ”Daʼa niwaʼö Yehowa khö Zerubabeli: ’”Tenga börö zaradadu sato mazui faʼabölö niha,+ hizaʼi börö waʼabölö gehehagu niʼamoniʼö,”+ iwaʼö Yehowa samatörö saradadu zorugo.
7 Hewaʼae simane hili waʼebua gabula dödö, aloʼo daʼö+ föna Zerubabeli.+ Hasambalö iʼohe baero gara si so ba mbumbu gosali irege lamane niha, ”No baga-baga sibai! No baga-baga sibai!”’”
8 Ifuli zui imane khögu Yehowa,
9 ”Tanga Zerubabeli zamazökhi fondrasi nomo daʼa+ ba tangania göi zangasiwai dania.”+ Aboto ba dödömi dania wa Yehowa samatörö saradadu zorugo zamatenge yaʼo khömi.
10 ”Böi miʼosiwawöi zide-ide andrö ba wamobörö,+ börö me somuso tödö dania ira na laʼila mbua lot* ba danga Zerubabeli. Iʼila göi daʼö hörö Yehowa si fitu andrö, samaigi-maigi ulidanö maʼasagörö.”+
11 Manofu ndraʼo khönia, ”Hadia geluaha döla zaitu si dua rozi andrö, si so ba gambölö naha wandru hegöi ba gabera?”+
12 Usofu zui khönia, ”Hadia geluaha ndraha geu zaitu si dua ngamböbö andrö sangaʼasogö fanikha anaʼa, sangele ba zi dombua pipa anaʼa?”
13 Manofu ia, ”Hadia lö öʼila geluahania?”
Umane, ”Löʼö Pa.”
14 Imane, ”Eluahania darua niha nifili* si zizio ba zinga Lowalangi samatörö ulidanö maʼasagörö.”+
