Zakharia 5:1-11
5 Aefa daʼö, uʼila sambua gölu-gölu zura si hombo.
2 Manofu ia khögu, ”Hadia niʼilamö?”
Umane, ”Uʼila gölu-gölu zura si hombo, faʼanaunia 8,9 meter ba faʼebolonia 4,5 meter.”*
3 Imane, ”Daʼa wangelifi salua ba zi sagörö ulidanö. Ba zi tambai gölu-gölu zura daʼö manandrösa ia ba niha sanagö,+ ba zi tambainia manandrösa ia ba niha si fahölu ba waya,+ börö me lö si göna fanguhuku niha sanagö hegöi niha si fahölu ba waya.
4 Imane Yehowa samatörö saradadu zorugo, ’No uʼasogö wangelifi andrö, ba möi ia dania ba nomo zanagö hegöi ba nomo niha sangogunaʼö töigu si möi ba hölu ba waya. Toröi ba daʼö wangelifi andrö, ihori nomora, eu hegöi kara.’”
5 Aefa daʼö, ifahatö ia malaʼika si fahuhuo khögu andrö imane, ”Faigi hadia zoroma nasa.”
6 Manofu ndraʼo, ”Hadia daʼö?”
Imane, ”Daʼö naha efa.”* Ifuli zui imane, ”Daʼö zikhala niha ba zi sagörö ulidanö.”
7 Uʼila lagö-lagönia sowulo-wulo nifazökhi moroi ba zimo saitö. Me teboka lagö-lagönia, uʼila samösa ndra alawe si dadao ba daʼö.
8 Imane malaʼika andrö, ”Töi ndra alawe daʼö Faʼalösökhi.” Ituliʼö tou ndra alawe daʼö ba naha efa ba ifuli ilagöʼö faoma simo saitö.
9 Ba uʼila so darua ndra alawe samahatö yaʼia. Afira simane afi dumbao, ba muhombo ira laʼoʼö lala nangi. Lafazawa si yawa naha daʼö ba dalu mbanua.
10 Andrö wa manofudo khö malaʼika si fahuhuo khögu, ”Hezo laʼohe naha daʼö?”
11 Imane, ”Ba mbanua Zineara.*+ Ba daʼö dania mufazökhi nomo khö ndra alawe andrö. Na no awai mufazökhi, mubeʼe ia ba daʼö, ba nahia si tefaudu khönia.”
Nisura ba gahe zura
^ Sin.: ”efa”. Eluahania naha mazui raga-raga niʼogunaʼö ba wanuʼa efa. 1 efa = 22 L. Faigi Lamp. B14.
^ Eluahania Babilona.