Zakharia 9:1-17
9 Angombakhata moroi khö Lowalangi:
”No iwaʼö Yehowa wa ihuku dania Haderakhi,Mendrua manö Mbanua Ndramaseko.+
Ifaigi-faigi niha gulidanö Yehowa+Hegöi mado Gizaraʼeli maʼafefu.
2 Ihuku göi Hamata+ si faola khönia,Simanö göi Diro+ awö Zidona+ hewaʼae atua-tua sibai ira.+
3 No ifazökhi Tiro mbanua si so baʼa-baʼa.
No ihöna wirö simane faʼoya gawu-gawu,Ba anaʼa simane faʼoya dambu ba lala.+
4 Irabu dania gokhötania Yehowa,Ihöndrögö zaradadunia ba nasi;*+Ba ahori akhozi ia ba galitö.+
5 Iʼila dania daʼö Asekalo ba ataʼu ia.
Aombö dödö niha Gaza,Simanö göi Nekerona börö me lö hadöi saʼae nidöna-dönania.
Mate razo Gaza,Ba tobali nahia si lö niha-niha dania Gasekalo.+
6 Toröi niha baero ba GasotoBa uhori waʼasiliyawa niha Wilisiti.+
7 Uhalö nagole si so do ba mbawa niha Wilisiti,Hegöi ö niʼogorofi moroi ba nifönia.
Tobali okhöta Lowalangi nono mbanuania si toröi,Tobali ia simane sondröniaʼö ba mado Yehuda,+Ba tobali simane niha Yebusi dania niha Nekerona.+
8 ”Ufazökhi nose föna nomogu ba wozago yaʼia,+Irege lö hadöi niha si tohare hegöi sofanö.
Lö itörö daʼö niha samakao,+Börö me no uʼila samösa wamakaora.*
9 Miʼomusoiʼö dödömi, yaʼami banua Ziona.
Miʼowua-wuaʼö dödömi, yaʼami Yeruzalema.
Hiza! Tohare dania razomö.+
Satulö ia ba no iʼohe wangorifi;*So khönia wangide-ngideʼö+ ba itörö galide,Kalide sawuyu-wuyu,* ono galide si alawe.+
10 Uhori fefu gureta wasuwöta moroi ba GeferaiHegöi kudo moroi ba Yeruzalema.
Muhori fefu wana nifosinali.
Iʼombakhaʼö waʼatulö ba ngawalö soi.+
Mamatörö ia iʼotarai nasi si sambua numalö ba nasi si sambuaIʼotarai Nungo Nidanö Oiferati irugi ba wondrege danö.+
11 He yaʼugö Siona, uheta nono mbanuamö si no mubeʼe ba mbaʼa nidanö soköli,Börö ndro wawuʼusa ligu khöu.+
12 He yaʼami si no muʼoloiʼö si so tötönafö, mifuli ami ba mbaʼa-baʼa saro.+
Umane khöu maʼökhö andre,’He yaʼugö Siona, dua winaeta dania howu-howu nitemau moroi khögu.+
13 Ufaöndrö* Yehuda simane fana sinali khögu.
Ubaliʼö dania ono wanania Geferai.
He yaʼugö Siona, ubeʼe waʼabölö ba ndraonou matuaBa wolawa iraono matua Yunani,Ba ubaliʼö ndraʼugö simane föda niha sabölö.’
14 Iforomaʼö Yehowa wa fao ia ba nono mbanuania,Ba aefa nono wanania simane gari mbanua.
Yehowa Lowalangi Fondrege Zalawa dania zamoli torofe nifazökhi moroi ba dandru,+Ba möi ia fasuwö simane angi sabölö-bölö moroi raya.
15 Iʼoʼawögö ira Yehowa samatörö saradadu zorugo.
Lö mesokho ira ba nono gara ribo-ribo.+
Somuso tödö ira ba wamadu, simane na labadu nagu.
Afönu waʼohahau dödöra simane faʼafönu mako niʼogunaʼö ba wameʼe sumange,Simane watalinga naha wanunu sumange.+
16 Ba luo daʼö, iʼorifi ira Lowalangira Yehowa,Simane kubalo sangefaʼö ono mbiri-birinia.+
Tobali ira simane feremata ba dakula si takile ba danönia.+
17 Sahöli-höli dödöda waʼasökhi lagunia,+Lö hadöi solawa lakhöminia!
Abölö dania nono matua hegöi ono alawe,Börö gö awö nagu si bohou.”+
Nisura ba gahe zura
^ Mazui te ”Isuwö zaradadunia ba nasi”.
^ Te eluahania iʼila wamakao nono mbanuania.
^ Mazui ”Kalide si matua”.
^ Mazui ”waʼamöna; ba no teʼorifi”.
^ Mazui ”Ufasa tali ba”.
