A B D E F G H I K L M N O P R S T U Y Z

A

• Ab.

  Töi mbaŵa si 5 ba zura mbaŵa agama Yahudi me no aefa teʼoloiʼö ira ba Mbabilona, baŵa si 11 ba zura mbaŵa si toʼölö laʼogunaʼö niha Yahudi, aekhu ia ba dalu mbaŵa si Fitu irugi talu mbaŵa si Walu. Lö hadöi töinia ba Zura Niʼamoniʼö, ba lafotöi mbaŵa daʼa ”baŵa si lima”. (4Mo 33:38; Esr 7:9)​—Faigi Lamp. B15.

• Abibi.

  Daʼa döi mbaŵa siföföna ba zura mbaŵa agama Yahudi, baŵa si 7 ba zura mbaŵa si toʼölö laʼogunaʼö niha Yahudi, aekhu ia ba dalu mbaŵa si Tölu irugi talu mbaŵa si Öfa. Eluahania yaʼia daʼö ”Bua Zinanö si Bohou”. Me no mangawuli niha Yahudi moroi ba Mbabilona, lafotöi mbaŵa daʼa Nisana. (5Mo 16:1)​—Faigi Lamp. B15.

• Abyssos.

  Ngawua wehede ba li Yunani eluahania ”abakha sibai” mazui ”tebai nisuʼa, lö ola”. Ngawua wehede niʼogunaʼö ba Mbuku Niʼamoniʼö Yunani Niha Keriso eluahania salua mazui sambua nahia si no mufaʼuʼu, simane lewatö ba tanö böʼönia.​—Luk 8:​31; Rom 10:7; Fam 20:3.

• Adara.

  Töi mbaŵa si 12 ba zura mbaŵa agama Yahudi me no aefa teʼoloiʼö ira ba Mbabilona, baŵa si 6 ba zura mbaŵa si toʼölö laʼogunaʼö niha Yahudi, aekhu ia ba dalu mbaŵa si Dua irugi talu mbaŵa si Tölu. (Est 3:7)​—Faigi Lamp. B15.

• Adu.

  Gambara niʼila hörö mazui nikhalaigö, niʼogunaʼö niha ba wamosumange Lowalangi. Famosumange adu eluahania manuno, mangomasiʼö mazui mangataʼufi adu.​—Si 115:4; Hal 17:16; 1Ko 10:14.

• Afökha.

  Töi nibeʼe khö Zatana ba Mbuku Niʼamoniʼö Yunani Niha Keriso, eluahania ”Samöbögö si Lö Duhu”. Lafotöi Zatana andrö Afökha börö me yaʼia zi oföna mamöbögö si lö duhu khö Yehowa, taromalinia si sökhi, ba töinia niʼamoniʼö.​—Mat 4:1; Yoh 8:​44; Fam 12:9.

• Akhaya.

  Ba Mbuku Niʼamoniʼö Yunani Niha Keriso, Akhaya andre töi provinsi Romawi si so tanö raya Yunani, ibu kotania yaʼia daʼö Korindro. Tefarahu zi sagörö Felofonesu ba Nakhaya, simanö göi danö saloʼo Yunani, tanö ba dalu. (Hal 18:12)​—Faigi Lamp. B13.

• Alabaster.

  Töi mbuli-buli wanikha somuhua nifazökhi moroi ba gara nisöndra ahatö ba Alabastron, Miserai. No ide-ide mbawa mbuli-buli daʼa, tola niduhö enaʼö lö aduwa wanikha somuhua sebua böli andrö. Töi mbuli-buli wanikha somuhua daʼa fagölö döinia ba gara niʼogunaʼö andre.​—Mrk 14:​3, nis.

• Alafa ba Omega.

  Hurufo siföföna ba safuria ba abjad Yunani. Tölu kali mutötöi ia ba mbuku Wamaʼeleʼö si tobali famalala döi Lowalangi. Ba mbuku andrö, töi daʼa fagölö ira ”si oföna ba safuria” hegöi ”böröta ba amozua”.​—Fam 1:8; 21:6; 22:13.

• Alamoti.

  Ngawua wehede niʼogunaʼö ba musik eluahania ”Iraono Alawe; Ira Alawe Sagawuyu”, te eluahania li sopran ndra alawe sagawuyu. Tola manö mufoʼeluaha ia wa sinunö mazui musik daʼa, alawa note woʼanunöisi yaʼia.​—1Ng 15:20; Si 46:Sup.

• Amabuʼula li.

  Fahasara dödö mazui angetula ba gotaluara Lowalangi faoma niha hegöi niha khö nawönia niha ba wamalua mazui lö lafalua zi no lawaʼö. Itaria ha samösa niʼandrö ba wamalua si no latatugöi ba gamabuʼula daʼö. Amabuʼula daʼö lafotöi ia amabuʼula zi samösa (unilateral)  fagölö ira zazi. So göi mbuʼusa li si fagölö lafalua faoma fatambai, lafotöi daʼö buʼusa li zi darua (bilateral). Baero gamabuʼula li niwaʼö Lowalangi ba niha, so göi ba Zura Niʼamoniʼö gamabuʼula li nifazökhi niha khö nawönia niha, soi, mado mazui ngawawa tanö böʼö. So ösa gamabuʼula li sabölö ebua simane buʼusa li Lowalangi khö Gaberahamo, khö Dawido hegöi ba ndraono Gizaraʼeli (amabuʼula li Goroisa Moze), ba Izaraʼeli tana khö Lowalangi (amabuʼula li si bohou).​—1Mo 9:​11; 15:18; 21:27; 2Mo 24:7; 2Ng 21:7.

• Amaedola.

  Fehede satua-tua mazui waö-waö sadogo-dogo sameʼe famahaʼö mazui sindruhu, si lö oya ngawua wehede. Amaedola si so ba Zura Niʼamoniʼö, so ösa zi hulö dahö-dahö mazui fehede nihaogö foʼangeragö enaʼö muʼila geluaha. Muʼalui ngawua wehede si sökhi ba wamaʼema sindruhu, ba sasesenia mufoʼamaedola. So wehede nifoʼamaedola ba wangoʼaya mazui ba wangailasi si samösa niha.​—Sango 12:9; 2Fe 2:​22.

• Amozua götö daʼa.

  Ngaluo fatua lö awai ginötö nitehegö mazui inötö nifatörö Zatana. Inötö daʼa, alua ia ba ngaluo waʼatohare Keriso. Ba luo daʼö, ifaretakö ndra malaʼikania Yesu ba ”wamöföʼö niha si lö sökhi moroi ba niha satulö” ba wangohori yaʼira. (Mat 13:​40-​42, 49) Omasi ndra nifahaʼö Yesu laʼila hawaʼara alua ”gamozua” götö danö andre. (Mat 24:3) Fatua lö mangawuli Yesu ba zorugo, no ifabuʼu khö ndra nifahaʼönia wa lö iröi ira irugi gamozua götö daʼa.​—Mat 28:20.

• Amuata si lö faʼaila.

  Moroi ba li Yunani aselgeia, moʼamakhaita ia ba horö sebua ba wanawö huku Lowalangi, sangoromaʼö amuata si lö faʼaila mazui fangoʼaya si lö faʼataʼu, amuata si lö mangila wetahögö mazui sangosiwawöi huku, famatörö, awö goi-goi. Manandrösa wehede daʼa ba horö sebua.​—Gal 5:​19; 2Fe 2:7.

• Angowuloa; Banua Niha Keriso.

  Niha sato si no owulo ba zi sambua nahia ba wamalua halöwö mazui ohitö dödö. Ba Mbuku Niʼamoniʼö Heberaiʼo, ngawua wehede si dombua andre eluahania soi ndraono Gizaraʼeli mazui orahua ba gowasa soʼamakhaita ba agama nifalua ba Gizaraʼeli. Na ba Mbuku Niʼamoniʼö Yunani Niha Keriso, manandrösa ia ba gangowuloa nifalua zi samösa niha mazui banua niha Keriso, hizaʼi asese lafoʼeluaha ia banua niha Keriso maʼafefu.​—1Ra 8:22; Hal 9:31; Rom 16:5.

• Aramo; Niha Garamo.

  Yaʼia daʼö ngaʼötö Garamo ono Zemi si toröi ba Hili Libano ofeta ba Mezofotamia, ba iʼotarai Hili Taurus tanö yöu italuʼi Ndramaseko tanö raya. Lafotöi mbanua daʼö Aramo ba li Heberaiʼo, hizaʼi ba gafuriata lafotöi ia Siria, ba fefu zowanua ba daʼö lafotöi ira niha Ziria.​—1Mo 25:20; 5Mo 26:5; Hos 12:12.

• Areofago.

  Hili salawa ba Natena, tanö yöu gaekhula Akorofoli. Fagölö ia ba döi gödo zangetuʼö huku si so ba mbanua andrö. Ba daʼö laʼohe Waulo ira soloʼö Sitoiko hegöi Efikuro ba wanutunö si no lafaduhusi tödö.​—Hal 17:19.

• Asaroti.

  Lowalangi niha Ganaʼana, yaʼia daʼö lowalangi wasuwöta ba fangatabö, foʼomo Mbaʼali.​—1Sa 7:3.

• Aselgeia.​—

  Faigi AMUATA SI LÖ FAʼAILA.

• Asia.

  Ba Mbuku Niʼamoniʼö Yunani Niha Keriso, Asia andrö sambua töi provinsi Romawi, tefarahu ba daʼö tanö ba gaekhula Turki iadaʼa, ba so ösa hulo simane Samo faoma Fatemo. Ibu kotania Efeso. (Hal 20:16; Fam 1:4)​—Faigi Lamp. B13.

• Azazeli.

  Töi ba li Heberaiʼo, te eluahania ”Nambi si Taya”. Ba Ngaluo Wangatulö, mufoloi ba danö si mate nambi si no mutatugöi khö Gazazeli, hulö na daʼö zolohe horö nifalua ndraono Gizaraʼeli ba ndröfi silalö. ​—3Mo 16:​8, 10.

 B

• Baʼali.

  Daʼa lowalangi niha Ganaʼana nibaliʼö sokhö talu mbanua ba sameʼe teu hegöi fangatabö. ”Baʼali” tobali göi amalalata döi lowalangi sambö mufolakhömi ba zi sambu-sambua banua. Ba li Heberaiʼo eluahania ”Sangokhögö; Sokhö”.​—1Ra 18:21; Rom 11:4.

• Baho alitö.

  Laʼamaedolagö ia nahia ”si hola-hola safönu balera”, lafotöi ia göi ”faʼamate si mendrua”. Ba nahia daʼa tetiboʼö niha sebua horö si lö mamalalini era-era, Afökha, faʼamate hegöi Lewatö (Hades). Baho daʼa no amaedola waʼamate si lö aetu, tenga famakao si lö aetu, börö me tetiboʼö göi ba daʼö mboto eheha, faʼamate hegöi Hades si tebai akhozi ba galitö.​—Fam 19:20; 20:​14, 15; 21:8.

• Balu-balu dötöʼa.

  Kandre-kandre nifogama-gama faoma kara feremata, niʼogunaʼö gere sebua ndraono Gizaraʼeli ero na möi ia ba Nahia Niʼamoniʼö. Lafotöi daʼa ”balu-balu dötöʼa fangetuʼö huku” börö me so bakha Gurimi ba Tumimi, niʼogunaʼö ba wangalui angetula huku moroi khö Yehowa. (2Mo 28:​15-​30)​—Faigi Lamp. B5.

• Banua Dawido.

  Töi nibeʼe ba mbanua Yebusi me no aefa ikalaisi mbanua daʼö Dawido ba ifazökhi gödo waʼarazonia ba daʼö. Lafotöi nasa mbanua daʼa Siona. Daʼa ösa mbanua Yeruzalema fondrege zatua si so tanö raya gatumbukha.​—2Sa 5:7; 1Ng 11:​4, 5.

• Banua folumöʼö.

  Banua ndra niha Lewi, nahia si tola isawa si no mamunu niha si lö muʼodödögö enaʼö telumöʼö ia moroi ba niha solau balö. Moloʼö fanuturu lala moroi khö Yehowa, so önö ngawua mbanua simane daʼö si no tehenaigö ba Danö Amabuʼula si no ihonogöi Moze, simanö göi Yosua ba gafuriata. Na no ofeta zi samösa niha ba mbanua folumöʼö, moguna ifatunö khö ndra sondröniaʼö ba mbawa göli hadia zalua khönia, ba lahaogö wanemaʼö yaʼia. Hewisa na so niha sangodödögö mamunu niha ba moloi ia ba mbanua folumöʼö andre? Lahaogö wamareso salua andrö ba mbanua salua wabunusa ba hadia sindruhu tenga niʼodödögönia. Na sindruhu lö fasala ia, ba lafangawuli ia ba mbanua folumöʼö andrö. Tebai möi ia baero nola mbanua daʼö sandrohu faʼaurinia mazui ofeta mate gere sebua.​—4Mo 35:​6, 11-​15, 22-​29; Yos 20:​2-8.

• Bat.

  Suʼa-suʼa nidanö, te mato 22 L (5,81 galon AS), moloʼö nisöndra arkeologi yaʼia daʼö akhökhöla moroi ba naha daʼa. Ba zi hawaʼoya ngawalö wanuʼa moloʼö Sura Niʼamoniʼö, fanuʼa zabasö hegöi fanuaʼa zoköli, laʼerai moloʼö faʼoya 1 bat yaʼia daʼö 22 L. (1Ra 7:​38; Hez 45:14)​—Faigi Lamp. B14.

• Baŵa si bohou.

  Luo siföföna ero waŵa ba zura mbaŵa niha Yahudi. Daʼa ngaluo waʼowulo, orudu manga hegöi ba wameʼe sumange sabölö sökhi. Ba gafuriata, ngaluo daʼö tobali ngaluo sebua niʼowasaini ba soi andrö, ba lö mohalöwö niha ba ngaluo daʼö.​—4Mo 10:10; 2Ng 8:​13; Kol 2:​16.

• Beʼelö.

  Si lö tola löʼö ibuʼa si sambua soi mazui si samösa razo si tobali tandra wa moloʼö ia khö zi samösa samatörö mazui si sambua soi. Ifalua göi daʼö ba wondrorogö fahuwusa mazui ba wangandrö folumöʼö. (2Ra 3:4; 18:14-​16; 2Ng 17:11) Fehede daʼa göi tola mufoʼeluaha ia pajak nibuʼa ero samösa niha.​—Neh 5:4; Rom 13:7.

• Belesebu.

  Töi nibeʼe khö Zatana mazui salawa ndra malaʼika si lö sökhi. Fehede daʼa, te nihalö moroi ba ngawua wehede Baʼali-sebu, yaʼia daʼö Baʼali nifosumange niha Wilisiti ba Nekerona.​—2Ra 1:3; Mat 12:24.

• Böbö högö.

  Nukha niböbö ba högö si tobali balu-balu. Böbö högö nifake gere sebua, mufazökhi ia moroi ba nukha si sökhi, ba so fönania mbala högö moroi ba ganaʼa niböbö faoma sinali  sobalau. Ifake göi razo mböbö högö andre tanö tou dakulania. Iʼogunaʼö göi wehede daʼa Yobi si tobali famaedo, me iwaʼö wa faʼatulö andrö hulö mböbö högö.​—2Mo 28:​36, 37; Yob 29:14; Hez 21:26.

• Bözi-bözi.

  Ba Mbuku Niʼamoniʼö Heberaiʼo, fehede daʼa manandrösa ia ba wamakao mazui fökhö waba si tobali fanguhuku moroi khö Yehowa. Na ba Mbuku Niʼamoniʼö Yunani Niha Keriso eluahania bözi-bözi si no landrandra mazui satarö balö.​—4Mo 16:49; Yoh 19:1.

• Bongi Watomesa Zoʼaya.

  Femanga roti si lö mufaruka ragi faoma agu si no amaedola mboto ba do Keriso; fanörö tödö faʼamate Yesu. Simane nitutunönia ba Mbuku Niʼamoniʼö, moguna lafalua ira niha Keriso wanörö tödö faʼamate Yesu. Andrö tefaudu na mufotöi ia ”Fanörö Tödö”.​—1Ko 11:​20, 23-​26.

• Bou auri.

  Fökhö guli si möi famaʼala. Bou auri nitutunö ba Zura Niʼamoniʼö, faböʼö ia moroi ba mbou auri salua ba ginötö andre, börö me tenga ha niha zi göna bou auri ba götö daʼö, hizaʼi nukha hegöi omo.​—3Mo 14:54, 55; Luk 5:​12.

• Buʼusa li.

  Fawuʼusa li soroi ba dödö khö Lowalangi na so nifalua, na mubeʼe zumange, na mangai halöwö, mazui na lö omasi mufalua hadia ia hewaʼae tola mufalua. Buʼusa li andre fagölö waʼaronia simane hölu.​—4Mo 6:2; Sango 5:4; Mat 5:​33.

• Buala.

  Fanolo ba niha. Hewaʼae lö muʼombakhaʼö ba Mbuku Niʼamoniʼö Heberaiʼo, hizaʼi bakha ba Goroisa Moze iʼandrö enaʼö mamuala ndraono Gizaraʼeli ba niha si numana.​—Mat 6:2.

• Buku Niʼamoniʼö.

  Taromali Lowalangi niʼamoniʼö. Ha ba Mbuku Niʼamoniʼö Yunani Niha Keriso tesöndra ngawua wehede daʼa.​—Luk 24:27; 2Ti 3:​16.

• Buli.

  Töi mbaŵa si 8 ba zura mbaŵa agama Yahudi, baŵa si 2 ba zura mbaŵa si toʼölö laʼogunaʼö niha Yahudi, aekhu ia ba dalu mbaŵa si Fulu irugi talu mbaŵa si Felezara. Eluaha ngawua wehede daʼö ”mowua; mangaʼasogö”. (1Ra 6:​38)​—Faigi Lamp. B15.

• Bunga lawang.

  Bua moroi ba geu lawang (Cinnamomum cassia), fakhili-khili ia ba geu kuli mani. Muʼogunaʼö lawang andre tobali fanikha somuhua ba famaruka fanikha famayoini.​—2Mo 30:24; Si 45:8; Hez 27:19.

D

• Dagono.

  Lowalangi niha Wilisiti. Lö muʼila mutatugöi hezo moroi ngawua wehede daʼa, hizaʼi moloʼö ira sagatua-tua, ngawua wehede daʼa moʼamakhaita ia ba ngawua wehede li Heberaiʼo dagh (iʼa).​—Sangu 16:23; 1Sa 5:4.

• Dahö-dahö.

  Kereke mazui balö-balö geu niʼogunaʼö ba wangai angetula. No labukusi ba ngaʼörö mbaru mazui labeʼe ba rata ba lafadögö-dögö. Saekhu tou mazui nihalö, daʼö dania nifili. Asese sibai mangandrö niha ba ginötö fadahö-dahö ira.​—Yos 14:2; Si 16:5; Amd 16:33; Mat 27:35.

• Dalimo.

  Bua zinanö si fagölö-gölö ba apel, so dakula ba detenia. Ba narö gulinia sabeʼe, oya zogowulo-wulo si gide-ide safönu idanö, soroyo-royo. Ba gahe mbaru sanau si lö taʼio nifazökhi moroi ba mbana sobalau nifake gere sebua, so gambara dalimo. So göi ba gehomo Yakhino hegöi Boasi föna gosali.​—2Mo 28:34; 4Mo 13:23; 1Ra 7:​18.

• Darik.

  Kefe loga anaʼa moroi ba Weresi, faʼabuania 8,4 g (0,27 ons troy). (1Ng 29:7)​—Faigi Lamp. B14.

• Dekafoli.

  Daʼa mbanua ba Yunani me mböröta si fulu banua (moroi ba ngawua wehede Yunani deka, eluahania ”fulu”, ba polis, eluahania ”banua”). Oya mbanua daʼa si so ba gatumbukha Nasi Galilaia hegöi ba Nungo Nidanö Yoridano, andrö lafotöi mbanua daʼö Dekafoli. Banua daʼa zi tobali nahia wogale sebua hegöi budaya Helenistik. No itörö mbanua daʼa Yesu, hizaʼi  lö itutunö Sura Niʼamoniʼö wa no möi ia fazambua ba mbanua daʼö. (Mat 4:​25; Mrk 5:​20)​—Faigi Lamp. A7 ba B10.

• Dinar.

  Kefe loga Romawi nifazökhi moroi ba wirö faʼabuania mato 3,85 g (0,124 ons troy), so ba zi tambainia gambara Kaisaro. Gazi zohalöwö si maʼökhö yaʼia daʼö sambua dinar ba laʼandrö ira niha Romawi ba niha Yahudi enaʼö labeʼe zi sambua dinar si tobali famuʼa pajak. (Mat 22:17; Luk 20:24)​—Faigi Lamp. B14.

• Döfa.

  Suʼa-suʼa waʼanau ba wanuʼa faʼabakha nidanö, fagölö ira 1,8 m (6 kaki). (Hal 27:28)​—Faigi Lamp. B14.

• Döla-döla niʼamoniʼö.

