FANOFU 7
Hadia Nifaʼeleʼö Zura Niʼamoniʼö Salua ba Ginötö si So Yaʼita?
”Maoso dania zi sambua soi isuwö soi böʼö, simanö göi zalua ero sambu-sambua famatörö . . . Daʼö fefu awena böröta wamakao.”
”Ato dania zamaʼeleʼö sofaya samaelungu niha sato. Börö me tedou waʼalösökhi, ato dania zi taya faʼomasi.”
”Na mirongo so wasuwöta salua misa, böi miʼataʼufi. Hasambalö alua daʼö, hizaʼi tenga nasa amozuania.”
”Alua ndruru danö sabölö-bölö, lofo sabölö-bölö hegöi ngawalö wökhö. Alua dania zihokha mbu niha hegöi tandra sahöli-höli dödö moroi ba mbanua si yawa.”
”Böi zi lö aboto ba dödöu, so dania mbaŵa si lö sökhi sabua fanaögö ba ngaluo safuria andre. Amuata niha ba daʼö ha tana khöra laʼalui, sangomasiʼö anaʼa, sanuno yaʼira, sangosebua, sangoʼaya, si lö mamondrongo li zatua, si lö mangila mangandrö saohagölö, si faröi, si lö mangomasiʼö awöra, si lö fahasara dödö, samöbögö si lö duhu, si lö fanaha tödö, safaito, si lö mangomasiʼö si sökhi, si manga mböli, sabeʼe högö, si fayawa, sangomasiʼö isö-isö dödöra moroi ba waʼomasira Lowalangi, hulö soloʼö khö Lowalangi ira wamaigida ba no sangosilöʼögö faʼabölönia andrö.”
