Zakharia 7:1-14
7 Mohede Yehowa khö Zakharia+ ba ngaluo si öfa ba mbaŵa si siwa yaʼia daʼö baŵa Kisilewi* me no öfa fakhe mamatörö Razo Dario.
2 Niha si so ba Mbetieli, lafatenge Zareseri hegöi Regemi-melekhi awö nono buara ba wangandrö faʼahakhö dödö Yehowa.
3 Lalau manofu khö ndra ere ba nomo* Yehowa samatörö saradadu zorugo hegöi khö ndra samaʼeleʼö, ”Hadia moguna ulau meʼe ba ufalua wuasö ba mbaŵa si lima,+ simane si no ufalua ba zi hauga fakhe?”
4 Ifuli zui imane khögu Yehowa samatörö saradadu zorugo,
5 ”Waʼö ba nono mbanua soi daʼa awö khö ndra ere, ’Me mifalua wuasö ba miʼebuaʼö limi weʼe ba mbaŵa si lima awö ba mbaŵa si fitu+ sagötö zi 70 fakhe,+ hadia sindruhu-ndruhu fuasö ami khögu?
6 Ba ginötö manga ami ba mamadu, hadia tenga ba khömi samösa mifalua daʼö?
7 Hadia tenga sinangea miʼoʼö daromali Yehowa nifaʼemania khö ndra samaʼeleʼönia me mböröta?+ Me luo daʼö, so nasa niha ba Yeruzalema awö ba mbanua si fasui yaʼia ba larasoi waʼohahau dödö. So göi niha ba Negebi hegöi ba Zefela.’”
8 Ifuli mohede Yehowa khö Zakharia,
9 ”Imane Yehowa samatörö saradadu zorugo, ’Mifalua wanguhuku si fao faʼatulö.+ Miforomaʼö waʼomasi si lö faröi+ ba faʼahakhö dödö ba nawömi niha.
10 Böi milimo lakha mbanua, si lö ama,*+ niha si fatewu+ mazui niha si numana.+ Böi so ba dödömi wangera-ngera si lö sökhi ba wamakao awömi.’+
11 Hizaʼi, lö laʼameʼegö tödö daʼö.+ Lö aetu laʼerogö ndraʼo+ ba laduhö dalingara.+
12 Abeʼe högöra*+ ba lö omasi ira laʼoʼö goroisa* awö daromali Yehowa samatörö saradadu zorugo nifaʼema geheha niʼamoniʼö khö ndra samaʼeleʼönia me föna.+ Mofönu sibai khöra Yehowa samatörö saradadu zorugo.”+
13 ”’Lö lafondrondrongo me ukaoni* ira.+ Börö daʼö göi wa lö ufondrondrongo me mohede ira,’+ iwaʼö Yehowa samatörö saradadu zorugo.
14 ’Uʼasogö nangi sabölö-bölö ba wamazawili yaʼira ba soi si lö irai laʼila.+ Laröi dania mbanuara ba lö hadöi sangiagö. Lö hadöi sanörö mazui sangawuli ba daʼö,+ börö me no labaliʼö nahia si hokha mbu mbanua si sökhi andrö.’”
Nisura ba gahe zura
^ Mazui ”gosali”.
^ Mazui ”si lö ama si lö ina”.
^ Mazui ”abeʼe dödöra simane intan”.
^ Mazui ”wanuturu lala”.
^ Sin.: ”ikaoni”.