  Ba li Heberaiʼo (asyerah) eluahania (1) adu nifotoga soʼamaedolagö Asera, lowalangi fangatabö nifosumange niha Ganaʼana, mazui (2) adu dewi Asera. No adölö-dölö toga daʼa ba tefazökhi ösa mazui fefu moroi ba geu. Te so döla-döla niʼamoniʼö si lö mufoe, ba so göi zi hulö geu.​—5Mo 16:21; Sangu 6:​26; 1Ra 15:13.

• Drakhma.

  Ba Mbuku Niʼamoniʼö Yunani Niha Keriso, eluahania loga firö Yunani. Faʼabuania me luo daʼö 3,4 g (0,109 ons troy). Ba Mbuku Niʼamoniʼö Heberaiʼo, so ayati sangumaʼö drakhma anaʼa moroi ba götö Weresia, fagölö mbölinia ba darik Weresia. (Neh 7:​70; Mat 17:24)​—Faigi Lamp. B14.

E

• Edomo.

  Töi böʼö khö Gezau ono Gizaʼaki. Ngaʼötö Gezau (Edomo) laʼokhögö danö Zeʼira, yaʼia daʼö tanö si so ba hili ba gotalua Nasi si Mate faoma Asi Sadöni Bakha Aqaba. Ato zamotöi banua daʼö Edomo. (1Mo 25:30; 36:8)​—Faigi Lamp. B3 ba B4.

• Efa.

  Suʼa-suʼa zoköli awö nahiania, niʼogunaʼö ba wanuʼa bua zinanö. Suʼa-suʼa daʼa fagölö waʼebuania ba zuʼa-suʼa bat ba wanuʼa idanö, yaʼia daʼö 22 L (20 kuart kering AS). (2Mo 16:36; Hez 45:10)​—Faigi Lamp. B14.

• Eferai.

  Töi nono Yosefo numero dua, ba gafuriata tobali töi ba zi sambua mado Gizaraʼeli. Börö me mado si tehöngö ia, Eferai andrö zosalahini famatörö ndraono Gizaraʼeli si fulu mado me no tebagi dua Gizaraʼeli.​—1Mo 41:52; Yer 7:​15.

• Efikuro.

  Sonekhe ba wamahaʼö niha Yunani, sauri me 341-270 SM. Famahaʼönia teʼodane-dane moloʼö fangera-ngera wa ohitö dödö ba waʼauri andre ero samösa niha yaʼia daʼö faʼomuso-muso dödö.​—Hal 17:18.

• Efod.

  Baru nifalemba ba dötöʼa nifake ndra ere. Ifake mbaru efod si no muhonogöi ere sebua ba no mufasa 12 ngawua gara sebua böli ba mbalu-balu dötöʼa. (2Mo 28:​4, 6)​—Faigi Lamp. B5.

• Eheha.

  Ba li Heberaiʼo ruakh hegöi ba li Yunani pneuma. Oya geluaha ngawua wehede si dombua andre. Fefu geluahania manandrösa ba ngawalö hadia ia si tebai iʼila niha ba so waʼabölö ba nifaluania. Fehede si dombua andre eluahania (1) angi, (2) faʼabölö niʼokhögö zauri ba gulidanö, (3) faʼaterou dödö niha hegöi tani wa iwaʼö ba ifalua hadia ia, (4) fehede niʼehehaini si lö iʼila höröda hezo iʼotarai, (5) malaʼika, ba (6) faʼabölö Lowalangi mazui eheha niʼamoniʼö.​—2Mo 35:21; Si 104:29; Mat 12:43; Luk 11:13.

• Eheha niʼamoniʼö.

  Faʼabölö si lö oroma niʼogunaʼö Lowalangi ba wamalua ohitö dödönia. Mufotöi ia niʼamoniʼö börö me faʼabölö andre moroi khö Yehowa fondrege niʼamoniʼö ba fondrege zatulö, börö me iʼogunaʼö göi waʼabölö andre Lowalangi ba wamalua gofu hadia ia niʼamoniʼö.​—Luk 1:​35; Hal 1:8.

• Ehomo.

  Taha-taha si no adölö-dölö si hulö toga. Itaria, mufazökhi gehomo ba wanörö tödö nifalua zi samösa niha mazui salua si tebai muʼolifugö. Muʼogunaʼö toga-toga andre ba gosali hegöi ba gödo razo Zelomo. Lafazökhi gehomo niʼamoniʼö ira niha baero soguna  ba agama faya, ba sasesenia fao-fao ndraono Gizaraʼeli ba daʼö.​—Sangu 16:29; 1Ra 7:​21; 14:23.

• Ehomo niʼamoniʼö.

  Ehomo nifazökhi moroi ba gara, te eluahania famaedo wamatua ndra matua, niʼogunaʼö ba wamosumange Baʼali mazui lowalangi faya tanö böʼö.​—1Mo 23:24.

• Eluli.

  Töi mbaŵa si 6 ba zura mbaŵa agama Yahudi me no aefa teʼoloiʼö ira ba Mbabilona, baŵa si 12 ba zura mbaŵa si toʼölö laʼogunaʼö niha Yahudi, aekhu ba dalu mbaŵa si Walu irugi talu mbaŵa si Siwa. (Neh 6:​15)​—Faigi Lamp. B15.

• Emuri.

  Gitö somuhua nihalö moroi ba ngawalö ndruʼu sodoi mazui eu side-ide simane ngafu Commiphora. Emuri andre sambua famaruka na mufazökhi wanikha famayoini niʼamoniʼö. Tola göi laʼogunaʼö gemuri andre fangomuhua nukha mazui naha wemörö, tola göi lafaruka ba wanikha fangomösi ba fangalösö guli. Muʼogunaʼö ia göi ba mboto zi mate si lö ara tö mukoʼo.​—2Mo 30:23; Amd 7:​17; Yoh 19:39.

• Enoni.

  Moroi ba li Yunani diakonos. Asese mufoʼeluaha ia tobali ”sangai halöwö” mazui ”enoni”. Eluaha ”genoni” yaʼia daʼö niha sangai halöwö ba wanolo ngawawa zatua sokubaloi ba mbanua niha Keriso. Moguna iʼoʼö goi-goi Zura Niʼamoniʼö enaʼö tola ihalö halöwö genoni.​—1Ti 3:​8-​10, 12.

• Ere.

  Niha si tobali salahi Lowalangi, sangai halöwö ba samahaʼö ono mbanua Lowalangi sanandrösa khönia hegöi ba goi-goinia. Ere andre zi tobali salahi nono mbanua föna Lowalangi. Ibeʼe zumange nitunu, yaʼia zamaʼema ba sangandrö khö Lowalangi sanandrösa ba nono mbanuania. Fatua lö hadöi Oroisa Moze, högö yomo ba nomo zi tobali ere ba nösi nomonia. Me no so Goroisa Moze, si tobali ere yaʼia daʼö ira matua moroi ba ngaʼötö Gaʼaroni, moroi ba mado Lewi. Sanolo yaʼira yaʼia daʼö ira matua tanö böʼö moroi ba mado Lewi. Me ibörögö moguna mbuʼusa li si bohou, iraono Gizaraʼeli ba wamati zi tobali ere, ba Yesu Keriso zi tobali Ere Sebua.—2Mo 28:41; Heb 9:24; Fam 5:10.

• Ere sebua.

  Moloʼö Oroisa Moze, daʼa gere siföföna si tobali salahi nono mbanua Lowalangi ba samaigi-maigi halöwö gere tanö böʼö. Lafotöi göi ira ”kafalo gere”. (2Ng 26:20; Esr 7:5) Ha yaʼia zi tola möi ba Nahia Wondrege Niʼamoniʼö, yaʼia daʼö bateʼe tanö bakha si so ba nose Lowalangi hegöi ba gosali ba gafuriata. Ha sakali ba zi döfi tola möi ia ba nahia andrö yaʼia daʼö ba Ngaluo Wangatulö. Ngawua wehede ”ere sebua” manandrösa göi khö Yesu Keriso.​—3Mo 16:​2, 17; 21:10; Mat 26:3; Heb 4:​14.

• Etani.

  Töi mbaŵa si 7 ba zura mbaŵa agama niha Yahudi, baŵa siföföna ba zura mbaŵa si toʼölö laʼogunaʼö niha Yahudi. Tefaudu aekhu ia ba dalu mbaŵa si Siwa irugi talu mbaŵa si Fulu. Me no mangawuli niha Yahudi moroi ba Mbabilona, lafotöi mbaŵa daʼa Tisiri. (1Ra 8:2)​—Faigi Lamp. B15.

• Eu famotokhi ba dödö si sökhi ba si lö sökhi.

  Eu si so ba Kabu Edena, niʼogunaʼö Lowalangi ba woʼamaedolagö wa yaʼia zinangea motatugöi hadia ’zi sökhi’ hegöi ”si lö sökhi” ba niha gulidanö.​—1Mo 2:​9, 17.

• Eu fangorifi.

  Eu si so ba Kabu Edena. Lö itutunö Sura Niʼamoniʼö wa so wangorifi ba mbuania. Hizaʼi, daʼö geu soʼamaedolagö wa hasambalö ibeʼe waʼauri si lö aetu Lowalangi ba niha si manga buania.​—1Mo 2:9; 3:​22.

• Ewali Nifosagö khö Zelomo.

  Lala si so ba gosali ba götö Yesu, tanö ba gatumbukha golayama tanö baero. No mufosagö yawania, ba si toʼölönia lafotöi ia si toröi moroi ba gosali Zelomo. Mowaö-waö Yesu ba daʼö me inötö ”mbaŵa deu” ba owulo niha Keriso ba daʼö  ba wamosumange Lowalangi. (Yoh 10:​22, 23; Hal 5:​12)​—Faigi Lamp. B11.

F

• Faʼabu dödö.

  Faʼabu dödö börö waʼamate mazui börö wamakao tanö böʼö. Ba götö Zura Niʼamoniʼö, faʼabu dödö tola manö ara lua-luania. Baero wege-ege sabölö-bölö, laʼogunaʼö nukha si no muhenaigö, labeʼe gawu ba högöra, lasika nukhara, ba laböbözi dötöʼara. Itaria lakaoni tuka zangeʼesi ba ginötö lakoʼo zi mate.​—1Mo 23:2; Est 4:3; Fam 21:4.

• Faʼasökhi dödö sebua.

  Eluaha siföföna moroi ba li Yunani yaʼia daʼö hadia ia zomasi ita ba sahöli dödöda. Asese muʼogunaʼö ngawua wehede daʼa ba mbuala nibeʼe börö waʼasökhi dödö. Na daʼö nitutunö sanandrösa ba waʼasökhi dödö sebua moroi khö Lowalangi, eluaha ngawua wehede daʼa yaʼia mbuala Lowalangi nibeʼenia börö waʼoböwönia ba lö iʼandrö zulö. Fehede andrö zangoromaʼö bualania si no fahöna hegöi faʼomasi ba faʼasökhi dödönia sebua ba niha gulidanö. Ba li Yunani mufoʼeluaha göi faoma fehede tanö böʼö simane ”fanolo” ba ”buala moroi ba waʼasökhi dödö”. Eluahania, wa labeʼe mbuala andrö tenga börö me sinangea itema ia si samösa niha tobali sulö, hizaʼi börö waʼoböwö zamuala andrö.​—2Ko 6:1; Ef 1:7.

• Faʼatulö.

  Ba Mbuku Niʼamoniʼö, eluahania satulö moloʼö goi-goi Lowalangi sanandrösa ba zindruhu hegöi si fasala.​—1Mo 15:6; 5Mo 6:​25; Amd 11:4; Zef 2:3; Mat 6:​33.

• Faʼomasi si lö faröi.

  Asese mufoʼeluaha moroi ba li Heberaiʼo khesedh, yaʼia daʼö faʼomasi niforomaʼö börö mbuʼusa li, faʼalöfaröi, faʼaduhu hegöi famaböbö saro. Asese muʼogunaʼö ngawua wehede daʼa ba wangoromaʼö faʼomasi Lowalangi ba niha, ba faʼomasi daʼa tola göi ifalua niha ba nawönia niha.​—2Mo 34:6; Rut 3:​10.

• Fakelemusa.

  Moʼamakhaita daʼa ba nifaduhusi tödö, wa auri nasa noso niha si no mate hewaʼae no mate mbotonia, sindruhu-ndruhu wa tola fahuhuo ira ba niha sauri, mendrua manö na so dohu danga (sogaoni bekhu zi mate) si tola fahuhuo khöra ba waʼalio. Fehede ”fakelemusa” ba li Yunani yaʼia daʼö farmakia, eluahania ”la-bius”. Moʼamakhaita daʼa ba wakelemusa börö me muʼogunaʼö dalu-dalu ba wo-bius me mböröta, na laʼandrö waʼabölö moroi ba mbekhu zi mate ba wamalua elemu.​—Gal 5:​20; Fam 21:8.

• Famaʼeleʼö.

  Turia niʼehehaini moroi khö Lowalangi, ösinia angombakhata mazui fehede sanandrösa ba gohitö dödönia. Mufaʼema ia si tobali famahaʼö moroi khö Lowalangi sanandrösa ba zi sökhi, oroisa mazui fanguhuku hegöi angombakhata sanandrösa ba zi so miföna.​—Hez 37:​9, 10; Dan 9:​24; Mat 13:14; 2Fe 1:​20, 21.

• Famaduhuʼö.

  ”Famaduhuʼö” (na ebua hurufo si oföna) eluahania Si Fulu Oroisa nisura ba gara nibeʼe khö Moze.​—2Mo 31:18.

• Famakao sabölö-bölö.

  ”Famakao sabölö-bölö” ba li Yunani eluahania famalangögö mazui famakao börö gabula dödö sebua. Fahuhuo Yesu sanandrösa ba ”wamakao sabölö-bölö” si lö irai alua, sedöna alua ba mbanua Yeruzalema hegöi famakao si lö ara tö alua ba niha fefu ba ’ginötö tohare ia si fao lakhömi sebua’. (Mat 24:​21, 29-​31) Itutunö Faulo wa no satulö Lowalangi andrö na ilau mbalö ba ”niha si lö faʼaboto ba dödö khö Lowalangi hegöi si lö moloʼö turia somuso dödö” sanandrösa khö Yesu Keriso. Iʼombakhaʼö khöda ba Wamaʼeleʼö 19 wa Yesu andrö zondröniaʼö ira saradadu ba zorugo ba wolawa ’urifö samuʼi, razo-razo ba gulidanö awö zaradadura’. (2Te 1:​6-8; Fam 19:​11-​21) So göi ”ngawawa sato sibai” niʼorifi moroi ba wamakao  sabölö-bölö. (Fam 7:​9, 14)​—Faigi HAMAGEDO.

• Famalalini era-era.

  Ba Zura Niʼamoniʼö, eluahania mamulöʼö lala wangera-ngera, maniasa ia soroi ba dödö börö lala waʼaurinia si fasala, me no ifalua zala, mazui börö me lö ifalua hadia zinangeania. Na so niha si no mamalalini era-era, iforomaʼö daʼö ba gamuatania ba ibulöʼö lala waʼaurinia.​—Mat 3:8; Hal 3:​19; 2Fe 3:9.

• Famatörö Lowalangi.

  Si oföna sibai manandrösa wehede daʼa khö Lowalangi fondrege zalawa, niforomaʼönia ba wamatörö Nononia, Keriso Yesu.​—Mat 12:28; Luk 4:​43; 1Ko 15:50.

• Famayagö idanö.

  Famayagö idanö eluahania ”mangöhöndrögö”, mazui lalömö ba nidanö. Iʼandrö Yesu enaʼö fefu zoloʼö khönia labayagö ira idanö. Ba Zura Niʼamoniʼö, so nifotöi famayagö idanö nifalua Yohane, famayagö faoma eheha niʼamoniʼö, faoma alitö, ba tanö böʼönia.​—Mat 3:​11, 16; 28:19; Yoh 3:​23; 1Fe 3:​21.

• Famosumange Lowalangi soroi ba dödö.

  Eluahania famosumange, fangalulu, ba fangai halöwö khö Lowalangi Yehowa, ba lö faröi ba wotuhini halöwö Lowalangi me yaʼia Zamatörö fondrege zalawa.​—1Ti 4:8; 2Ti 3:​12.

• Famotandro.

  Mufalemba daʼa ba muʼogunaʼö si tobali tandra wa so zokhö, tandra wa sindruhu, mazui tandra wahasara dödö (si toʼölönia ba dambu laʼuri mazui ba lili). Me föna, tefazökhi ia moroi ba gama-gama sabeʼe (simane kara, ifö gaza, mazui eu) ba lafoe hurufonia mazui labaliʼö wogambaraini yaʼia. Ngawua wehede famotandro muʼogunaʼö tobali tandra wa sindruhu, tandra wa so zokhö mazui ba wangoromaʼö wa no mubiniʼö hadia ia moroi ba danö böʼö.​—2Mo 28:​1, nis.; Neh 9:​38; Fam 5:1; 9:4.

• Famunu galitö.

  Fakake niʼogunaʼö ba nose Lowalangi hegöi ba gosali, nifazökhi moroi ba ganaʼa mazui tembaga. Famazökhi yaʼia hulö guti ba muʼogunaʼö ba wanaba tali wandru.​—2Ra 25:14.

• Fangatulö.

  Ba Mbuku Niʼamoniʼö Heberaiʼo, mubeʼe zumange fangatulö enaʼö tola ahatö niha khö Lowalangi ba lafosumange ia. Moloʼö Oroisa Moze, mendrua manö ba Ngaluo Wangatulö ero röfi, mubeʼe zumange andrö ba wangatulöʼö si samösa niha mazui soi khö Lowalangi, hewaʼae no lafalua horö. Sumange daʼa fefu zi no amaedola zumange nibeʼe Yesu ba wangefaʼö horö niha sakali ba zi sagötö faʼara, irege tebeʼe ginötö ba niha enaʼö atulö ira khö Yehowa.​—3Mo 5:​10; 23:28; Kol 1:​20; Heb 9:​12.

• Fangelifi.

  Mangelifi eluahania angandröwa enaʼö alua zi lö sökhi ba niha mazui ba danö böʼö. Fangelifi faböʼö ira walelesa mazui fehede si lö sökhi. Fangelifi andrö si toʼölönia fehede famaduhuʼö ba wangombakha mazui ba wanahö hadia zi lö sökhi sedöna alua. Na Lowalangi zamaʼema daʼa mazui niha si so faʼabölö, tola muwaʼö wa fangelifi daʼö amaedola wamaʼeleʼö si lö tola löʼö alua.​—1Mo 12:3; 4Mo 22:12; Gal 3:​10.

• Fangöhöna.

  Ngaluo fatua lö luo Sabato, mangöhöna niha Yahudi soguna khöra ba ngaluo Sabato. Afuriata ngaluo andrö yaʼia daʼö na aekhu luo ba ngaluo nifotöi iadaʼa hari Zumaha, me tebörögö luo Sabato. Ba niha Yahudi, si sahari andrö tebörögö iʼotarai me aekhu luo irugi aekhu luo zui.—Mrk 15:42; Luk 23:54.

• Fangöna.

  Fakake wasuwöta niʼogunaʼö zaradadu, simane takula siʼöli, baru siʼöli, böbö löwi, badagahe hegöi baluse.​—1Sa 31:9; Ef 6:​13-​17.

• Fangowalu khö lakha.

  Si toʼölö mufalua, ba gafuriata labeʼe ba Goroisa Moze, yaʼia daʼö si samösa ira matua sangai foʼomo dalifusönia si lö ono matua,  enaʼö so zanohugö ngaʼötö dalifusönia andrö.​—1Mo 38:8; 5Mo 25:5.

• Fanufa högö.

  Latufa högö zi samösa niha na lafataro ia ba wangai halöwö, ba wanema howu-howu, ba wamadöhö mazui ba wameʼe khönia eheha niʼamoniʼö. Itaria latufa göi högö gurifö fatua lö labeʼe ia tobali sumange.​—2Mo 29:15; 4Mo 27:18; Hal 19:6; 1Ti 5:​22, nis.

• Fanusugi.

  Femaoso moroi ba waʼamate. Ngawua wehede anastasis ba li Yunani eluahania ”maoso; mosindro”. So dasiwa nisusugi nidunö-dunö ba Zura Niʼamoniʼö, farahu ba daʼö me isusugi Yesu Lowalangi Yehowa. Hewaʼae Elia, Elisa, Yesu, Fetero, ba Faulo, no irai lasusugi zi no mate, hizaʼi alua fefu dandra sahöli-höli dödö andrö börö waʼabölö moroi khö Lowalangi. Moguna tesusugi niha si no mate ba gulidanö andre, ”he satulö he si lö atulö” enaʼö alua gohitö dödö Lowalangi. (Hal 24:15) Itutunö göi Sura Niʼamoniʼö wa so wanusugi sauri ba zorugo, nifotöi fanusugi ’si oföna’ mazui femaoso ”siföföna”. Alua daʼa khö ndra talifusö Yesu nibayoini faoma eheha niʼamoniʼö.​—Fil 3:11; Fam 20:​5, 6; Yoh 5:​28, 29; 11:25.

• Faraʼo.

  Amalalata döi khö ndra razo-razo Miserai. So dalima waraʼo nitötöi ba Zura Niʼamoniʼö (Sizaki, Sewe, Tirihaka, Nekho ba Hofera), ba tanö böʼönia lö mutötöi döira, simane faraʼo ba götö Gaberahamo, Moze, ba Yosefo.​—2Mo 15:4; Rom 9:17.

• Faradaiso.

  Kabu si sökhi sibai. Kabu si oföna ifazökhi Yehowa ba niha siföföna töinia Kabu Edena. Me fahuhuo Yesu ba niha si lö sökhi si so ba zingania ba döla geu famakao, iʼombakhaʼö wa tobali faradaiso gulidanö andre dania. Ba 2 Korindro 12:​4, faradaiso niwaʼönia yaʼia daʼö faradaiso ba zi so föna, ba Wamaʼeleʼö 2:​7, faradaiso ba zorugo.​—SS 4:13; Luk 23:43.

• Farizaiʼo.

  Agama niha Yahudi (Yudaisme) si tehöngö me döfi siföföna M. Tenga ngaʼötö gere ira, hizaʼi lahaogö laʼosisiʼö wamalua Oroisa Moze iʼotarai ba wondrege zide-ide, ba simane foloʼöra Oroisa Moze, simane daʼö göi woloʼöra si toʼölö lafalua ira tuara me föna hewaʼae lö si tesura ia. (Mat 23:23) Lö adöni dödöra ba wamalua si toʼölö lafalua ira niha Yunani, ba ebua kuasora ba niha mbanua börö me onekhe ira ba Goroisa Moze hegöi ba zi toʼölö lafalua ira tuara. (Mat 23:​2-6) So göi Warizaiʼo si tobali Sangetuʼö Huku. Asese fadaʼawa ira khö Yesu ba wamalua Sabato, sasese lafalua ira tuara, ba fariawösa ba niha sebua horö hegöi sanema pajak. So göi zi tobali niha Keriso simane Saulo moroi ba Dareso.​—Mat 9:11; 12:14; Mrk 7:5; Luk 6:2; Hal 26:5.

• Fasa.

  Owasa nifalua ero röfi na 14 Abibi (ba gafuriata lafotöi ia Nisana) ba wanörö tödö fangefaʼö ndraono Gizaraʼeli moroi ba danö Miserai. Na laʼowasaini daʼa, lataba ba latunu nono mbiri-biri (mazui nambi), aefa daʼö laʼa faoma sayu safeto ba roti si lö mufaruka ragi.​—2Mo 12:27; Yoh 6:4; 1Ko 5:7.

• Feʼaso.

  Ba zi hauga faosatö Mbuku Niʼamoniʼö Yunani Niha Keriso, eluaha ngawua wehede daʼa yaʼia daʼö feʼaso Yesu Keriso tobali razo, iʼotarai me lafataro ia tobali Razo ba Wamatörö Lowalangi irugi ngaluo safuria ba götö daʼa. Feʼaso Keriso tenga ha ba zi sabata. Tenga ha asala tohare ia aefa daʼö mofanö. Hizaʼi, tohare ia sagötö zi no mutatugöi.—Mat 24:3.

• Fendrakose.

  Owasa si dua moroi ba zi tölu owasa siföföna, ba lö tola löʼö fao ndra matua niha Yahudi wangowasaini daʼa ba Yeruzalema. Ngawua wehede Fendrakose eluahania ”(Ngaluo) si Lima Wulu”. Muʼogunaʼö ia ba Mbuku Niʼamoniʼö Yunani Niha Keriso ba eluahania Owasa ba Wamasi mazui Owasa Ero Migu ba Mbuku Niʼamoniʼö  Heberaiʼo. Owasa andre tefalua ia ba ngaluo si 50, laʼerai iʼotarai me 16 Nisana.—2Mo 23:16; 34:22; Hal 2:1.

• Feresia.

  Soi hegöi niha Weresia, asese mufaogö wanötöi yaʼia ba Media, ba oi zara moʼamakhaita. Ba wamobörö, toröi niha Weresia andre ha ba danö sohili ba mbanua Iran tanö raya gaekhula. Hizaʼi, ba wamatörö Giro Sebua (moloʼö ahli sejarah, amania niha Weresia, inania niha Media), niha Weresia zamatörö niha Media hewaʼae yaʼira andre so ba zi sambua famatörö. Möna Giro ba wolawa Famatörö Mbabilonia me döfi 539 SM ba itehegö mangawuli ba mbanuara niha Yahudi niʼoloiʼö. Mamatörö Weresia iʼotarai Nungo Nidanö Indus tanö ba gatumbukha ofeta ba Nasi Aegea tanö ba gaekhula. Niha Weresia zamatörö niha Yahudi ofeta tohare Aleksander Agung ba wokalaisi Feresia me döfi 331 SM. Fatua lö daʼö, no itema Danieli gangilata sanandrösa ba Wamatörö Weresia, ba mutötöi göi ia ba mbuku Gesera, Nehemia hegöi Esitera ba Zura Niʼamoniʼö. (Esr 1:1; Dan 5:28; 8:20)​—Faigi Lamp. B5.

• Filisiti.

  Banua si so tanö raya Gizaraʼeli ba gafuriata mufotöi ia banua Wilisiti, niha si findra moroi ba Gereta si toröi ba daʼö mufotöi ira niha Wilisiti. Kala ira ibeʼe Dawido, hizaʼi lö tebulö tobali sambua amatöröwa ira ba tobali udu ndraono Gizaraʼeli. (2Mo 13:17; 1Sa 17:4; Amo 9:7)​—Faigi Lamp. B4.

• Fökhö waba.

  Fefu wökhö salio fatöfa ba niha ba si möi famunu, si göna ba zi sambua banua sebua. Fökhö daʼa asese moʼamakhaita ia ba wanguhuku moroi khö Lowalangi.​—4Mo 14:12; Hez 38:​22, 23; Amo 4:​10.

• Fökhö zinanö.

  Fefu ngawalö wökhö zinanö niʼasogö hama, sanisiö idanö hegöi ö si numalö ba döla geu. So zangumaʼö wa fökhö zinanö nitötöi ba Zura Niʼamoniʼö yaʼia daʼö fökhö howu saitö (Puccinia graminis).​—1Ra 8:​37.

• Foʼomo ba döi.

  Foʼomo si samösa tö, si toʼölönia sawuyu ira alawe.​—2Mo 21:8; 2Sa 5:​13; 1Ra 11:3.

• Fohorö.

  Moroi ba li Yunani porneia. Muʼogunaʼö ngawua wehede daʼa ba Zura Niʼamoniʼö ba wanutunö sanandrösa ba waʼorudu si fasala föna Lowalangi, simane faʼorudu ba zi tenga foʼomonia, fohorö-horö, faʼorudu nifalua zi darua niha si lö sangowalu, faʼorudu ndra matua khö ndra matua ba faʼorudu ndra alawe khö ndra alawe hegöi faʼorudu niha ba gurifö (bestialitas). Ba mbuku Wamaʼeleʼö, orahua agama nifotöi ”Babilona Sebua” muʼamaedolagö ia simane sohorö-horö börö me fahuwu ia khö ndra samatörö ba gulidanö daʼa, ha enaʼö tebeʼe khönia kuaso ba faʼakayo. (Fam 14:8; 17:2; 18:3; Mat 5:​32; Hal 15:29; Gal 5:​19)​—Faigi SOHORÖ-HORÖ.

• Folazi tali wandru.

  Folazi nifazökhi moroi ba ganaʼa, niʼogunaʼö ba nose Lowalangi hegöi ba gosali ba wamunu fandru.​—2Mo 37:23.

• Fombayoini.

  Ba li Heberaiʼo eluahania ”mamaguleʼö”. Mufagule wanikha ba niha mazui ba gama-gama nifasafi börö zi sambua ohitö dödö. Ba Mbuku Yunani Niha Keriso, muʼogunaʼö göi ngawua wehede daʼa na mufaduwa geheha niʼamoniʼö ba niha nifili sauri ba zorugo.​—2Mo 28:41; 1Sa 16:13; 2Ng 1:​21.

• Fondröi sindruhu.

  Ba li Yunani eluahania ”ifandröndröu ia wezizio”. Fondröi sindruhu (apostasia) eluahania ”fangerogö, fangosiwawöi mazui folawa”. Ba Mbuku Niʼamoniʼö Yunani Niha Keriso, ”fondröi sindruhu” asese lawaʼö ia ba niha si no mangerogö famosumange sindruhu.​—Amd 11:9; Hal 21:21; 2Te 2:3.

• Fuasö.

  Tebai muʼa gofu hadia ia sagötö zi no mutatugöi. Fuasö ndraono Gizaraʼeli ba Ngaluo Wangatulö, na inötö tosasa hegöi na laʼalui wanuturu lala moroi khö Lowalangi. Öfa kali fuasö niha Yahudi ba zi döfi ba wanörö tödö  si lö sökhi salua khöra. Lö muʼandrö ba niha Keriso ba wamalua fuasö.​—Esr 8:​21; Yes 58:6; Luk 18:12.

• Furimi.

  Owasa ero röfi nifalua ero 14-15 Adara, ba wanörö tödö me teʼefaʼö niha Yahudi moroi ba wangohori, salua ba götö Ratu Esitera. Ngawua wehede furimi (tenga li Heberaiʼo) eluahania ”dahö-dahö”. Owasa daʼa mufotöi ia Owasa Wurimi mazui Owasa Dahö-Dahö, börö me ifazaumba Wuri (mazui Dahö-dahö) Hamano ba wotatugöi ngaluo wamaluania ohitö dödönia ba wangohori niha Yahudi.​—Est 3:7; 9:​26.

G

• Gade.

  Gama-gama nibeʼe niha samiza ba niha sameʼe nifiza, si tobali weʼe-weʼe dödö wa hasambalö mubuʼa woʼomö andrö. No izara-zara wanutunö Oroisa Moze sanandrösa ba gade, ba wolumöʼö niha si numana hegöi niha si lö faʼabölö ba gotalua ndraono Gizaraʼeli.

• Gaitiofia.

  Soi si no so mböröta tanö raya Miserai. Tefarahu mbanuania ba wondrege tanö raya Miserai iadaʼa, ba matonga mbanua tanö yöu Sudan iadaʼa. Itaria laʼogunaʼö ngawua wehede daʼa ba li Heberaiʼo ”Kusi”.​—Est 1:1.

• Gama-gama nirabu.

  Gama-gama sebua böli mazui urifö nirabu moroi ba nudu si kala.​—Yos 7:​21; 22:8; Heb 7:4.

• Gaötö.

  Naha niʼogunaʼö ba wanunu simo mazui ba wangombuyuʼö siʼöli; laʼogunaʼö göi ba wanunu bowoa tanö hegöi gama-gama nifazökhi moroi ba mara-mara. Ba götö Zura Niʼamoniʼö, gaötö daʼa lafazökhi ia moroi ba batu bata mazui kara. Gaötö niʼogunaʼö ba wanunu bowoa tanö, mara-mara hegöi betua lafotöi ia farikhi mazui tugawa.​—1Mo 15:17; Dan 3:​17; Fam 9:2.

• Gehena.

  Ba li Yunani, Daso Hinomo. Daso daʼa so ia tanö raya Yeruzalema me föna ba so göi ia tanö raya gaekhula. (Yer 7:​31) Ba wamaʼeleʼö, daso daʼa lafotöi ia nahia niha si mate sato sibai. (Yer 7:​32; 19:6) Lö hadöi tandra sangoromaʼö wa urifö mazui niha nitiboʼö ba Gehena andre latunu auri ira ba galitö mazui lafakao. Nahia daʼa lö laʼamaedolagö ia tobali nahia si tola mamakao faʼauri niha ba galitö sagötö faʼara. Hizaʼi, Yesu hegöi ira nifahaʼönia lafoʼamaedolagö Gehena andre fanguhuku sagötö faʼara yaʼia daʼö ”faʼamate si mendrua”, eluahania faʼatekiko sagötö faʼara.​—Fam 20:14; Mat 5:​22; 10:28.

• Gera.

  Fanuʼa waʼabua fagölö ira 0,57 g (0,01835 ons troy), mazui 1/20 syekel. (3Mo 27:25)​—Faigi Lamp. B14.

• Gileadi.

  Sindruhunia, daʼa mbanua satabö sinanö ba zi tambai gatumbukha Nungo Nidanö Yoridano si numalö tanö yöu hegöi tanö raya Ndraso Yaboko. Hizaʼi itaria daʼö geluahania, fefu danö Gizaraʼeli ba zi tambai gatumbukha Nungo Nidanö Yoridano, yaʼia daʼö nahia waʼatoröi mado Rubeno, mado Gado, ba matonga mado Manase. (4Mo 32:1; Yos 12:2; 2Ra 10:33)​—Faigi Lamp. B4.

• Giti.

  Daʼa gamalalata döi musik si lö muʼila mutatugöi, hizaʼi te moroi ba li Heberaiʼo gath. So ösa zangumaʼö wa eluahania daʼa melodi zinunö sanandrösa ba wamazökhi agu nibadu, börö me eluaha gath yaʼia daʼö naha wamera agu.​—Si 81:Sup.

• Gölu-gölu zura.

  Ngaʼörö garate sanau nifazökhi moroi ba guli gurifö mazui töla zukhu. Tanö bakha ba gölu-gölu zura andrö tesöndra fefu zi no musura ba si toʼölönia no lagölugö ba ziʼo. Lasura Mbuku Niʼamoniʼö ba lasali ba gölu-gölu zura daʼa. Daʼa mbuku si toʼölö laʼogunaʼö me lasura Zura Niʼamoniʼö.​—Yer 36:​4, 18, 23; Luk 4:​17-​20; 2Ti 4:​13.

• Götö; Ulidanö.

  Ba li Yunani aion. Eluahania salua ba ginötö hadia ia, samaehusi götö daʼö moroi ba danö böʼö. Muʼogunaʼö ngawua wehede ”götö daʼa” ba Zura Niʼamoniʼö ba wangoromaʼö  hewisa zi no toʼölö alua ba gulidanö andre awö lala nitörönia. (2Ti 4:​10) Me ibörögö muʼogunaʼö wawuʼusa li ba Goroisa Moze, ifazökhi götö si bohou Lowalangi, si tola mufotöi götö ndraono Gizaraʼeli mazui götö niha Yahudi. Me tobali höli Yesu Keriso, iʼogunaʼö ia Lowalangi ba wangehaogö götö tanö böʼö, farahu ba daʼö niha Keriso nibayoini. Daʼa wamobörö faʼalua götö si bohou irege alua hadia zi no muʼamaedolagö wawuʼusa li ba Goroisa Moze.​—Mat 24:3; Mrk 4:​19; Rom 12:2; 1Ko 10:11.

H

• Hades.

  Ngawua wehede li Yunani si fagölö eluaha ba li Heberaiʼo ”Syeol”. Lafoʼeluaha wehede andre tobali ”Lewatö” (ebua hurufo si oföna) ba wangoromaʼö wa manandrösa daʼa ba lewatö niha sato.​—Faigi LEWATÖ.

• Halöwö niʼamoniʼö.

  Mufotöi ia halöwö niʼamoniʼö börö me moʼamakhaita ia ba wamosumange Lowalangi.​—Rom 12:1; Fam 7:​15.

• Hamagedo.

  Ba li Heberaiʼo, Har Meghiddohn eluahania ”Hili Megido”. Muʼogunaʼö wehede daʼa ba ”ngaluo wasuwöta sebua moroi khö Lowalangi Fondrege Zabölö” ba ginötö owulo ”razo-razo ba zi sagörö ulidanö” ba wolawa Yehowa. (Fam 16:​14, 16; 19:​11-​21)​—Faigi FAMAKAO SABÖLÖ-BÖLÖ.

• Heberaiʼo.

  Khö Gaberamo (Aberahamo) zi oföna sibai lafanandrösa döi daʼa, samaböʼöni yaʼia ba ndraono Gamori si so ba zi fasuinia. Ba gafuriata, lafanandrösa wehede daʼa ba ngaʼötö Gaberahamo moroi khö maʼuwunia Yakobo, simanö göi li niʼogunaʼöra. Ba götö Yesu, oya ngawua wehede moroi ba li Garamo niʼogunaʼö ba li Heberaiʼo, ba iʼogunaʼö li daʼa Yesu hegöi ira nifahaʼönia.​—1Mo 14:13; 2Mo 5:3; Hal 26:14.

• Heremesi.

  Daʼa lowalangi niha Yunani, ono Zeo. Lawalingagö Faulo andrö Heremesi me möi ia ba mbanua Lisitera, börö me lawaʼö wa daʼa lowalangi nifatenge ndra lowalangi, ba daʼa göi lowalangi sonekhe fahuhuo.​—Hal 14:12.

• Herode.

  Mado ndra razo nifataro Roma ba wamatörö niha Yahudi. Tehöngö Herode Sebua börö me ifuli ifazökhi gosali ba Yeruzalema ba ibeʼe goroisa ba wangohori iraono side-ide, ohitö dödönia yaʼia daʼö ba wamunu Yesu. (Mat 2:​16; Luk 1:5) Lafataro Herode Arikhelao hegöi Herode Atifasi, ono Herode Sebua, ba wamatörö si hauga banua tana khö namara. (Mat 2:​22) Atifasi andrö gubernur sasese lafotöi ”Razo”, yaʼia zamatörö me ifalua halöwö fanuriaigö Keriso ba zi tölu fakhe a matonga irugi ba götö nitutunö ba zura Halöwö Zinenge faza 12. (Mrk 6:​14-​17; Luk 3:​1, 19, 20; 13:​31, 32; 23:​6-​15; Hal 4:​27; 13:1) Aefa daʼö, lö arara wamatörö Herode Agerifa I, maʼuwu Herode Sebua, ihuku ia malaʼika Lowalangi irege mate. (Hal 12:​1-6, 18-​23) Ba ibörögö mamatörö nononia sotöi Herode Agerifa II irugi me mamadaö niha Yahudi ba Roma.​—Hal 23:35; 25:​13, 22-​27; 26:​1, 2, 19-​32.

• Higayono.

  Daʼa ngawua wehede niʼogunaʼö ba wondröniaʼö musik. Simane ba Zinunö 9:​16, muʼogunaʼö ngawua wehede daʼa te ba wangoromaʼö wa mufaböʼö-böʼöni wamoli harafa, so niʼide-ideʼö wamoli mazui mubatogö enaʼö tefaudu ba woʼangerönusi.

• Hili Libano.

  Sambua moroi ba gotalua hili si so ba danö Libano. Hili Libano tefaudu so ia tanö ba gaekhula, ba Hili Ati-Libano tanö ba gatumbukha. Hili si dombua andre so ba gotaluania ndraso sebolo satabö sinanö. Alawa sibai Hili Libano si no falawa-lawa ba zinga Nasi Mediterania, ba faʼalawa zuzu hilinia 1.800 irugi 2.100 m (6.000 irugi 7.000 kaki). Me götö föna, afönu Libano andre eu eresi si baga-baga, ba ebua sibai mböli geu daʼö ba wamaigi soi si fasui yaʼia. (5Mo 1:7; Si 29:6; 92:12)​—Faigi Lamp. B7.

•  Hili-Hili.

  Ba li Heberaiʼo, ”Milo” eluahania ”tanö nitimbu”. Na mufoʼeluaha ia ba Septuaginta ”öli wangiröʼö”. Hulö geografik mazui struktural si so ba Mbanua Dawido, hizaʼi lö muʼila mutatugöi zindruhunia.​—2Sa 5:9; 1Ra 11:27.

• Hin.

  Naha hegöi suʼa-suʼa niʼogunaʼö ba wanuʼa idanö, fagölö ira zi 3,67 L (7,75 pint AS). (2Mo 29:40)​—Faigi Lamp. B14.

• Hiso.

  Tanömö niʼogunaʼö ba wanefeʼö do mazui idanö ba gowasa fangehao. Baga sibai ndraha hegöi bulunia. Tanömö andre te Origanum maru ba Origanum syriacum. Tanömö hiso nitutunö ba Yohane 19:​29, te tanömö salio tedou ba salawa. Andrö wa tola muʼogunaʼö ndrahania ba wangoroʼö agu saisö ba mbawa Yesu.​—2Mo 12:22; Si 51:7.

• Höli.

  Nibuʼa ba wangefaʼö niha moroi ba wangosawuyu, hukuma, famakao, horö, mazui ba zi no tobali noro dödönia. Tenga ha kefe niʼogunaʼö ba daʼa. (Yes 43:3) Moguna höli ba ngawalö zalua. Duma-dumania, okhöta Yehowa fefu nono matua siaʼa mazui urifö si matua ba ndraono Gizaraʼeli. Börö daʼö, moguna muhöli mazui musanu ira enaʼö tola lafosumange Yehowa. (4Mo 3:​45, 46; 18:​15, 16) Na so zawi samuʼi si lö mukuru ba ibunu niha, hasambalö ibuʼa höli sokhö yaʼia enaʼö lö labeʼe khönia hukuma faʼamate simane si no mutatugöi ba goroisa. (2Mo 21:​29, 30) Hizaʼi, lö lahöli niha sangodödögö mamunu awönia. (4Mo 35:31) Höli sabölö moguna ba Zura Niʼamoniʼö yaʼia daʼö höli nibuʼa Keriso, yaʼia me ilulu waʼaurinia ba wangefaʼö niha samati moroi ba horö ba faʼamate.​—Si 49:​7, 8; Mat 20:28; Ef 1:7.

• Hölu.

  Fehede si tola mangaʼaroʼö sindruhu, mazui buʼusa li soroi ba dödö ba wamalua hadia ia mazui lö mufalua. Si toʼölönia, möi ba hölu niha khö zabölö alawa moroi khönia simane khö Lowalangi. Fahölu Yehowa ba wangaʼaroʼö buʼusa linia khö Gaberahamo.​—1Mo 14:22; Heb 6:​16, 17.

• Homer.

  Suʼa-suʼa niʼogunaʼö ba wanuʼa soköli, fagölö ira zuʼa-suʼa kor. Moloʼö suʼa-suʼa bat, sambua homer fagölö ira zi 220 L (200 kuart kering AS). (3Mo 27:16)​—Faigi Lamp. B14.

• Horebi; Hili Horebi.

  Banua si so ba hili ba zi fasui Hili Zinaʼi. Töinia tanö böʼö Hili Sinaʼi. (2Mo 3:1; 5Mo 5:2)​—Faigi Lamp. B3.

I

• Iliriku.

  Provinsi Romawi tanö yöu gaekhula Yunani. No ofeta Waulo ba provinsi daʼa me itöröi mbanua ba wanuriaigö, hizaʼi lö mututunö hadia no ituriaigö duria somuso dödö ba Giliriku mazui ha asala möi ia ba daʼö. (Rom 15:19)​—Faigi Lamp. B13.

• Izaraʼeli.

  Töi nibeʼe Lowalangi khö Yakobo, ba gafuriatania manandrösa daʼa ba ngaʼötönia sauri ba götö si no mutatugöi. Ngaʼötö moroi ba nono Yakobo si 12 itaria lafotöi ira iraono Gizaraʼeli, banua Gizaraʼeli mazui soi Gizaraʼeli. Labaliʼö göi Gizaraʼeli andre töi wamatörö si fulu mado tanö yöu, si no mamabali yaʼira moroi ba wamatörö tanö raya. Ba gafuriatania, niha Keriso nibayoini lafotöi ira ’iraono Gizaraʼeli khö Lowalangi’.​—Gal 6:​16; 1Mo 32:28; 2Sa 7:​23; Rom 9:6.

K

• Kab.

  Fanuʼa zoköli faʼabuania 1,22 L (1,11 kuart kering AS). Faʼabua zuʼa-suʼa daʼa lafaudugö moloʼö suʼa-suʼa bat. (2Ra 6:​25)​—Faigi Lamp. B14.

• Kafalo gere.

  Töi tanö böʼö khö ”gere sebua” ba Mbuku Niʼamoniʼö Heberaiʼo. Ba Mbuku Niʼamoniʼö Yunani Niha Keriso, nifotöi ”kafalo gere” manandrösa ia ba niha sebua faka ba gotalua ndra ere, te fao ba daʼö zi no irai tobali ere sebua hegöi högö gere si 24 ngawawa.​—2Ng 26:20; Esr 7:5; Mat 2:4; Mrk 8:​31.

•  Kafalo malaʼika.

  Ngawua wehede daʼa ha ba zi samösa tetandrösaigö ia moloʼö Sura Niʼamoniʼö. Eluahania, ha samösa gafalo malaʼika. No tesura döinia ba Zura Niʼamoniʼö yaʼia daʼö Mikhaʼeli.​—Dan 12:1; Yud 9; Fam 12:7.

• Kaisaro.

  Töi nihalö moroi ba mado niha Romawi, yaʼia daʼö ”Caesar”, si tobali töi ba faka khö zamatörö ba Romawi. Töi ba faka andre iʼogunaʼö Auguso, Tiberio, Kalaudio nitötöi ba Zura Niʼamoniʼö, simanö göi Nero hewaʼae lö nitötöi döinia ba Zura Niʼamoniʼö. Ba Mbuku Niʼamoniʼö Yunani Niha Keriso, lafoʼeluaha göi ”Kaisaro” tobali samatörö si sambua banua mazui soi.​—Mrk 12:17; Hal 25:12.

• Kalo.

  Döla-döla geu sotögi-tögi niʼogunaʼö ba wanguhuku niha ba lafasa mbilagu. Itaria ha ahe nikalo, ba so göi daʼö laʼalui lala enaʼö aköu mboto niha nifakaora börö me no lafasa mbilagu ba gahe, ba danga hegöi ba mbagi.​—Yer 20:2; Hal 16:24.

• Kalo mbagi.

  Eu nibeʼe ba galisi niha, ba mbalö faföfö no musaitagö noro, mazui eu hegöi döla-döla geu nifasa ba mbagi gurifö si dua ngaʼeu nifonoro (si toʼölönia ba zawi) na lasöbi fakake wohalöwö ba danö mazui fadati. Börö me asese iʼogunaʼö kalo mbagi andre sawuyu ba wolohe noro sabua, kalo mbagi andrö muʼamaedolagö ia fangosawuyu mazui foloʼö fareta zi samösa niha, famakao ba faʼabu dödö. Na lahalö mazui lafatö galo mbagi, eluahania no teʼefaʼö moroi ba mbilagu, famakao, ba fangosawuyu.​—3Mo 26:13; Mat 11:​29, 30.

• Kanaʼana.

  Maʼuwu Noakhi, ono numero öfa khö Khamo. Ba gafuriata, fefu ngaʼötö Ganaʼana si 11 mado ahori toröi ira ba mbanua gamaudu gatumbukha Nasi Sebolo, ba gotalua Miserai faoma Siria. Lafotöi mbanua daʼö ”tanö Ganaʼana”. (3Mo 18:3; 1Mo 9:​18; Hal 13:19)​—Faigi Lamp. B4.

• Kara wogili.

  Kara sowulo-wulo nibeʼe yawa ba dete nawönia kara sarakhagö fagölö, niʼogunaʼö ba wogili bua zinanö tobali hamo. So döla-döla nibeʼe ba gotalua gara tanö yawa enaʼö tola tefuta. Ba götö Zura Niʼamoniʼö, ato ndra alawe sangogunaʼö fogili daʼa ba nomora. Ero maʼökhö, teʼasogö roti ba zi sambua omo börö gara wogili niʼogunaʼöra. Andrö wa lö mutehegö ba Goroisa Moze na so zangai kara wogili tobali gade. So göi gara wogili sebua si fagölö nifuta gurifö.​—5Mo 24:6; Mrk 9:​42.

• Kara wondrasi.

  Kara nibeʼe ba watalinga nomo ba gamaudu wamahalö dowa enaʼö aro ba teʼosambuaʼö. Kara sabölö moguna yaʼia daʼö kara wondrasi. Si toʼölönia, lafili gara sabeʼe na lafazökhi göli kara mazui omo ba zi sambua banua. Ba wamazökhi ulidanö, hulö no mubeʼe gara wondrasi mazui kara siföföna, ba Yesu zi tobali ”kara wondrasi siföföna” ba mbanua niha Keriso si no amaedola si sambua omo wamati.​—Ef 2:​20; Yob 38:6.

• Keriso.

  Töi ba faka khö Yesu moroi ba li Yunani Khristos, fagölö geluahania ba li Heberaiʼo ”Mesia”, mazui ”Nibayoini”.​—Mat 1:​16; Yoh 1:​41.

• Kerubi.

  Daʼa malaʼika sebua faka si no tebeʼe halöwö si tohude, faböʼö moroi khö zerafi.​—1Mo 3:​24; 2Mo 25:20; Yes 37:16; Heb 9:5.

• Khamosi.

  Lowalangi niha Moabi.​—1Ra 11:33.

• Kisilewi.

  Töi mbaŵa si 9 ba zura mbaŵa agama Yahudi me no aefa mangawuli ira moroi ba Mbabilona, baŵa si 3 ba zura mbaŵa si toʼölö laʼogunaʼö niha Yahudi, aekhu ia ba dalu mbaŵa si Felezara irugi talu mbaŵa si Felendrua. (Neh 1:1; Zak 7:1)​—Faigi Lamp. B15.

• Köfa Darisi.

  Ba wamobörö eluahania köfa si numalö ba Darisi me götö föna (iadaʼa Spanyol). Ba gafuriata, te eluahania köfa segebua si möi ba mbanua sagaröu. Iʼogunaʼö göfa daʼa  Selomo hegöi Yozafati ba wogale.​—1Ra 9:​26; 10:22; 22:48.

• Kor.

  Fanuʼa zoköli hegöi sabasö, faʼabuania 220 L (58,1 galon AS mazui 200 kuart kering AS). Faʼabua daʼa tetatugöi ia moloʼö fanuʼa bat. (1Ra 5:​11)​—Faigi Lamp. B14.

• Koral.

  Kara sabeʼe si so ba nasi, tefaʼanö ia moroi ba döla gurifö si gide-ide ba nasi. Oya sibai laʼa-laʼania, so zoyo, safusi, ba saitö. Oya tesöndra ia ba Nasi Soyo. Ba götö Zura Niʼamoniʼö, ebua sibai mböli koral soyo ba tola mubaliʼö mani-mani mazui gama-gama tanö böʼö.​—Amd 8:​11.

• Kumöyö.

  Gitö soköli moroi ba geu ba moroi ba ngafu ndruʼu sodoi Boswellia. Omuhua sibai na latunu. Kumöyö andrö labaliʼö ia sumange somuhua niʼamoniʼö niʼogunaʼö ba nose Lowalangi hegöi ba gosali. Laʼogunaʼö göi gumöyö ba ginötö labeʼe zumange niʼa ba labeʼe ia ero sambua famalaete roti nibaliʼö sumange ba Nahia Niʼamoniʼö.​—2Mo 30:​34-​36; 3Mo 2:1; 24:7; Mat 2:​11.

• Kurusi wanguhuku.

  Si toʼölönia daʼa panggung ba nahia sato niha, ba no lafazökhi nora weʼamöi yawa. Daʼa dadaoma zamatörö na fahuhuo ia föna niha sato, ba daʼö laʼombakhaʼö hadia gangetulara. Ngawua wehede ”kurusi wanguhuku andrö khö Lowalangi” hegöi ”kurusi wanguhuku khö Keriso”, laʼamaedolagö daʼa ba nifakhoi Yehowa sanandrösa ba wanguhuku niha gulidanö.​—Rom 14:10; 2Ko 5:​10; Yoh 19:13.

L

• Laeduru famotandro.

  Famotandro nibeʼe ba duru mazui ba naya, soʼamaedolagö kuaso zi samösa samatörö mazui sondröniaʼö. Itaria mufotöi ia laeduru si no mufotandro. (1Mo 41:42)​—Faigi FAMOTANDRO.

• Lagö-lagö zumange fangatulö.

  Lagö-lagö dawöla fawuʼusa li. Föna ba daʼa itefe ndro zumange fameta horö ere sebua ba Ngaluo Wangatulö. Ngawua wehede daʼa ba li Heberaiʼo tehalö moroi ba kata kerja, eluahania ”mulagöʼö (horö)” mazui te ”mangeheta (horö)”. Lagö-lagö daʼa tefazökhi moroi ba ganaʼa, ba so darua kerubi ba mbalö faföfö. (2Mo 25:​17-​22; 1Ng 28:11; Heb 9:5)​—Faigi Lamp. B5.

• Lala Zoʼaya.

  Ngawua wehede daʼa muʼogunaʼö ba Mbuku Niʼamoniʼö ba woʼamaedolagö amuata mazui si tefaudu ba si lö tefaudu moloʼö famaigi Yehowa. Niha soloʼö khö Yesu Keriso mufotöi ira göi soloʼö ”Lala Zoʼaya”, börö me laʼoʼö duma-duma Yesu Keriso, ba lafaudugö lala waʼaurira moloʼö famatira khönia.​—Hal 19:9.

• Lepton.

  Ba götö Mbuku Niʼamoniʼö Yunani Niha Keriso, lepton andre kefe loga side-ide ba niha Yahudi, nifazökhi moroi ba tembaga mazui perunggu. So ösa Zura Niʼamoniʼö samoʼeluaha yaʼia tobali ”se”. (Mrk 12:42; Luk 21:2; nis.)​—Faigi Lamp. B14.

• Lewatö.

  Na labörögö faoma hurufo side-ide ba wanura yaʼia, eluahania sambua lewatö. Na labörögö faoma hurufo sebua eluahania nahia niha si no mate, nifoʼeluaha moroi ba li Heberaiʼo ”Syeol” hegöi li Yunani ”Hades”. Ha nifoʼamaedolagö zi dombua fehede andre ba Zura Niʼamoniʼö, ba lö halöwö si tola lafalua ba daʼö ba lö laʼila hadia ia.​—1Mo 47:30; Sango 9:​10; Hal 2:​31.

• Lewi.

  Ono matua numero tölu khö Yakobo, moroi khö woʼomonia Lea. Ba gafuriatania, laʼogunaʼö tobali mado. Ono matua si datölu khö Lewi tobali ira sondröniaʼö ba zi tölu ngawawa si oföna mufotöi ba waʼaʼere Lewi. Ngawua wehede ”niha Lewi” eluahania fefu mado Lewi, hizaʼi lö fao ba daʼö nösi nomo Gaʼaroni si tobali ere. Lö labeʼe ba mado Lewi dana khöra ba Danö Amabuʼula, hizaʼi tebeʼe khöra 48 mbanua si so ba mbanua tanö böʼö.​—5Mo 10:8; 1Ng 6:1; Heb 7:​11.

•  Lewiata.

  Urifö sauri ba nidanö. Ba Yobi 3:8 ba 41:​1, te eluahania buaya mazui urifö sebua ba sabölö sauri ba nasi. Ba Zinunö 104:​26, te eluahania paus. Ba ayati tanö böʼö, urifö daʼa ha nifoʼamaedola irege tebai mutatugöi hadia gurifönia.​—Si 74:14; Yes 27:1.

• Li Garamo.

  Fakhili li Garamo andre ba li Heberaiʼo ba fagölö abjadra. Sangogunaʼö li Garamo ba wamobörö yaʼia daʼö niha Garamo, hizaʼi ba gafuriata laʼogunaʼö ia ba zi sagörö ulidanö, he ba wogale hegöi na fahuhuo ndra samatörö ba mbanua Asiria awö Mbabilonia. Daʼa göi li si no muhonogöi niʼogunaʼö ba wamatörö Weresia. (Esr 4:7) So ösa mbuku Gesera, Yeremia hegöi Danieli nisura ba li daʼa.​—Esr 4:8–​6:​18; 7:12-​26; Yer 10:11; Dan 2:4b–7:​28.

• Lito.

  Suʼa-suʼa waʼanau iʼotarai nuwu duru siaʼa ofeta ba nuwu duru siakhi. Börö me sambua siʼu fagölö ira zi 44,5 cm (17,5 inci), salito fagölö ira zi 22,2 cm (8,75 inci). (2Mo 28:16; 1Sa 17:4)​—Faigi Lamp. B14.

• Lö taʼunö.

  Eluaha ngawua wehede daʼa ba Zura Niʼamoniʼö tenga ha manandrösa ba walötaʼunö mboto, hizaʼi lö tebulö irorogö mazui ifuli iʼehao ia faböi ifalua zala, ba teʼefaʼö ia ba ngawalö hadia ia si tola manaʼunöisi mazui mamakiko yaʼia ba wamati. Moloʼö Oroisa Moze, ngawua wehede daʼö eluahania lö raʼiö.​—3Mo 10:10; Si 51:7; Mat 8:2; 1Ko 6:​11.

• Log.

  Suʼa-suʼa fondrege zide-ide si so ba Zura Niʼamoniʼö ba wanuʼa idanö. Moloʼö Talmud (nisura ba huku niha Yahudi), sambua log fagölö ira zi 1/12 hin. Moloʼö si no mututunö andre, sambua log fagölö ira 0,31 L (0,66 pint As). (3Mo 14:10)​—Faigi Lamp. B14.

• Lowalangi sindruhu.

  Famoʼeluaha moroi ba li Heberaiʼo Ha-Elohim hegöi Ha-El. Bakha ba ayati, kata sandang Ha muʼogunaʼö ba wamaehusi Yehowa, Lowalangi sindruhu si ha sambua, moroi ba lowalangi faya. Ba ayati simane daʼö, muʼogunaʼö wehede ”Lowalangi sindruhu” börö me ba wehede daʼö tefarahu fefu geluahania simane ba li Heberaiʼo.​—1Mo 5:​22, 24; 46:3; 5Mo 4:​39.

• Luo Wangatulö.

  Ngaluo niʼamoniʼö sabölö tohude ba ndraono Gizaraʼeli, ba tola göi lafotöi ia Yom Kippur (moroi ba ngawua wehede li Heberaiʼo yohm hakkippurim, yaʼia daʼö ”ngaluo wondruhö”), nifalua ero 10 Etani. Bakha ba zi döfi, ha ba ngaluo daʼa möi gere sebua bakha ba Nahia Wondrege Niʼamoniʼö ba nose Lowalangi simanö göi ba gosali. Ba daʼö ibeʼe ndro zumange si tobali fameta horönia samösa, horö niha Lewi tanö böʼö hegöi horö niha sato. Daʼa ginötö ba wamalua fuasö ba owulo ira ba wamosumange Lowalangi. Lafotöi ngaluo daʼö sabato irege tebai so zohalöwö.​—3Mo 23:​27, 28.

• Luo Wanguhuku.

  Luo mazui inötö si no itatugöi Lowalangi ba wanguhuku ngawawa, soi mazui fefu niha gulidanö. Ba ngaluo wanguhuku, dozi niʼetuʼö huku famunu hasambalö mate, ba tebeʼe ginötö ba danö böʼö ba wanöndra faʼauri si lö aetu. Itutunö Yesu Keriso hegöi ira sinengenia sanandrösa ba ”Luo Wanguhuku” salua ba zi so miföna, wa fefu niha, he sauri he si no mate, hasambalö latörö wanguhuku.​—Mat 12:36.

M

• Maʼuwu Dawido.

  Asese lawaʼö daʼa khö Yesu. Daʼa zangoromaʼö wa yaʼia Zanema Ondröita wawuʼusa li ba Wamatörö Lowalangi. Moloʼö si no mufaʼeleʼö, yaʼia andre samösa moroi ba gotalua ngaʼötö Dawido.​—Mat 12:23; 21:9.

• Madala.

  Döfi safuria oroma ba gatumbukha fatua lö tumbu luo, tandra wa tohare ngaluo si bohou.​—Fam 22:16; 2Fe 1:​19.

• Mahalata.

  Amalalata wehede ba musik si so ba superskripsi Zinunö 53 ba 88. Ngawua wehede daʼa tola manö  moʼamakhaita ia ba kata kerja Heberaiʼo yaʼia daʼö ”tebai; mofökhö”, ba wangoromaʼö faʼabu dödö ba faʼaetu dötönafö, si tefaudu ba nösi zinunö si dombua andrö sakhari-khari dödö.

• Makedonia.

  Banua tanö yöu Yunani si tehöngö ba götö mamatörö Aleksander Agung ba lö hadöi niha böʼö samatörö banua andre irege kala ira ba danga niha Romawi. Me awena möi zinenge sotöi Faulo ba mbanua Eropa, no tobali provinsi Romawi Makedonia andre. Tölu kali möi Waulo ba mbanua daʼa. (Hal 16:9)​—Faigi Lamp. B13.

• Malaʼika.

  Moroi ba li Heberaiʼo malakh hegöi ba li Yunani aggelos. Eluaha ngawua wehede si dombua andre yaʼia daʼö ”tenge-tenge”, hizaʼi lafoʼeluaha ia tobali ”malaʼika” na boto eheha zi tobali tenge-tenge andrö. (1Mo 16:7; 32:3; Yak 2:​25; Fam 22:8) Malaʼika andrö boto eheha sabölö, nifazökhi Lowalangi fatua lö ifazökhi niha gulidanö. Itaria lafotöi ira göi ”ono Lowalangi” hegöi ”madala”. (5Mo 33:2; Yob 1:6; 38:7) Izara-zara Lowalangi wamazökhi yaʼira ba lö mongaʼötö ira. Töra otu zuta waʼatora. (Dan 7:​10) Itutunö Sura Niʼamoniʼö wa so döi ndra malaʼika zamösana hegöi amuatara. So khöra wangide-ngideʼö ba lö omasi ira nifosumange. Ato ba gotaluara zi lö omasi mamatunö haniha döira. (1Mo 32:29; Luk 1:​26; Fam 22:​8, 9) Faböʼö-böʼö wetarora ba oya halöwöra, simane fangai halöwö föna dadaoma Yehowa, lafaʼema goroisania, möi ira ba gulidanö ba wanolo ono mbanua Yehowa, ba latuhini halöwö fanuriaigö turia somuso dödö. (2Ra 19:35; Si 34:7; Luk 1:​30, 31; Fam 5:​11; 14:6) Ba zi so föna, latolo Yesu na alua wasuwöta ba Hamagedo.​—Fam 19:​14, 15.

• Malaʼika si lö sökhi.

  Boto eheha si lö oroma ba si lö sökhi, tola lafalua zi tebai lafalua niha. Sindruhunia, lö amuʼi ira me awena tewöwöi. Tefotöi ira ”ono matua khö Lowalangi” ba 1 Moze 6:2 ba ”malaʼika” ba Yuda 6. Hizaʼi, lö laʼoʼö niwaʼö Lowalangi me götö Noakhi ba fao ira khö Zatana ba wolawa Yehowa irege labaliʼö ira si faʼudu khö Lowalangi.​—5Mo 32:17; Luk 8:​30; Hal 16:16; Yak 2:​19.

• Malakama.

  Te fagölö ia ba Molokho, lowalangi niha Gamoni. (Zef 1:5)​—Faigi MOLOKHO.

• Mamöbörö; Naha wamöbörö.

  Halöwö ba wangeheta ngalai hegöi uliho moroi ba nösi; naha wamalua halöwö daʼö. Famöbörö andre tola mufalua ia faoma tanga ba muʼogunaʼö geu. Na oya mbuania, so fakake si no muhenaigö yaʼia daʼö fafa wamöbörö mazui fogili nidöni gurifö. Fakake andrö zogili bua nowi si no mubologö ba naha wamöbörö. Aloʼo naha daʼö ba no muʼogaolo, si toʼölönia ba nahia salawa ba sabölö itöri angi.​—3Mo 26:5; Yes 41:15; Mat 3:​12.

• Mana.

  Daʼa gö niʼasogö Yehowa ba ndraono Gizaraʼeli sagötö zi 40 fakhe me so ira ba danö si mate. Ero sihulö wongi, so manö mana andre ba dete danö si fao ba namo mbanua börö dandra sahöli-höli dödö. Hizaʼi, lö hadöi ba ngaluo Sabato. Me awena laʼila iraono Gizaraʼeli daʼa lamane, ”Hadia daʼö?” mazui ba li Heberaiʼo ”man hu?” (2Mo 16:​13-​15, 35). Ba ayati tanö böʼö, lafotöi mana andre ’bua zinanö moroi ba dalu mbanua’ (Si 78:24), ”roti si otarai zorugo” (Si 105:40), ba ’ö ndra malaʼika’ (Si 78:25). No göi irai lafagölösi Yesu simane mana.​—Yoh 6:​49, 50.

• Mangozaragö basitö.

  Mangowuloi si toröi mbasitö gofu hadia ia niröi ndra niha samasi, he niʼodödögö hegöi na tenga. No muhonogöi ba Goroisa Moze enaʼö lö lahorigö labasi ofeta hinölu, simanö göi na lateteu mbua zaitu mazui bua nagu. No itehegö daʼö Lowalangi ba niha si numana, niha si tosasa, si fatewu, si lö ama si lö ina hegöi lakha mbanua ba wangozaragö si toröi mbasitö.​—Rut 2:7.

•  Masikili.

  Amalalata wehede ba li Heberaiʼo si lö muʼila mutatugöi si so ba superskripsi Zinunö 13. Te daʼö geluahania ”puisi foʼangerönusi”. Eluaha ngawua wehede daʼa fakhili-khili ia ba ’wangai angetula si fao faʼatua-tua’, irege so zangumaʼö wa eluaha wehede daʼa moʼamakhaita ia ba ngawua wehede daʼö.​—2Ng 30:22; Si 32:Sup.

• Media.

  Yaʼia daʼö ngaʼötö Madai ono Yafeti. Toröi ira ba hili saloʼo gamaudu Iran, si tobali banua Media. Fao niha Media ba niha Mbabilona ba wokalaisi Asiria. Me luo daʼö, Feresia sambua moroi ba provinsi Media, hizaʼi mamadaö Giro irege mangosara Media ba Feresia ba lafasindro sambua Wamatörö Media-Feresia, ba lakalaisi Wamatörö Mbabilona si Bohou me döfi 539 SM. So ösa niha Media si toröi ba Yeruzalema me Fendrakose 33 M. (Dan 5:​28, 31; Hal 2:9)​—Faigi Lamp. B9.

• Merodakhi.

  Daʼa lowalangi si tohude ba Mbabilona. Me luo daʼö, razo ba samazökhi huku ba Mbabilona sotöi Hammurabi, ibaliʼö Mbabilona tobali ibu kota Mbabilonia. Ba me no aefa ifalua daʼö, itugu lazuno-zuno Merodakhi (mazui Maruduki) irege ato lowalangi böʼö zaheta, ba Merodakhi zi tobali lowalangi si tohude ba gotalua lowalangi Mbabilona. Ba gafuriata, lafagatini döi Merodakhi (mazui Maruduki) labeʼe döinia ba faka yaʼia daʼö ”Belu” (”Sokhö”), ba asese lakaoni ia Bel.​—Yer 50:2.

• Mesia.

  Ba li Heberaiʼo eluahania ”nibayoini” mazui ”tebayoini”. Fagölö geluahania ba li Yunani yaʼia daʼö ”Keriso”.​—Dan 9:​25; Yoh 1:​41.

• Mikitama.

  Ngawua wehede li Heberaiʼo si so ba superskripsi ba zi önö faza mbuku Zinunö (Si 16, 56-​60). Lö muʼila mutatugöi geluaha ngawua wehedenia, te moʼamakhaita ia ba ”hurufo nihaogö wogambaraini”.

• Milikomo.

  Lowalangi nifosumange niha Gamoni, te fagölö ia khö lowalangi Molokho. (1Ra 11:​5, 7) Ifazökhi nahia sagalawa Selomo ba wamosumange lowalangi faya ba gafuriata wamatörönia.​—Faigi MOLOKHO.

• Mina.

  Lafotöi ia göi mane ba Hezekieli. Suʼa-suʼa waʼabua hegöi töi gefe. Moloʼö arkeologi, sambua mina fagölö ira zi 50 syekel, ba sambua syekel fagölö ira zi 11,4 g. Sambua mina ba Mbuku Niʼamoniʼö Heberaiʼo fagölö ira zi 570 g (18,35 ons troy). Te so göi nifotöi mina ba zi sambua famatörö, simane siʼu ba zi sambua famatörö. Ba Mbuku Niʼamoniʼö Yunani Niha Keriso, sambua mina fagölö ira zi 100 drakhma, faʼabuania 340 g (10,9 ons troy), ba 60 mina fagölö ira zi sambua talenta. (Esr 2:​69; Luk 19:13)​—Faigi Lamp. B14.

• Molokho.

  Daʼa lowalangi niha Gamoni; te fagölö ia simane Malakama hegöi Milikomo. Tola manö ha töi ba faka Molokho andre, tenga töi lowalangi. No itatugöi Oroisa Moze wa si göna hukuma faʼamate niha sameʼe ononia khö Molokho.​—3Mo 20:2; Yer 32:35; Hal 7:​43.

• Muti-labeno.

  Ngawua wehede ba superskripsi Zinunö 9, eluahania ”sanandrösa ba waʼamate nono matua”. Hizaʼi so zangumaʼö wa eluaha wehede daʼa yaʼia daʼö töi mazui ngawua wehede siföföna ba zinunö si tehöngö, ba muʼogunaʼö melodinia ba woʼanunöisi sinunö daʼa.

N

• Nadaoya.

  Nadaoya andrö iraono matua safaito, ngaʼötö ndra malaʼika si tobali niha. Mangowalu ira ba ndra alawe fatua lö Anönö Danö Idanö.​—1Mo 6:4.

• Naha mbo galitö.

  Daʼa fakake nifazökhi moroi ba ganaʼa, firö mazui tembaga, niʼogunaʼö ba nose Lowalangi hegöi ba gosali ba wanunu sumange somuhua. Muʼogunaʼö ia göi ba wangeheta akho moroi ba naha wanunu sumange hegöi tali wandru sakhozi ba gahe  naha wandru anaʼa. Naha mbo galitö andre mufotöi ia naha zumange somuhua.​—2Mo 37:23; 2Ng 26:19; Heb 9:4.

• Naha nagu.

  Tefazökhi ia moroi ba guli gurifö maʼasageu, simane nambi mazui biri-biri, naha wangiröʼö idanö nagu. Muʼiröʼö nidanö nagu ba naha nagu si bohou, börö na itugu aisö ia dania, iʼasogö karbon dioksida ba lua-luania iboto naha nagu andrö. Tola asöbi naha nagu si bohou, na si no atua börö waʼabeʼe, tola aboto.​—Yos 9:4; Mat 9:​17.

• Naha niʼamoniʼö.

  Naha nitatugöi ba wamosumange Lowalangi, naha si lö taʼunö. Hizaʼi, asese lafotöi naha niʼamoniʼö andre ose Lowalangi mazui osali ba Yeruzalema. Ngawua wehede daʼa muʼogunaʼö ia ba woʼamaedolagö naha Lowalangi ba zorugo.​—2Mo 25:​8, 9; 2Ra 10:25; 1Ng 28:10; Fam 11:19.

• Naha wamera agu.

  Si toʼölönia, no muhaogö dombua dögi segebua nifazökhi moroi ba gara betua, ba no lafoholo-holo lala nidanö. Naha si sambua abölö alawa moroi ba zi sambua. Na laboboto mbua nagu ba naha sabölö alawa, mangele zindruhu nösi nagu andrö ba naha sadogo-dogo. Ngawua wehede daʼa muʼogunaʼö ba woʼamaedolagö fanguhuku moroi khö Lowalangi.​—Yes 5:2; Fam 19:15.

• Naha wanunu sumange.

  Kara, tambu, eu si no mufaʼanö mazui mufalaete si no lafoʼuli faoma firö, naha wanunu sumange nitaba mazui sumange somuhua. Ba naha siföföna ba nose Lowalangi hegöi ba gosali so ”naha wanunu sumange moroi ba ganaʼa” side-ide ba wameʼe sumange somuhua. Naha wanunu sumange andrö tefazökhi moroi ba geu si no lafoʼuli faoma anaʼa. Tanö baero ba golayama, so ”naha wanunu sumange moroi ba tembaga” sabölö ebua ba wameʼe sumange nitunu. (2Mo 27:1; 39:​38, 39; 1Mo 8:​20; 1Ra 6:​20; 2Ng 4:1; Luk 1:​11)​—Faigi Lamp. B5 ba B8.

• Nahia Niʼamoniʼö.

  Nahia siföföna ba fondrege zebua ba nose Lowalangi mazui osali, si so tanö föna mbateʼe tanö bakha, yaʼia daʼö Nahia Wondrege Niʼamoniʼö. Ba nose Lowalangi, so naha wandru anaʼa ba Nahia Niʼamoniʼö, so göi naha wameʼe sumange moroi ba ganaʼa, meza naha roti nibaliʼö sumange hegöi fakake moroi ba ganaʼa. Na ba gosali, so naha wameʼe sumange ba Nahia Niʼamoniʼö nifazökhi moroi ba ganaʼa, fulu naha wandru anaʼa, ba fulu meza naha wameʼe sumange. (2Mo 26:33; Heb 9:2)​—Faigi Lamp. B5 ba B8.

• Nahia salawa.

  Muʼogunaʼö tobali naha wamosumange, si toʼölönia ba zuzu hili, ba hili-hili mazui ba zi sambua tomosa nifazökhi niha. Hewaʼae na itaria muʼogunaʼö nahia sagalawa ba wamosumange Lowalangi, si toʼölönia laʼogunaʼö daʼö ira niha baero ba wamosumange lowalangira.​—4Mo 33:52; 1Ra 3:2; Yer 19:5 (simanö göi nis.).

• Nahia Wondrege Niʼamoniʼö.

  Nahia fondrege tanö bakha ba nose Lowalangi hegöi ba gosali, naha wangiröʼö tawöla amabuʼula, lafotöi göi ia Niʼamoniʼö Yawa Niʼamoniʼö Fefu. Moloʼö Oroisa Moze, ha ere sebua zi tola möi ba Nahia Wondrege Niʼamoniʼö, yaʼia daʼö ha ba ginötö Ngaluo Wangatulö ero röfi.​—2Mo 26:33; 3Mo 16:​2, 17; 1Ra 6:​16; Heb 9:3.

• Naridu.

  Fanikha daʼa oyo ba maha sibai mböli, nihalö moroi ba zinanö naridu (Nardostachys jatamansi). Börö me maha mbölinia, itaria lafaruka wanikha si mura ba wolimo niha enaʼö hulö simane naridu sindruhu. Hizaʼi, imane Mareko faoma Yohane wa fanikha nibeʼe khö Yesu ”sindruhu-ndruhu fanikha naridu”.​—Mrk 14:3; Yoh 12:3.

• Nehiloti.

  Amalalata wehede si lö muʼila sibai eluaha. So ia ba superskripsi Zinunö 5. So zangumaʼö wa fehede daʼa eluahania fakake zinunö niwuwusi, börö me fagölö ia ba li Heberaiʼo soʼamakhaita  ba khalil (surune). Hizaʼi, tola manö mufoʼeluaha göi ia sambua melodi.

• Ngaluo safuria.

  Ba wamaʼeleʼö Zura Niʼamoniʼö, ngawua wehede andre hegöi ngawua wehede böʼö si fagölö eluaha, simane fehede ”götö furi” manandrösa daʼa ba gamozua ngawalö zi lö sökhi salua. (Hez 38:16; Dan 10:14; Hal 2:​17) Moloʼö famaʼeleʼönia, alua daʼa ba zi hauga fakhe faʼara. Sasese mututunö ba Zura Niʼamoniʼö yaʼia daʼö ”götö safuria” ba gulidanö götö daʼa, salua sagötö faʼatohare Yesu si lö oroma.​—2Ti 3:1; Yak 5:3; 2Fe 3:3.

• Niʼamoniʼö; Lö raʼiö.

  Amuata Yehowa si tebai aefa khönia. Eluaha niʼamoniʼö mazui lö raʼiö yaʼia daʼö fangokhögö amuata si sökhi ba sohau-hau. (2Mo 28:36; 1Sa 2:2; Amd 9:​10; Yes 6:3) Na lawaʼö niʼamoniʼö ba niha (2Mo 19:6; 2Ra 4:9), urifö (4Mo 18:17), ngawalö hadia ia (2Mo 28:38; 30:25; 3Mo 27:14), nahia (2Mo 3:5; Yes 27:13), inötö (2Mo 16:23; 3Mo 25:12), hegöi halöwö (2Mo 36:4), ngawua wehede siföföna ba li Heberaiʼo eluahania nifasambua, nifasafi mazui nilulu khö Lowalangi niʼamoniʼö, mazui tefasambua ba wangai halöwö Yehowa. Ba Mbuku Niʼamoniʼö Yunani Niha Keriso, ngawua wehede nifoʼeluaha tobali ”niʼamoniʼö” ba ”lö raʼiö” manandrösa ia ba zi no mufasambua khö Lowalangi. Muʼogunaʼö göi ngawua wehede daʼö ba waʼohau-hau gamuata zi samösa niha.​—Mrk 6:​20; 2Ko 7:1; 1Fe 1:​15, 16.

• Niha Galedaia.

  Ba wamobörö lafotöi ia soi awö niha si toröi ba zinga Nungo Nidanö Tigirisi hegöi Ungo Nidanö Oiferati. Ba gafuriata eluahania fefu mbanua ba Mbabilona awö nono mbanua si so ba daʼö. Tola göi daʼö geluaha niha Galedaia andre ngawawa niha si so faʼatua-tua ba ilmu pengetahuan, sejarah, li hegöi astronomi, samalua elemu ba sanahö döfi.​—Esr 5:​12; Dan 4:7; Hal 7:4.

• Niha Keriso.

  Töi nibeʼe Lowalangi ba niha soloʼö Yesu Keriso.​—Hal 11:26; 26:28.

• Niha Nazareta.

  Töi nibeʼe khö Yesu börö me ba Nazareta iʼotarai mbanuania. Ngawua wehede sindruhunia te moʼamakhaita ba li Heberaiʼo ”liwiö” niʼogunaʼö ba Yesaya 11:1. Ba gafuriata, lafotöi zoloʼö khö Yesu niha Nazareta.​—Mat 2:23; Hal 24:5.

• Niha Naziri.

  Tehalö moroi ba li Heberaiʼo, eluahania ”Niha Nilulu Faʼauri; Niha Nifasambua”. So dombua lala enaʼö tola tobali niha Naziri: Si oföna, börö me itehegö samösa waʼaurinia, ba tanö böʼö börö me nituyu Lowalangi ia. Ira matua mazui ira alawe tola ifazökhi mbuʼusa li si tohude khö Yehowa wa tobali ia niha Naziri ofeta ba ginötö si no itatugöi. So tölu zi tebai ifalua niha si no manehegö faʼaurinia tobali niha Naziri, yaʼia daʼö tebai ibadu nagu mazui ö moroi ba danömö nagu, tebai itaba mbunia, ba tebai ibabaya mboto zi mate. Niha nituyu Lowalangi si tobali niha Naziri, lö tebulö tobali ia niha Naziri sandrohu faʼaurinia, ba Yehowa zotatugöi hadia manö zi tebai ifalua.​—5Mo 6:​2-7; Sangu 13:5.

• Niha Netini.

  Yaʼira andre niha sangai halöwö ba gosali, si tenga iraono Gizaraʼeli. Ba li Heberaiʼo eluahania ”Niha Nibeʼe” sangoromaʼö wa yaʼira andrö nibeʼe ba wangai halöwö ba gosali. Ato ba gotaluara ngaʼötö niha Gibeona nifohalöwö Yosua ba ’wangowuloi eu awö wanaʼu idanö ba nono mbanua hegöi ba naha wameʼe sumange khö Yehowa’.​—Yos 9:​23, 27; 1Ng 9:2; Esr 8:​17.

• Niha niʼefaʼö; Niha si no muʼefaʼö.

  Sagötö famatörö Romawi, ”niha niʼefaʼö” yaʼia daʼö niha niʼefaʼö iʼotarai me tumbu ba sinangea toröi ia ba soi daʼö. Hizaʼi, ”niha si no muʼefaʼö” yaʼia daʼö niha niʼefasi moroi ba wangosawuyu. Niha si no laʼefasi moloʼö huku tola tobali ia niha Romawi, hizaʼi tebai tobali ia samatörö. Niha niʼefasi si tenga  moloʼö huku tola aefa ia moroi ba wangosawuyu, hizaʼi lö afönu wa ono mbanua daʼö ia.​—1Ko 7:​22.

• Niha Yahudi.

  Töi nibeʼe ba mado Yehuda me no tedudugö wamatörö Gizaraʼeli si fulu mado. (2Ra 16:6) Me no aefa teʼoloiʼö ira ba Mbabilona, tebeʼe döi daʼa ba ndraono Gizaraʼeli moroi ba ngawalö mado sangawuli ba Gizaraʼeli. (Esr 4:​12) Ba gafuriata, laʼogunaʼö döi daʼa ba zi sagörö ulidanö ba wamaböʼöni yaʼira moroi ba soi Niha Baero. (Est 3:6) Iʼogunaʼö döi daʼa sinenge sotöi Faulo ba wanutunö wa gofu hezo mbanua tumbu zi samösa niha, tenga daʼö zabölö moguna ba mbanua niha Keriso.​—Rom 2:​28, 29; Gal 3:​28.

• Niha Zamaria.

  Ba wamobörö, eluahania famatörö ndraono Gizaraʼeli ba mbanua si fulu mado tanö yöu. Hizaʼi, me no ikalaisi ira niha Asiria me 740 SM, niha si fatewu niʼohe Asiria ba daʼö lafotöi ira göi niha Zamaria. Me götö Yesu, niha Zamaria tenga daʼö geluahania niha moroi ba mbanua Zamaria, hizaʼi niha si faböbö ba agama si so ba mbanua Zikhema hegöi ba mbanua Zamaria me mböröta. Faböʼö nifaduhusira tödö moroi ba agama Yahudi.​—Yoh 8:​48.

• Nisana.

  Töi si bohou ba mbaŵa Abibi me no aefa teʼoloiʼö ira ba Mbabilona. Daʼa döi mbaŵa siföföna ba zura mbaŵa agama Yahudi, si toʼölönia baŵa si 7 ba zura mbaŵa si toʼölö laʼogunaʼö niha Yahudi, saekhu ba gotalua mbaŵa si Tölu irugi talu mbaŵa si Öfa. (Neh 2:1)​—Faigi Lamp. B15.

• Noso.

  Daʼa ngawua wehede si toʼölö muʼogunaʼö ba li Heberaiʼo nefes, ba li Yunani psykhe. Me no muhaogö muʼosisiʼö hewisa wangogunaʼö ngawua wehede daʼa ba Zura Niʼamoniʼö, aboto ba dödöda wa manandrösa ia ba (1) niha, (2) urifö, mazui (3) faʼauri niha awö gurifö. (1Mo 1:​20; 2:7; 4Mo 31:28; 1Fe 3:​20) Ngawua wehede ”noso” niʼogunaʼö ba ngawalö agama, faböʼö geluahania ba Zura Niʼamoniʼö. Iforomaʼö Sura Niʼamoniʼö wa nefes ba psykhe, na muʼogunaʼö ia ba niha mazui ba gurifö, eluahania soboto, oroma, tola mubabaya, ba tola göi mate. Ba wamoʼeluaha andre, ngawua wehede Heberaiʼo hegöi Yunani andrö mufoʼeluaha ia moloʼö eluaha niwaʼö ba ayati, simane ”faʼauri”, ”sauri”, ”niha”, ”yaʼodo”, mazui mufoʼeluaha ia tobali kata ganti orang (duma-dumania, ”nosogu” tobali ”yaʼo”). Na muʼogunaʼö ngawua wehede ”noso” ba ayati mazui nisura ba gahe zura, eluahania simane nitutunö moroi yawa. Na mufalua hadia ia moroi siʼaikö ba noso, eluahania mufalua daʼö soroi ba dödö mazui faoma faʼauri niha daʼö maʼafefu. (5Mo 6:5; Mat 22:37) Ba ayati tanö böʼö, ngawua wehede Heberaiʼo hegöi Yunani, tola daʼö geluahania faʼedöna mazui isö-isö dödö zauri ba gulidanö. Tola göi daʼö geluahania niha si no mate mazui boto zi mate.​—4Mo 6:6; Amd 23:2; Yes 56:11; Hag 2:​13.

• Nukha goni.

  Nukha sabeʼe nibaliʼö goni, mazui bola-bola, simane naha hunö zinanö. Si toʼölönia, musoso nukha goni andre moroi ba mbu nambi saitö ba laʼogunaʼö na so wangabu dödö.​—1Mo 37:34; Luk 10:13.

• Nukha mbaʼa-baʼa.

  Nukha si sökhi ba no lahaogö wanagu misa gambara ndra kerubi, samabali Nahia Niʼamoniʼö moroi ba Nahia Wondrege Niʼamoniʼö, he ba nose Lowalangi hegöi ba gosali. (2Mo 26:31; 2Ng 3:​14; Mat 27:51; Heb 9:3)​—Faigi Lamp. B5.

O

• Olayama.

  Tanö ewolo ba zi fasui ose Lowalangi si no mukölini. Ba gafuriata, tanö ewolo ba zi fasui osali si no lakölini. So naha wanunu sumange ba gamaudu golayama nose Lowalangi hegöi ba golayama tanö bakha. (Faigi Lamp. B5, B8, B11.) So göi golayama ba zi fasui omo, simanö göi ba nomo razo nitötöi ba Zura Niʼamoniʼö.​—2Mo 8:​13; 27:9; 1Ra 7:​12; Est 4:​11; Mat 26:3.

•  Omeri.

  Suʼa-suʼa ba wanuʼa ngawalö zoköli. Sambua omeri fagölö ira zi 2,2 L (2 kuart kering AS), mazui sambua niʼofulu efa. (2Mo 16:​16, 18)​—Faigi Lamp. B14.

• Ono Gaʼaroni.

  Ngaʼötö Lewi maʼuwu Gaʼaroni, niha siföföna nifili tobali ere sebua barö Goroisa Moze. Mangai halöwö ndraono Gaʼaroni ba nose Lowalangi hegöi ba gosali.​—1Ng 23:28.

• Ono niha.

  Mato 80 kali mutötöi daʼa ba Injil. Manandrösa ia khö Yesu Keriso, daʼa zangoromaʼö wa tumbu ia tobali simane niha gulidanö, simane ngaʼeu ba mboto waʼaniha. Daʼa göi zangoromaʼö wa alua khö Yesu wamaʼeleʼö niwaʼö ba Danieli 7:​13, 14. Ba Mbuku Niʼamoniʼö Heberaiʼo, muʼogunaʼö ngawua wehede daʼa khö Hezekieli faoma Danieli, ba wangoromaʼö wa yaʼira andre salahi zi fahuhuo si tola mate, faehu simane Lowalangi, Umbu duria nifaʼemara.​—Hez 3:​17; Dan 8:​17; Mat 19:28; 20:28.

• Ono siaʼa.

  Si toʼölönia, ono matua siaʼa moroi khö namania (lö tatu na ono siaʼa moroi khö ninania). Ba götö Zura Niʼamoniʼö, khö nono siaʼa tebeʼe dadaoma salawa ba nomo, ba yaʼia zi tobali högö yomo ba nomo na no mate namania. Yesu andrö ono siaʼa khö Yehowa, yaʼia ziaʼa moroi ba ngawalö nifazökhi fefu ba yaʼia göi zi oföna tesusugi moroi ba gotalua zi mate.​—2Mo 11:5; 13:12; 1Mo 25:33; Kol 1:​15.

• Oroisa.

  Na hurufo sebua wamobörö, manandrösa ia ba Goroisa Moze mazui buku si lima ngawua siföföna ba Zura Niʼamoniʼö. Na hurufo side-ide wamobörö yaʼia, asese manandrösa daʼö ba ngawua Goroisa Moze mazui goi-goi goroisa.​—4Mo 15:16; 5Mo 4:8; Mat 7:​12; Gal 3:​24.

• Oroisa Moze.

  Oroisa nibeʼe Yehowa ba ndraono Gizaraʼeli nifaʼema Moze ba Danö si Mate Zinaʼi me 1513 SM. Itaria, buku siföföna si lima ngawua si no tesura ba Zura Niʼamoniʼö lafotöi ia Oroisa Moze.​—Yos 23:6; Luk 24:44.

• Osali.

  Tomosa saro ba Yeruzalema si tobali nahia waʼowulo ndraono Gizaraʼeli ba wamosumange Lowalangi. Osali andre tobali fogati nose Lowalangi si tola mufindra-findrakö. Selomo zamazökhi osali siföföna ba ladudugö ira niha Mbabilona. Serubabeli zamazökhi osali si mendrua me mangawuli niha niʼosawuyu moroi ba Mbabilona ba ifuli ihaogö Herode Sebua ba gafuriata. Ba Zura Niʼamoniʼö, osali andre asese mufotöi ia ”omo Yehowa”. (Esr 1:3; 6:​14, 15; 1Ng 29:1; 2Ng 2:4; Mat 24:1)​—Faigi Lamp. B8 ba B11.

• Ose Lowalangi.

  Nahia waʼowulo si tola mufindra-findrakö, niʼogunaʼö ndraono Gizaraʼeli me no aheta ira ba Miserai. Ba nose daʼa so dawöla mbuʼusa li Yehowa, soʼamaedolagö feʼaso Lowalangi, mazui si tobali nahia wamosumange Lowalangi ba wameʼe sumange. Itaria, mufotöi ia ”ose waʼowulo”. Tefazökhi ia moroi ba geu, nibalugö nukha si sökhi nifogambara kerubi si no lasuzi. So dombua nahia ba nose andre, yaʼia daʼö Nahia Niʼamoniʼö ba Nahia Wondrege Niʼamoniʼö. (Yos 18:1; 2Mo 25:9)​—Faigi Lamp. B5.

• Ose waʼowulo.

  Fehede niʼogunaʼö ba nose Moze hegöi ose niʼamoniʼö khö Lowalangi, nifasindro si oföna sibai ba danö si mate.​—2Mo 33:7; 39:32.

• Owasa Fangamoniʼö.

  Fanörö tödö nifalua ero röfi ba wangehaogö osali me no aefa itaʼunöisi Atiokhu Efifane, nibörögö me 25 Kisilewi irugi walu hari waʼara.​—Yoh 10:22.

• Owasa Nose Ndraha Geu.

  Lafotöi ia göi Owasa Nose Lowalangi mazui Owasa Fangowuloi, nifalua me 15-21 mbaŵa Etani ba wangowasaini basitö zohalöwö ba danö ba gangohorita ndröfi daʼö ba ndraono Gizaraʼeli. Owasa daʼa inötö waʼomuso dödö ba wangandrö saohagölö khö Yehowa me  no ifahowuʼö mbasitöra. Sagötö fangowasaini, toröi ira ba nose-ose ndraha geu mazui ba nahia waʼatoröira sabata, ba wanörö tödö faʼahetara moroi ba danö Miserai. Daʼa sambua wangowasaini moroi ba gowasa si tölu kali lafalua ero röfi ba moʼömö fefu ndra matua enaʼö möi ira ba gowasa daʼa ba Yeruzalema.​—3Mo 23:34; Esr 3:4.

• Owasa Roti si Lö Mufaruka Ragi.

  Owasa si oföna moroi ba gowasa si tölu kali lafalua iraono Gizaraʼeli ero röfi, nibörögö me 15 Nisana, sahari me no aefa Gowasa Fasa, fitu hari waʼara. Ha roti si lö mufaruka ragi zi tola laʼa ba wanörö tödö faʼahetara moroi ba danö Miserai.​—2Mo 23:15; Mrk 14:1.

• Owasa Wamasi; Owasa Ero Migu.​—

  Faigi FENDRAKOSE.

P

• Papirus.

  Sinanö si tumbu ba nidanö, simane töla zukhu. Muʼogunaʼö ia ba wamazökhi gama-gama simane raga-raga, rumbi hegöi tundraha. Tola göi tobali ia fakake wanura si fakhili-khili ba garate, ba oya muʼogunaʼö ia ba gölu-gölu zura.​—2Mo 2:​3, nis.

• Perkamen.

  Uli mbiri-biri, nambi mazui ono zawi nibaliʼö karate wanura. Abölö aro perkamen moroi ba papirus ba labaliʼö gölu-gölu Zura Niʼamoniʼö. Me iʼandrö Faulo khö Dimoteo ba wolohe perkamen, te ngaʼörö Mbuku Niʼamoniʼö Heberaiʼo daʼö. So ösa Ngaʼölu Nasi si Mate nisura ba perkamen.​—2Ti 4:​13, nis.

• Pim.

  Suʼa-suʼa waʼabua hegöi böli nitatugöi niha Wilisiti soguna ba wangataröʼö gama-gama moroi ba loga. Ba hurufo konsonan Heberaiʼo, tesura ”Pim” andre ba gara nisöndra ba Gizaraʼeli ba naha wogao arkeologi. Faʼabuania 7,8 g (0,2508 ons troy), yaʼia daʼö mato dombua niʼotölu syekel.​—1Sa 13:​20, 21.

• Porneia.​—

  Faigi FOHORÖ.

• Prokonsul.

  Gubernur samatörö ba provinsi. Samaigi-maigi halöwönia yaʼia daʼö dewan perwakilan rakyat sabölö alawa, nifotöi Senat Romawi. No tebeʼe kuaso khö prokonsul enaʼö tobali ia sanguhuku ba kumandru. Hewaʼae na ifaigi-faigi halöwönia Senat, afönu kuasonia ba zi sagörö provinsi.—Hal 13:​7, nis.; 18:​12, nis.

• Proselit.

  Niha samalalini agamania. Ba Zura Niʼamoniʼö, eluahania niha si fao ba agama Yahudi (Yudaisme). Na yaʼia andrö ira matua, lasuna ia enaʼö tobali proselit.​—Mat 23:15; Hal 13:43.

R

• Ragi.

  Zat nifaruka ba darigu mazui idanö fangaisöni, mazui tarigu si no mufaruka fangaisö nihalö moroi ba zi oföna mufazökhi. Asese iʼogunaʼö daʼa Sura Niʼamoniʼö ba woʼamaedolagö horö ba faʼatekiko. Itaria göi laʼamaedolagö ia ba waʼatedou si lö oroma.​—2Mo 12:20; Mat 13:33; Gal 5:9.

• Rakhaba.

  Ngawua wehede nisura ba mbuku Yobi, Sinunö hegöi Yesaya (tenga ira alawe sotöi Rakhaba nisura ba mbuku Yosua). Tola taʼila ba ayati nisura ba mbuku Yobi, wa eluaha Rakhaba yaʼia daʼö urifö nasi sebua. Ba ayati tanö böʼö, urifö nasi andrö muʼogunaʼö ia ba woʼamaedolagö Miserai.​—Yob 9:​13; Si 87:4; Yes 30:7; 51:​9, 10.

• Ratu Zorugo.

  Daʼa gamalalata döi lowalangi ira alawe nifosumange ndraono Gizaraʼeli si no mondröi sindruhu. So zangumaʼö wa yaʼia andrö lowalangi ira alawe nifosumange niha Mbabilona sotöi Istar (Astarte). Si fagölö khönia yaʼia daʼö Inana, lowalangi nifosumange niha Sumeri, eluahania ”Ratu Zorugo”. Ba wamaigira, yaʼia andrö samatörö sorugo hegöi lowalangi fangatabö. Ba zi sambua gambara nisura ba li Miserai, mufotöi göi Astarte andrö ”Donga Zorugo”.​—Yer 44:19.

• Ribo-ribo.

  Tali moroi ba guli gurifö mazui uo gurifö nindrandra, daha mbulu mazui bu gurifö, niʼogunaʼö ba wamazaumba kara mazui tanö böʼö. Labeʼe  daʼö ba gotalua tali sebolo. So sara mbalö ribo-ribo andrö niböbö ba danga mazui ba mbölökha, ba si sarania mugogohe ba wamazaule awena muʼefasi. Ba götö föna, so ndra saradadu sangogunaʼö ribo-ribo.​—Sangu 20:16; 1Sa 17:50.

• Roti nibaliʼö sumange.

  So felendrua ngawua roti nibagi dua wamalaete, ero sambua famalaete so önö ngawua roti, ba labeʼe ba meza Nahia Niʼamoniʼö si so ba nose Lowalangi hegöi ba gosali. Lafotöi ia göi ”roti nifalaete”. Labeʼe roti daʼa tobali sumange khö Lowalangi ba lafuli labeʼe zi bohou ero ngaluo Sabato. Si toʼölönia, ha ere zi tola manga roti si tohöna andrö. (2Ng 2:4; Mat 12:4; 2Mo 25:30; 3Mo 24:​5-9; Heb 9:2)​—Faigi Lamp. B5.

S

• Sabato.

  Ba li Heberaiʼo eluahania ”molombase; mubatogö”. Daʼa ngaluo si fitu ba migu niha Yahudi, yaʼia daʼö iʼotarai me aekhu luo hari Zumaha irugi me aekhu luo hari Satu. Inötö gowasa tanö böʼö, simane owasa ba ndröfi si 7 hegöi döfi si 50 mufotöi ia göi sabato. Ba ngaluo Sabato, lö hadöi halöwö si tola mufalua, ha ira ere zi tola mohalöwö ba naha niʼamoniʼö. Ba ndröfi Sabato, tebai lafaku danö, ba tebai lafaso niha Heberaiʼo ba wamuʼa foʼömö. Sindruhunia, fatema ba dödö zato nola-ola nitatugöi ba Goroisa Moze, hizaʼi lanönö nola-ola si bohou ira sondröniaʼö ba agama, irege abua ba niha wamalua Sabato ba götö Yesu.​—2Mo 20:8; 3Mo 25:4; Luk 13:​14-​16; Kol 2:​16.

• Sadukaiʼo.

  Daʼa agama niha Yahudi si tehöngö. Si faböbö ba daʼa yaʼia daʼö niha si kayo nifozuma-zumange awö ndra ere samatörö halöwö nifalua ba gosali. Latimbagö ngawalö zi toʼölö lafalua ira niha Farizaiʼo si lö hadöi ba zura awö ngawalö nifaduhusira tödö. Lö faduhu dödöra wanusugi niha si no mate hegöi khö ndra malaʼika. Lö latema Yesu.​—Mat 16:1; Hal 23:8.

• Salawa.

  Ba li Yunani eluahania ”Sondröniaʼö Siföföna”, sangoromaʼö halöwö nifalua Yesu Keriso yaʼia daʼö ba wangefaʼö niha samati moroi ba waʼamate börö horö hegöi ba wolohe yaʼira ba waʼauri si lö aetu.​—Hal 3:​15; 5:​31; Heb 2:​10; 12:2.

• Samaʼeleʼö.

  Niha samatunö ohitö dödö Lowalangi, si tobali salahi Lowalangi. Ifatunö hadia zalua ba zi so miföna, ifaʼema wamahaʼö, oroisa mazui fanguhuku moroi khö Yehowa.​—Amo 3:7; 2Fe 1:​21.

• Samalua faetasa.

  Niha sangogunaʼö faʼabölö moroi khö ndra malaʼika si lö sökhi.​—2Ng 33:6.

• Samaria.

  Ibu kota wamatörö Gizaraʼeli si fulu mado tanö yöu ba zi 200 fakhe, ba töi mbanua andrö maʼasagörö. Tefazökhi mbanua daʼa ba dete Hili Zamaria. Ba götö Yesu, Samaria andre töi distrik si so ba gotalua Galilaia tanö yöu faoma Yudea tanö raya. Ba weʼamöi Yesu manuriaigö misa, si toʼölönia lö ituriaigö duria somuso dödö ba mbanua daʼa. Hizaʼi, itaria itörö mbanua daʼa ba fahuhuo ia ba niha mbanua andrö. Iʼogunaʼö Fetero nono kusi si dua ba Wamatörö Lowalangi me latema geheha niʼamoniʼö ira niha Zamaria. (1Ra 16:24; Yoh 4:7; Hal 8:​14)​—Faigi Lamp. B10.

• Samatörö ba zi sambua banua.

  Abölö ide-ide dadaomania moroi khö ndra samatörö ba gödo razo Mbabilona. Ba Zura Niʼamoniʼö, samatörö ba zi sambua banua lafatörö fefu niha sagatua-tua ba gödo razo Mbabilona. Mutötöi göi ira ba götö wamatörö Razo Dario niha Media.​—Dan 2:​48; 6:7.

• Samatörö ba zi sambua provinsi.

  Gubernur ba zi sambua provinsi ba götö wamatörö Mbabilona hegöi Feresia. Razo zamataro yaʼira tobali sondröniaʼö.​—Esr 8:​36; Dan 6:1.

•  Sambua niʼofulu.

  Si sambua niʼofulu andre mazui si 10 persen, hasambalö mubeʼe börö me no sinangea laʼandrö daʼö ba agama. (Mal 3:​10; 5Mo 26:12; Mat 23:23) No mufakhoi ba Goroisa Moze wa moguna mubeʼe zi sambua niʼofulu ba niha Lewi moroi ba mbasitö hegöi urifö si tedou faʼoya si tobali fanolo khöra ero röfi. Moguna göi labeʼe dolo-tolo andre ira niha Lewi khö ngaʼötö Gaʼaroni si no tobali ere, yaʼia zi sambua niʼofulu nitemara andrö. So nasa zi sambua niʼofulu tanö böʼö si tobali onönöta. Hizaʼi, lö muʼandrö ba niha Keriso iadaʼa wamuʼa si sambua niʼofulu.

• Samöbözi tambu laʼuri.

  Sangehaogö figa, mako hegöi naha tanö böʼö moroi ba dambu laʼuri. Ba li Heberaiʼo eluahania ”samazökhi”. Kuaso zamöbözi tambu laʼuri asese muʼamaedolagö ia ba kuaso Yehowa ba wamatörö si samösa niha hegöi si sambua soi.​—Yes 64:8; Rom 9:21.

• Sanahö döfi.

  Niha samahaʼö yaʼia ba lala wofanö luo, baŵa hegöi döfi ba wamaigi hadia zalua ba zi so miföna.​—Dan 2:​27; Mat 2:1.

• Sanaro.

  Niha sohalöwö ba wanarogö niha mazui nahia moroi ba deʼala sedöna alua, sasesenia ba zi bongi. Ifoli zi tobali tandra-tandra na so deʼala. Si toʼölönia, lafataro ira ba göli mbanua hegöi ba malige enaʼö tola lafaigi-faigi niha si tohare moroi ba zaröu. Ira samaʼeleʼö, tola göi mufotöi ira sanaro iraono Gizaraʼeli, börö me lafangelama soi andrö sanandrösa ba waʼadudu si lö ara tö alua.​—2Ra 9:​20; Hez 3:​17.

• Sanaro Omo Razo.

  Ngawawa zaradadu Romawi si tobali sanaro khö kaisaro Romawi. Ebua kuasora ba politik, börö me tola latuhini mazui laheta kaisaro.​—Fil 1:13.

• Sangagö talu gotalua.

  Sangagö otalua zi darua niha ba wangatulöʼö yaʼira. Ba Zura Niʼamoniʼö, lafotöi Moze sangagö talu gotalua ba mbuʼusa li Goroisa. Tobali göi Yesu sangagö talu gotalua ba gamabuʼula li si bohou.​—Gal 3:​19; 1Ti 2:5.

• Sangetuʼö Huku.

  Sangetuʼö huku Yahudi ba Yeruzalema. Ba götö Yesu, so 71 niha zi farahu ba daʼö, simane ere sebua, si no irai tobali ere sebua, ösi nomo gere sebua, ira satua, kafalo ero sambu-sambua mado, sondröniaʼö ösi nomo, awö niha sangila amakhoita.​—Mrk 15:1; Hal 5:​34; 23:​1, 6.

• Sangiʼila.

  Niha nifofaʼabölö Lowalangi ba wangiʼila ohitö dödönia. Teboka hörönia ba wangiʼila mazui ba wangokhögö faʼatua-tua ba zi lö laʼila niha gulidanö. Fehede daʼa ba li Heberaiʼo eluahania sangiʼila, yaʼia daʼö ”sangila” mazui ”sangokhögö faʼaboto ba dödö”. Ba ginötö alua gabula dödö, khönia möi niha ba wangandrö mene-mene si sökhi.​—1Sa 9:9.

• Sangila amakhoita.

  Sanali Buku Niʼamoniʼö Heberaiʼo. Ba götö Yesu, yaʼira andrö niha sonekhe ba Goroisa Moze. Lö latema Yesu.​—Esr 7:6; Mrk 12:​38, 39; 14:1.

• Sanguhuku.

  Niha nifataro Yehowa ba wangefaʼö ono mbanuania fatua lö hadöi razo ba ndraono Gizaraʼeli.​—Sangu 2:​16.

• Satana.

  Ba li Heberaiʼo eluahania ”Samadaö mazui Solawa”. Na fehede niʼogunaʼö mufanandrösa ia khö zi samösa samadaö, eluahania daʼö Afökha Satana, udu Lowalangi.​—Yob 1:6; Mat 4:​10; Fam 12:9.

• Satua; Satua sokubaloi.

  Ira matua si no abönö döfi. Ba Mbuku Niʼamoniʼö, muʼogunaʼö ngawua wehede daʼa ba niha nifataro mazui nibeʼe kuaso ba woʼonorogö tödö ono mbanua mazui soi. Ba mbuku Wamaʼeleʼö, muʼogunaʼö göi ngawua wehede daʼa khö ndra malaʼika ba zorugo. Ba li Yunani presbyteros lafoʼeluaha ia tobali ”satua sokubaloi” na lafanandrösa ia ba niha sangonorogö tödö ba wondröniaʼö banua  niha Keriso.​—2Mo 4:​29; Amd 31:23; 1Ti 5:​17; Fam 4:4.

• Sea.

  Fanuʼa zoköli. Moloʼö suʼa-suʼa nidanö si fagölö ba bat, sambua sea fagölö ira zi 7,33 L (6,66 kuart kering AS). (2Ra 7:1)​—Faigi Lamp. B14.

• Sebati.

  Töi mbaŵa si 11 ba zura mbaŵa agama Yahudi me no aefa teʼoloiʼö ira ba Mbabilona, baŵa si 5 ba zura mbaŵa si toʼölö laʼogunaʼö niha Yahudi. Aekhu ia ba dalu mbaŵa si Sara irugi talu mbaŵa si Dua. (Zak 1:7)​—Faigi Lamp. B15.

• Sela.

  Amalalata wehede ba wanunö, ba wangogunaʼö fakake zinunö mazui ba wombaso. Tesöndra ia ba mbuku Zinunö hegöi Habakuki. Te eluahania inötö wombatogö sinunö mazui musik ba woʼangerönusi hadia nitutunö ba zinunö andrö. Famoʼeluahania ba Septuaginta Yunani yaʼia daʼö diapsalma, eluahania ”fombatogö musik”.​—Si 3:4; Hab 3:3.

• Seminiti.

  Ngawua wehede niʼogunaʼö ba musik, eluahania ”si walu”, te note mazui oktaf sabölö adogo-dogo. Na muʼogunaʼö wehede daʼa ba wakake zinunö, te eluahania fakake zinunö bas. Na muʼogunaʼö ia ba zinunö, te eluahania musik hegöi sinunö sadogo-dogo note.​—1Ng 15:21; Si 6:Sup; 12:Sup.

• Serafi.

  Malaʼika sangai halöwö ba zi fasui dadaoma Yehowa ba zorugo. Ba li Heberaiʼo, ngawua wehede serafim eluahania ”si hola-hola”.​—Yes 6:​2, 6.

• Siʼo gubalo.

  Mufoʼeluaha göi ia bözi-bözi, siʼo sanau ba so ziʼöli satarö ba mbalönia si toʼölö laʼogunaʼö ira sohalöwö ba danö ba wamatörö urifö. Siʼo daʼa eluahania fehede niha si so faʼatua-tua si möi famarou dödö zamondrongo ba woloʼö mene-mene si sökhi. Ngawuwa wehede ”solawa bözi-bözi” tehalö moroi ba lagu zawi sabeʼe högö si lö moloʼö fanuturu lala irege yaʼia samösa zi tefakao na ilawa ziʼo daʼö.​—Hal 26:14; Sangu 3:​31.

• Siʼu.

  Suʼa-suʼa waʼanau, iʼotarai dalinga ziʼu irugi mbalö duru lawa. Faʼanau zi sambua siʼu niʼogunaʼö ndraono Gizaraʼeli yaʼia daʼö 44,5 cm (17,5 inci), hizaʼi lafake göi ziʼu sanau mato 51,8 cm (20,4 inci), sambua laluʼa tedou waʼanaunia moroi ba ziʼu si toʼölö. (1Mo 6:​15; Luk 12:25)​—Faigi Lamp. B14.

• Siaʼa mbua.

  Bua si oföna ba ginötö wamasi mazui siaʼa mbua moroi ba ngawalö hadia ia. Iʼandrö Yehowa ba ndraono Gizaraʼeli enaʼö labeʼe ziaʼa mbua tobali sumange khönia, he urifö, bua zinanö mazui niha. Iraono Gizaraʼeli si ha sambua soi, labeʼe sumange Lowalangi ziaʼa mbua zinanöra ba Gowasa Roti si Lö Mufaruka Ragi hegöi ba Gowasa Fendrakose. Ngawua wehede ”siaʼa mbua” laʼogunaʼö ia göi ba woʼamaedolagö Keriso hegöi ira niha nibayoini soloʼö khönia.​—1Ko 15:23; 4Mo 15:21; Amd 3:9; Fam 14:4.

• Sida-Sida.

  Sindruhunia ira matua nifufu bazili. Tefataro niha simane daʼö tobali salawa faka ba gödo razo mazui sondrorogö ratu hegöi foʼomo ba döi khö razo. Hewaʼae simanö, lö ero-ero na so ngawua wehede daʼa eluahania ira matua si no mufufu bazili, hizaʼi manandrösa ia ba niha salawa faka sohalöwö ba gödo razo. Ngawua wehede ’sida-sida börö wamatörö Lowalangi’ eluahania niha si tola manaha tödönia börö wangai halöwö khö Lowalangi soroi ba dödö.​—Mat 19:12; Est 2:​15; Hal 8:​27 (simanö göi nis.).

• Si faʼawö khö Herode.

  Lafotöi göi ira soloʼö khö Herode. Me mamatörö ira barö wamatörö niha Romawi, si faʼawö khönia andre, laʼoʼawögö sibai soira ba latuhini politik Herode. Te so ösa niha Zadukaiʼo si faʼawö khönia. Fao niha si faʼawö khönia andre khö ndra Farizaiʼo ba wolawa Yesu.—Mrk 3:6.

• Si faʼudu khö Keriso.

  So dombua geluaha ngawua wehede daʼa ba li Yunani. Si oföna yaʼia daʼö solawa Keriso, ba si  dua Keriso faya, yaʼia daʼö fogati Keriso. Nifotöi si faʼudu khö Keriso yaʼia daʼö fefu niha, orahua hegöi ngawawa sangotöigö wa salahi Keriso ira mazui si tobali Mesia sindruhunia sa tenga, mazui solawa Keriso hegöi niha nifahaʼönia.​—1Yo 2:​22.

• Sifi.

  Töi sindruhu ba mbaŵa si 2 ba zura mbaŵa agama Yahudi, baŵa si 8 ba zura mbaŵa si toʼölö laʼogunaʼö niha Yahudi. Aekhu ia ba dalu mbaŵa si Öfa irugi talu mbaŵa si Lima. Mufotöi mbaŵa daʼö lyar ba Talmud (si no musura sanandrösa ba huku Yahudi) hegöi ba zura tanö böʼö nifazökhi me no aefa waniboʼö ba Mbabilona. (1Ra 6:​37)​—Faigi Lamp. B15.

• Si lö sökhi.

  Töi nibeʼe khö Gafökha Satana, samadaö khö Lowalangi awö goi-goinia satulö.​—Mat 6:​13; 1Yo 5:​19.

• Sinagoga.

  Eluahania ”owuloa; orahua”, hizaʼi, ba zi hawaʼoya ayati, eluahania tomosa mazui nahia waʼowulo niha Yahudi ba wombaso Sura Niʼamoniʼö, mamondrondrongo fanuturu lala, fanuriaigö turia somuso dödö, ba fangandrö. Ba götö Yesu me föna, ero sambua banua sebua ba Gizaraʼeli so göi sambua sinagoga. Ba mbanua sabölö ebua misa, tenga ha sambua khöra zinagoga.​—Luk 4:​16; Hal 13:​14, 15.

• Sinanö safeto.

  Sinanö soʼeu safeto ba satarö hua. Iʼogunaʼö Sura Niʼamoniʼö ngawua wehede daʼa ba woʼamaedolagö hawaʼafeto lua-lua gamuata wohorö, fangosawuyu, falöʼatulö hegöi fondröi sindruhu. Ba Wamaʼeleʼö 8:​11, ”sinanö safeto” eluahania langu safeto, nifotöi absinthe.​—5Mo 29:18; Amd 5:4; Yer 9:​15; Amo 5:7.

• Sinenge.

  Dane-dane ngawua wehede daʼa yaʼia daʼö ”nifatenge”, manandrösa daʼa khö Yesu hegöi ba niha nifatenge ba wangai halöwö ba niha böʼö. Asese muʼogunaʼö wehede daʼa khö ndra nifahaʼö Yesu si 12, nifili ba nibayoini si tobali salahinia.​—Mrk 3:​14; Hal 14:14.

• Sinunö.

  Sinunö ba wanuno Lowalangi. Muʼanunöisi zinunö andre faoma musik ba ginötö mufosumange Lowalangi Yehowa, simanö göi na möi ba gosali nono mbanuania ba Yeruzalema.​—Luk 20:42; Hal 13:33; Yak 5:13.

• Sinunö ba Wanösö Hili.

  Superskripsi niʼogunaʼö ba Zinunö 120-134. Hewaʼae oya mbua gera-era niha sanandrösa ba geluaha wehede daʼa, ato zi faduhu tödö wa si 15 zinunö andrö laʼanunöisi ia iraono Gizaraʼeli si fao faʼomuso dödö me ’lasösö’ Yeruzalema, si so ba hili-hili Yehuda, ba wangondrasi owasa si tölu kali nifalua ero röfi ba wamosumange Yehowa.

• Siona; Hili Ziona.

  Töi mbanua niha Yebusi si no mukölini, si so ba hili tanö raya gatumbukha Yeruzalema. Me no ikalaisi mbanua daʼö Dawido, ifazökhi nomo waʼarazonia ba daʼö ba mufotöi mbanua andrö ’Banua Dawido’. (2Sa 5:​7, 9) Siona andre tobali hili niʼamoniʼö khö Yehowa me ifindrakö Dawöla ba daʼö Dawido. Ba gafuriata, farahu ba döi Ziona andrö tanö ba zi fasui osali ba Hili Moria, ba itaria göi banua Yeruzalema maʼasagörö. Ba Mbuku Niʼamoniʼö Yunani Niha Keriso, ngawua wehede daʼa muʼogunaʼö tobali fehede nifoʼamaedola.​—Si 2:6; 1Fe 2:6; Fam 14:1.

• Siria; Niha Ziria.​—

  Faigi ARAMO; NIHA GARAMO.

• Siriti.

  Dombua nasi sebua sadöni bakha si lö abakha ba zinga nasi Libia, Afrika Utara. Bakha ba nidanönia, oya gawu si no mohili-hili ba mudaulu-daulu misa börö mbade. Lua-luania, ataʼu niha me föna weʼamöi ba nasi börö me tola manö teʼala ira. (Hal 27:17)​—Faigi Lamp. B13.

• Si tobini niʼamoniʼö.

  Si tobini moroi khö Lowalangi. Moʼamakhaita daʼa ba wamalua ohitö dödö Lowalangi si no tobini irugi ginötö si no itatugöi. Ha ba niha nifilinia iʼombakhaʼö zi tobini andrö.​—Mrk 4:​11; Kol 1:​26.

•  Sitoiko.

  Ngawawa Zitoiko andre yaʼia daʼö sonekhe ba ngawalö wamahaʼö niha Yunani, faduhu dödöra wa dozi niha moguna lafaudugö lala waʼaurira ba nösi gulidanö andre maʼafefu, moloʼö si fatema ba dödöra. Moloʼö yaʼira, niha satua-tua yaʼia daʼö niha si lö abu tödö börö waʼafökhö mazui börö waʼomuso dödö.​—Hal 17:18.

• Siwana.

  Töi mbaŵa si 3 ba zura mbaŵa agama Yahudi me no aefa teʼoloiʼö ira ba Mbabilona, baŵa si 9 ba zura mbaŵa si toʼölö laʼogunaʼö niha Yahudi. Aekhu ia ba dalu mbaŵa si Lima irugi talu mbaŵa si Önö. (Est 1:7)​—Faigi Lamp. B15.

• Sogaoni bekhu niha si no mate.

  Niha samaduhuʼö wa tola fahuhuo ia ba niha si no mate.​—3Mo 20:27; 5Mo 18:​10-​12; 2Ra 21:6.

• Sohalöwö ba gödo zanguhuku.

  Ba wamatörö Mbabilona, mohalöwö ira ba distrik-distrik yurisdiksi. Onekhe ira ba huku, ba tebeʼe khöra maʼifu kuaso tobali sangetuʼö huku. Ba mbanua nifatörö Romawi, mohalöwö ira ba wotuhini samatörö. Halöwöra yaʼia daʼö ba wozago enaʼö lö kaliru, mamöföʼö lala gefe, mangetuʼö huku ba niha sanawö huku, ba lafalua göi wanguhuku.​—Dan 3:2; Hal 16:20.

• Sohorö-horö.

  Niha sohorö-horö hewaʼae lö si tefaböbö ia ba wongambatö, si toʼölönia lagazi ia wamalua daʼa. (Ngawua wehede ”sohorö-horö” ba li Yunani yaʼia daʼö porne, eluahania ”mamawa”.) Si toʼölönia ngawua wehede daʼa manandrösa ba ndra alawe, hizaʼi so göi ndra matua sohorö-horö nitutunö ba Zura Niʼamoniʼö. Ba Goroisa Moze, muʼelifi niha sohorö-horö ba tebai muʼogunaʼö gefe nisöndrara tobali sumange ba naha niʼamoniʼö khö Yehowa. Faböʼö göi nifalua niha baero, tobali fangaluira niha sohorö-horö ba nahia wamosumange adu. (5Mo 23:18, 19; 1Ra 14:24) Iʼogunaʼö Sura Niʼamoniʼö ngawua wehede daʼa ba woʼamaedolagö niha sato, soi, mazui orahua sangumaʼö wa samosumange Lowalangi ira, sindruhunia sa samosumange adu. Duma-dumania, orahua agama nifotöi ”Babilona Sebua” muʼamaedolagö ia simane niha sohorö-horö ba mbuku Wamaʼeleʼö, börö me fahuwu sibai ia khö ndra samatörö ba gulidanö, ha enaʼö tebeʼe khönia kuaso ba faʼakayo.​—Fam 17:​1-5; 18:3; 1Ng 5:​25.

• Sondröniaʼö.

  Ira matua sangai halöwö ba wondrorogö hegöi ba wokubaloi banua niha Keriso. Ba li Yunani episkopos, eluaha sindruhunia yaʼia daʼö ba wamaigi-maigi enaʼö telumöʼö. Ngawua wehede ”sondröniaʼö” ba ”satua sokubaloi” (presbyteros) fagölö wetarora ba mbanua niha Keriso. Ngawua wehede ”satua sokubaloi” zangoromaʼö wa aro wamati niha si no mufataro, ba ngawua wehede ”sondröniaʼö” manandrösa ba halöwö nifaluara.​—Hal 20:28; 1Ti 3:​2-7; 1Fe 5:2.

• Sondröniaʼö sinunö.

  Ngawua wehede li Heberaiʼo niʼogunaʼö ba mbuku Zinunö, eluahania niha samaʼanö sinunö ba sondröniaʼö sinunö. Ifahaʼö ndra niha Lewi ba wanunö ba idöniaʼö wamaehagö si no muhonogöi. Ba wamoʼeluaha tanö böʼö, ngawua wehede daʼa lafoʼeluaha ia ”sondröniaʼö ba wanunö” mazui ”sondröniaʼö sanunö”.​—Si 4:Sup; 5:Sup.

• Sumange.

  Sumange nibeʼe khö Lowalangi si tobali tandra wangandrö saohagölö, fangombakha sala, hegöi fangaʼazökhi mangawuli otalua si sökhi khönia. Aoha gölö niha wameʼe sumange si faböʼö-böʼö khö Lowalangi iʼotarai ba götö Habeli, simane urifö, irugi me no mutatugöi ia ba Goroisa Moze. Lö moguna mubeʼe saʼae gurifö tobali sumange me no ibeʼe waʼaurinia Yesu salahi zumange soʼahonoa. Hizaʼi, lö laböhöli ira niha Keriso ba wameʼe sumange famati khö  Lowalangi.​—1Mo 4:4; Heb 13:​15, 16; 1Yo 4:​10.

• Sumange fameta horö.

  Sumange nibeʼe me no mufalua horö si lö muʼodödögö börö walömoʼahonoa. Oya ngawalö gurifö si tola mubaliʼö sumange fangatulö, simane sawi si matua ba ono marafadi, moloʼö si sagu ba niha samalua horö andrö.​—3Mo 4:​27, 29; Heb 10:8.

• Sumange fameta zala.

  Sumange fameta horönia samösa. Faböʼö maʼifu zumange daʼa moroi ba zumange fameta horö tanö böʼö. Moguna ibeʼe zumange daʼa si samösa niha si no mamalalini era-era enaʼö ifuli iʼokhögö dana khönia moloʼö si no tefabuʼu, börö me tebai iʼokhögö daʼö sagötö ifalua horö. Baero daʼö, sumange andre göi zangefaʼö yaʼia moroi ba wanguhuku.​—3Mo 7:​37; 19:22; Yes 53:10.

• Sumange fangandrö saohagölö.

  Sumange fangatulö nibeʼe ba wamosumange Lowalangi börö waʼomasinia si lö faröi ba fefu zi no ihenaigö. Lö tola löʼö muʼa nagole zumange, roti nifaruka ragi hegöi roti si lö mufaruka ragi. Ba ngaluo daʼö iʼanemaiʼö muʼa nagolenia.​—2Ng 29:31.

• Sumange fangatulö.

  Sumange nibeʼe khö Yehowa si tobali lala ba wangandrö faʼatulö moroi khönia. Sameʼe sumange awö nösi nomonia, ere sameʼe sumange hegöi ira ere sangai halöwö, fao ira ba wemanga sumange andrö. Hulö omuso sibai dödö Yehowa na itema zimbo dawö nitunu andrö. Labeʼe göi khö Yehowa ndro si no amaedola waʼauri. Ira ere hegöi sameʼe sumange andrö, amaedola no falulu manga ira khö Yehowa tandra wahuwusa khönia.​—3Mo 7:​29, 32; 5Mo 27:7.

• Sumange fawuʼusa li.

  Sumange si no aoha gölö nibeʼe börö me so mbuʼusa li si no ifazökhi.​—3Mo 23:38; 1Sa 1:​21.

• Sumange nibadu.

  Agu nifaduwa ba naha wanunu sumange nifaogö ba zumange tanö böʼö. Iwaʼö Faulo wa hulö zumange nibadu ia, eluahania itehegö waʼaurinia khö ndra talifusönia niha Keriso.​—4Mo 15:​5, 7; Fil 2:​17.

• Sumange nifazaule.

  Ba wameʼe sumange daʼa, ibeʼe dangania ere ba narö danga zameʼe sumange si no mololohe sumange andrö, ba ifazaule, mazui ere andrö zamazaule sumange daʼö. Mufalua daʼö ba wangoromaʼö wa sumange andrö mubeʼe ia khö Yehowa.​—3Mo 7:​30.

• Sumange nitunu.

  Urifö nibaliʼö sumange (sawi si matua, biri-biri si matua, nambi si matua, fune mazui ono marafadi) nitunu fefu ba naha wanunu sumange khö Lowalangi. Tebai ihalö dana khönia moroi ba gurifö andrö niha sameʼe sumange.​—2Mo 29:18; 3Mo 6:9.

• Sumange somuhua.

  Gitö somuhua nifaruka ba wamagule ba no idaʼi-daʼi manö waʼakhozi irege taraso waʼomuhua. Sumange somuhua nifazökhi moroi ba zi öfa ngawalö, laʼogunaʼö daʼa ba nose Lowalangi hegöi ba gosali. Ero sihulö wongi hegöi ba zi bongi, latunu zumange somuhua andre ba naha wameʼe sumange si so ba Nahia Niʼamoniʼö. Ba Ngaluo Wangatulö, latunu ia ba Nahia Wondrege Niʼamoniʼö. Sumange somuhua andre laʼamaedolagö ia fangandrö nono mbanua Lowalangi samati ba sangomusoiʼö tödönia. Lö muʼandrö ba niha Keriso wanunu sumange somuhua.​—2Mo 30:​34, 35; 3Mo 16:13; Fam 5:8.

• Suna.

  Fanaba uli ba ndra matua. Lö tola löʼö ifalua daʼa Aberahamo hegöi ngaʼötönia, hizaʼi lö muʼandrö ba niha Keriso wamalua daʼö. Ba zi hauga ngawua ayati, eluaha nisuna ha nifoʼamaedola.​—1Mo 17:10; 1Ko 7:​19; Fil 3:3.

• Superskripsi.

  Fehede famasao ba zinunö, samatunö haniha zanura, hewisa waö-waönia, musik niʼogunaʼö mazui hezo muʼogunaʼö ba hadia gohitö dödö zinunö daʼö.​—Faigi superskripsi  Zinunö 3, 4, 5, 6, 7, 30, 38, 60, 92, 102.

• Syekel.

  Suʼa-suʼa waʼabua hegöi hörö gefe niʼogunaʼö niha Heberaiʼo. Faʼabuania 11,4 g (0,403 ons; 0,307 ons troy). Ngawua wehede ”syekel naha niʼamoniʼö” te muʼogunaʼö ia ba wotandrösaigö faʼabuania si tebai tebulö moloʼö faʼabua niʼogunaʼö ba nose Lowalangi. Te so göi syekel ba zi sambua famatörö (faböʼö moroi ba syekel si toʼölö) mazui faʼabua niʼogunaʼö ba gödo razo.​—2Mo 30:13.

• Syeol.

  Ngawua wehede li Heberaiʼo si fagölö eluaha ba li Yunani ”Hades”. Lafoʼeluaha wehede andre tobali ”Lewatö” (ebua hurufo si oföna) ba wangoromaʼö wa manandrösa daʼa ba lewatö niha sato.​—1Mo 37:35; Si 16:10; Hal 2:​31 (simanö göi nis.).

T

• Taʼunö.

  Tola daʼö geluahania no taʼunö mboto mazui no manawö oroisa sanandrösa ba gamuata. Eluaha ngawua wehede daʼa ba Zura Niʼamoniʼö yaʼia daʼö hadia ia zi lö fatema mazui si taʼunö moloʼö Oroisa Moze. (3Mo 5:2; 13:45; Mat 10:1; Hal 10:14; Ef 5:5)​—Faigi LÖ TAʼUNÖ.

• Talenta.

  Fanuʼa sabölö ebua ba wanuʼa faʼabua, daʼa göi hörö gefe niʼogunaʼö niha Heberaiʼo. Faʼabuania fagölö ira zi 34,2 kg (75,5 pon; 91,75 pon troy; 1.101 ons troy). No ide-ide talenta Yunani, ba faʼabuania mato 20,4 kg (44,8 pon; 54,5 pon troy; 654 ons troy). (1Ng 22:14; Mat 18:24)​—Faigi Lamp. B14.

• Tamo.

  Urifö si tewuʼa-wuʼa, ba ebua sibai ngawawara. Moloʼö Oroisa Moze, tola muʼa damo. No sambua famakao lawaʼö niha na tohare ngawawa damo ba wemanga gofu hadia ia zi so fönara.​—2Mo 10:14; Mat 3:4.

• Tamusi.

  (1) Töi lowalangi niʼeʼesi ndra alawe Heberaiʼo si no mondröi sindruhu. So zangumaʼö wa Tamusi andrö razo, si tobali lowalangi me no aefa mate ia. Ba nisura niha Sumeri, mufotöi Tamusi andre Dumuzi ba muʼamaedolagö ia tuho dödö ratu fangatabö, yaʼia daʼö Inana (Istar nifosumange niha Mbabilona). (Hez 8:​14) (2) Töi mbawa si 4 ba zura mbaŵa agama Yahudi me no aefa teʼoloiʼö ira ba Mbabilona, baŵa si 10 ba zura mbaŵa si toʼölö laʼogunaʼö ira niha Yahudi, saekhu ba dalu mbaŵa si Önö irugi talu mbaŵa si Fitu.​—Faigi Lamp. B15.

• Tandra.

  Gama-gama, nifalua, salua, mazui sahöli-höli dödö niforomaʼö föna zato, si so eluaha mazui ha nifoʼamaedola, tola manö ngawalö zi no so mazui si lö ara tö so.​—1Mo 9:​12, 13; 2Ra 20:9; Mat 24:3; Fam 1:1.

• Tandra sahöli-höli dödö.

  Salua mazui tandra sahöli-höli dödö si töra moroi ba waʼabölö niha ba lawaʼö wa so danö böʼö si pade samalua daʼa. Itaria iʼogunaʼö Sura Niʼamoniʼö ngawua wehede simane ”tandra” mazui ”ngawalö zahöli-höli dödö” ba fagölö geluahara.​—2Mo 4:​21; Hal 4:​22; Heb 2:4.

• Tandra wolulu faʼauri niʼamoniʼö.

  Ngaʼörö ganaʼa si sökhi si no lahaogö wanura ngawua wehede ba li Heberaiʼo ”Yehowa andrö niʼamoniʼö”. Ngaʼörö daʼa labeʼe föna mbala högö gere sebua. (2Mo 39:30)​—Faigi Lamp. B5.

• Tandru.

  Tandru gurifö niʼogunaʼö si tobali naha nidanö nibadu, fanikha, tawa, kase, ba so ösa zi tobali torofe niʼogunaʼö ba musik mazui ba wameʼe tandra. (1Sa 16:​1, 13; 1Ra 1:​39; Hez 9:2) Asese muʼamaedolagö ”dandru” andre ba waʼabölö, fokalaisi ba faʼamöna.​—5Mo 33:17; Mi 4:​13; Zak 1:​19.

• Tandru si so ba naha wanunu sumange.

  Si hulö dandru sangoro tanö baero ba zi öfa watalinga naha wanunu sumange. (3Mo 8:​15; 1Ra 2:​28)​—Faigi Lamp. B5 ba B8.

•  Tarataro.

  Ba Mbuku Niʼamoniʼö Yunani Niha Keriso, eluaha ngawua wehede daʼa yaʼia daʼö fangailasi, hulö nikuru ba gurunga. Ba daʼö nahia ndra malaʼika si lö moloʼö me götö Noakhi, hulö no mufazaumba ira. Ba 2 Fetero 2:​4, kata kerja tartaroo eluahania ”mufazaumba ba Darataro”. Hizaʼi, tenga daʼö geluahania mufazaumba ’ndra malaʼika sebua horö’ ba nahia nifotöi Tarataro moloʼö nifaduhusi tödö niha baero (yaʼia daʼö kurunga ba narö danö sogömi-gömi, naha lowalangi sambö tefosumange). Eluaha sindruhunia yaʼia daʼö iʼailasi ira Lowalangi moroi ba dadaomara salawa ba zorugo, irege hulö ba nahia fondrege zogömi-gömi so ira ba tebai laʼila gohitö dödö Lowalangi andrö solakhömi. Lö tötönaföra saʼae börö me iwaʼö Sura Niʼamoniʼö wa mufakiko ira sagötö faʼara, fao ira khö Gafökha Satana, samatörö yaʼira. Börö daʼö, eluaha Tarataro yaʼia daʼö fangailasi nitörö ndra malaʼika samadaö. Tarataro andre lö fagölö geluahania ba ”mbaho sabakha sibai” nitutunö ba Wamaʼeleʼö 20:​1-3.

• Tawöla amabuʼula.

  Feti nifazökhi moroi ba geu akasia nifoʼuli anaʼa, niʼiröʼö ba Nahia Wondrege Niʼamoniʼö ba nose Lowalangi. Ba gafuriata, labeʼe ba Nahia Wondrege Niʼamoniʼö ba gosali nifazökhi Zelomo. Lagö-lagönia tefazökhi moroi ba ganaʼa ba so darua kerubi yawa ba dete si no faoma fatahö. Ösinia sabölö moguna yaʼia daʼö kara si dua ngaʼörö ba no tesura misa zi Fulu Oroisa. (5Mo 31:26; 1Ra 6:​19; Heb 9:4)​—Faigi Lamp. B5 ba B8.

• Tebeti.

  Töi mbaŵa si 10 ba zura mbaŵa agama Yahudi me no aefa teʼoloiʼö ira ba Mbabilona, baŵa si 4 ba zura mbaŵa si toʼölö laʼogunaʼö niha Yahudi. Aekhu ia ba dalu mbaŵa si Felendrua irugi talu mbaŵa si Sara. Baŵa daʼa si toʼölönia mufotöi ia ”baŵa si 10”. (Est 2:16)​—Faigi Lamp. B15.

• Terafi.

  Lowalangi mazui adu nösi nomo. Itaria, laʼogunaʼö terafi ba wangandrö tandra. (Hez 21:​21, nis.) So zi hulö niha, ba so göi zide-ide. (1Mo 31:34; 1Sa 19:​13, 16; nis.) Arkeologi nisöndra ba Mezofotamia zangoromaʼö wa niha sangokhögö adu terafi andre zanema ondröita zatua. (Te daʼö mbörö wa ihalö Rakhela terafi namania.) Lö hadöi goi-goi simane daʼö ba ndraono Gizaraʼeli. Hewaʼae simanö, so zamosumange terafi ba gotalua ndraono Gizaraʼeli ba götö ndra sanguhuku hegöi razo-razo, ba tefarahu ia ba gama-gama nidudugö razo si lö faröi sotöi Yosia.​—Sangu 17:5; 2Ra 23:24; Hos 3:4.

• Tisiri.​—

  Faigi ETANI ba Lamp. B15.

• Töla geu.

  Niʼogunaʼö ba ngawalö soi na laʼetuʼö hukuma faʼamate mazui laforomaʼö mboto niha si mate föna niha sato si tobali famangelama ba danö böʼö, mazui ba wangailasi. Niha Asiria si tehöngö ba waʼafaito na fasuwö, laʼogunaʼö döla geu satarö bawa, lafahö dalu niha niʼosawuyura irege atöla ofeta ba dötöʼa, aefa daʼö laröi manö ba döla geu daʼö. Hizaʼi, ba huku niha Yahudi, niha samalua amuata fondrege waʼalösökhi, simane fangoʼaya Lowalangi mazui famosumange adu, oföna ua latebu faoma kara irege mate, aefa daʼö latawi gamatelania ba döla geu mazui ba hogu geu, si tobali famangelama ba niha böʼö. (5Mo 21:​22, 23; 2Sa 21:​6, 9) Itaria lafalua ira niha Romawi, laböbö niha nifakaora ba döla geu irege tola auri ia nasa ba zi hauga hari tö, ba mate saʼae ba gafuriata börö waʼafökhö, owökhi dödö, olofo, ba aukhu zino. Salua tanö böʼö, simane me laʼetuʼö hukuma faʼamate khö Yesu, laʼosö danga awö gahe niha nifakaora ba döla geu. (Luk 24:20; Yoh  19:​14-​16; 20:25; Hal 2:​23, 36)​—Faigi TÖLA GEU FAMAKAO.

• Töla geu famakao.

  Ba li Yunani, yaʼia daʼö stauros, eluahania töla geu sadölö-dölö, simane niʼogunaʼö ba wamunu Yesu. Lö hadöi dane-dane saro wa ngawua wehede Yunani andrö eluahania röfa simane tandra niʼogunaʼö ba agama niha baero ba zi hauga ngaotu fakhe fatua lö tumbu Keriso. Tefaudu sibai wangogunaʼö ngawua wehede ”töla geu famakao” andre ba gohitö dödö wa muʼogunaʼö ngawua wehede stauros, börö me muʼogunaʼö ngawua wehede daʼa sanandrösa ba wamakao, faʼabu dödö hegöi fangoʼaya nitaögö ndra nifahaʼönia. (Mat 16:24; Heb 12:2)​—Faigi TÖLA GEU.

• Töla zukhu.

  Daʼa danömö sauri ba zoya idanö. Tanömö sasese muʼogunaʼö ba ayati yaʼia daʼö Arundo donax. (Yob 8:​11; Yes 42:3; Mat 27:29; Fam 11:1)​—Faigi TÖLA ZUKHU FANUʼA.

• Töla zukhu fanuʼa.

  Töla zukhu mazui siʼo fanuʼa, faʼanaunia önö siʼu yaʼia daʼö 2,67 m (8,75 kaki) moloʼö siʼu si toʼölö, ba 3,11 m (10,2 kaki) moloʼö siʼu sanau. (Hez 40:​3, 5; Fam 11:1)​—Faigi Lamp. B14.

• Torofe.

  Fakake musik niwuwusi nifazökhi moroi ba ziʼöli, niʼogunaʼö ba wameʼe tandra hegöi na fa-musik. Moloʼö 4 Moze 10:​2, ibeʼe goroisania Yehowa enaʼö lafazökhi dombua dorofe moroi ba wirö niʼogunaʼö ba wameʼe tandra si tohude, simane ba wangowuloi iraono Gizaraʼeli, ba ginötö mofanö ira hegöi si tobali tandra wasuwöta. Te no adölö-dölö dorofe andre, tenga simane ”torofe nifazökhi moroi ba dandru” gurifö. Ba gotalua fakake zinunö niʼogunaʼö ba gosali, so dorofe si lö mututunö hezo moroi tefazökhi ia. Li dorofe andre hulö igoʼö-goʼö wehede fanguhuku moroi khö Yehowa mazui salua si tohude tanö böʼö börö Lowalangi.​—2Ng 29:26; Esr 3:​10; 1Ko 15:52; Fam 8:7–​11:15.

• Turia somuso dödö.

  Eluahania ba Mbuku Niʼamoniʼö Yunani Niha Keriso yaʼia daʼö turia somuso dödö sanandrösa ba Wamatörö Lowalangi hegöi fangorifi nitema börö me mamati khö Yesu Keriso.​—Luk 4:​18, 43; Hal 5:​42; Fam 14:6.

U

• Uliho.

  Uli mbua nowi si no mufasafi moroi ba hunö si tola muʼa, si hombo na mutafi hegöi na muböbörö. Uliho andre asese muʼamaedolagö ia si lö guna ba si lö karua.​—Si 1:4; Mat 3:​12.

• Una.

  Kara si sökhi, kara aki sabeʼe mazui kara kalisedo sogara-gara. Ba gara daʼa so laʼa-laʼa safusi si no mufasoli-soli faoma laʼa-laʼa saitö, cokelat, soyo, sohawu-hawu mazui sowugeʼe. Mubeʼe gara daʼa ha ba mbaru sebua niʼogunaʼö gere sebua.​—2Mo 28:​9, 12; 1Ng 29:2; Yob 28:16.

• Ungo Nidanö Oiferati.

  Ungo nidanö fondrege zanau ba soguna sibai tanö raya gaekhula Asia, sambua moroi ba zi dombua ungo nidanö si so ba Mezofotamia. Ungo nidanö daʼa latötöi ia si oföna sibai ba 1 Moze 2:​14, sambua moroi ba gotalua zi öfa ungo nidanö samasui Kabu Edena. Ungo nidanö daʼa zi tobali ola tanö yöu Gizaraʼeli. (1Mo 15:18; Fam 16:12)​—Faigi Lamp. B2.

• Urimi hegöi Tumimi.

  Gama-gama niʼogunaʼö ba wamalua dahö-dahö, niʼogunaʼö gere sebua ba wangalui somasi Yehowa, ba ginötö ibeʼe wanema li Yehowa ba wanofu-nofu soguna ba nono mbanuania. Tobali balu-balu dötöʼa gere sebua na möi ia bakha ba nose Lowalangi. Te lö laʼogunaʼö saʼae Gurimi hegöi Tumimi me no aefa ladudugö Yeruzalema ira niha Mbabilona.​—2Mo 28:30; Neh 7:​65.

 Y

• Yaduhu.

  ”Yaʼitörö zimanö”, mazui ”hasambalö”. Ngawua wehede daʼa moroi ba li Heberaiʼo aman, eluahania ”lö faröi, tola mufaduhusi tödö”. Mutötöi ”yaduhu” tandra waʼafao dödö ba hölu, fangandrö mazui ngawalö wehede. Ba mbuku Wamaʼeleʼö, muʼogunaʼö ngawua wehede daʼa si tobali famalala döi Yesu.​—5Mo 27:26; 1Ng 16:36; Fam 3:​14.

• Yakobo.

  Ono matua khö Gizaʼaki hegöi Rebeka. Ba gafuriata, ibeʼe töinia Lowalangi, Izaraʼeli. Tobali ia tua soi Gizaraʼeli (nifotöi iraono Gizaraʼeli, ba gafuriata lafotöi niha Yahudi). So khönia 12 nono matua, ba fao khöra ngaʼötöra ba wamasindro si 12 mado ndraono Gizaraʼeli. Lö tebulö muʼogunaʼö döi Yakobo ba soi mazui ba ndraono Gizaraʼeli.​—1Mo 32:28; Mat 22:32.

• Yedutuno.

  Lö muʼila sibai mutatugöi geluahania, si so ba superskripsi Zinunö 39, 62, ba 77. Superskripsi daʼa yaʼia daʼö fanuturu lala ba wanunö mazui ba woloʼö-loʼö sinunö, te fanuturu lala sanandrösa ba lagu mazui fakake musik sedöna muʼogunaʼö. Börö me so samösa niha Lewi zi tobali tuka musik yaʼia daʼö Yedutuno, tola manö moʼamakhaita khönia hegöi ba ndraononia lagu woʼanunöisi mazui fangogunaʼö fakake musik.

• Yehowa.

  Ngawua wehede niʼogunaʼö ba li Nias ba wamoʼeluaha Tetragramaton (töi Lowalangi nisura ba zi öfa hurufo Heberaiʼo), töra 7.000 kali tesöndra ia ba Zura Niʼamoniʼö si no mufoʼeluaha andre.​—Faigi Lamp. A4 ba A5.

• Yehuda.

  Ono Yakobo ono matua numero öfa khö woʼomonia Lea. Me arakhagö mate ia, mamaʼeleʼö Yakobo me ifadölö ia ba naha wemörönia wa samösa dania moroi ba ngaʼötö Yehuda zi tobali samatörö sabölö, ba mamatörö ia sagötö faʼara. Me möi Yesu ba gulidanö ba tobali ia ngaʼeu niha, moroi ba ngaʼötö Yehuda iʼotarai. Muʼogunaʼö göi döi Yehuda tobali mado, ba afuriatania mubaliʼö töi ba wamatörö. Famatörö Yehuda göi lafotöi ia famatörö tanö raya, so ba daʼö zi dombua mado Gizaraʼeli, yaʼia daʼö Yehuda ba Beniami, awö ndra ere hegöi niha Lewi. Banua Yehuda yaʼia daʼö tanö raya mbanua daʼö farahu Yeruzalema hegöi osali Lowalangi.​—1Mo 29:35; 49:10; 1Ra 4:​20; Heb 7:​14.

• Yobeli.

  Döfi Yobeli yaʼia daʼö döfi si 50, muʼerai ia me larugi Danö Amabuʼula iraono Gizaraʼeli. Ba ndröfi Yobeli, tebai mutanö zinanö ba muʼefasi niha Heberaiʼo niʼosawuyu. Mufangawuli khöra danö ondröita si no lafamawa. Tola göi muwaʼö döfi Yobeli andrö döfi wangowasaini, döfi wangefa börö me larasoi mangawuli waʼohahau dödö simane ba zilalö me awena ifazökhi ira Lowalangi.​—3Mo 25:10.

• Yunani.

  Tola manandrösa ia ba li niʼogunaʼö niha Yunani; tola göi manandrösa ia ba niha Yunani sindruhu mazui ba daʼö moroi zi fahatö khöra. Ba Mbuku Niʼamoniʼö Yunani Niha Keriso, tenga ha sambua geluaha ngawua wehede daʼa, hizaʼi fefu niha si tenga Yahudi mazui niha soloʼö li Yunani hegöi si toʼölö mufalua ba mbanua daʼö.​—Yoe 3:6; Yoh 12:20.

Z

• Zeo.

  Daʼa lowalangi sabölö tefolakhömi ba gotalua lowalangi tanö böʼö nifosumange niha Yunani. Me so ba Lisitera Mbaranaba, lawalinga Zeo ia. Ba zi no musura me föna nisöndra sahatö ba Lisitera, so ngawua wehede ”ere khö Zeo” hegöi ”Zeo lowalangi luo”. Ba göfa nitörö Waulo iʼotarai Hulo Malata, so dandra ”Ono Matua si Faero khö Zeo”, yaʼia daʼö Kasitoro ba Folu.​—Hal 14:12; 28:11.