Sura Niʼamoniʼö andre fehede Lowalangi ba moguna ia khöda. Moguna tafahaʼö ita ba daʼö enaʼö aboto ba dödöda Zamazökhi yaʼia. (Yohane 17:3; 2 Timoteo 3:16) Ba Zura Niʼamoniʼö, iʼombakhaʼö gohitö dödönia Yehowa ba niha hegöi ba gulidanö si tobali nahia waʼatoröira.—1 Moze 3:15; Famaʼeleʼö 21:3, 4.

Lö hadöi buku tanö böʼö si tola mondrönisi dödö niha ba zi sökhi baero Zura Niʼamoniʼö. Ifarou ita Sura Niʼamoniʼö ba woloʼö amuata Yehowa simane faʼomasi, faʼahakhö dödö ba faʼasökhi dödö. Ibeʼe göi wanötöna, sanolo niha enaʼö tola lataögö gabula dödö sebua. Ifatunö nasa khöda Sura Niʼamoniʼö hadia manö zalua ba gulidanö si lö tefaudu ba gohitö dödö Lowalangi soʼahonoa.—Sinunö 119:105; Heberaiʼo 4:12; 1 Yohane 2:15-17.

Ba wamobörö, tesura Zura Niʼamoniʼö andre ba li Heberaiʼo, Aramo hegöi Yunani. Iadaʼa, no mufoʼeluaha Zura Niʼamoniʼö, he si no awai mazui si ha matonga ba zi töra 3.000 ngawalö li. Iʼotarai mböröta, Sura Niʼamoniʼö andre buku sabölö oya mufoʼeluaha ba mubeʼe ba niha. Lö moguna ahöli dödöda ba daʼö, börö me no ifaʼeleʼö Sura Niʼamoniʼö, ”Ba teturiaigö dania Wamatörö Lowalangi andrö [tuho siföföna ba Zura Niʼamoniʼö], turia somuso dödö ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre.”—Mataiʼo 24:14.

Börö me aboto ba dödöma wa moguna sibai duria si so ba Zura Niʼamoniʼö, andrö wa maʼameʼegö tödö sibai wamoʼeluaha mangawuli nösinia. Aboto ba dödöma wa no tobali noro dödö sebua ba wamaʼema turia Zura Niʼamoniʼö ba lala si tefaudu. Teʼodane-dane wamoʼeluaha daʼa ba edisi New World Translation of the Holy Scriptures (Buku Niʼamoniʼö Famoʼeluaha Gulidanö si Bohou) si no mufazökhi töra ba zi 60 fakhe silalö. Daʼö Zura Niʼamoniʼö si sökhi ba si oföna sibai mufazökhi. Hizaʼi, me no aefa ngafulu fakhe, tebulö ngawua wehede sasese muʼogunaʼö ba li Inggris. Andrö wa lahalö gangetula ira Panitia Samoʼeluaha Sura Niʼamoniʼö Gulidanö si Bohou ba wamoʼeluaha mangawuli fefu nösinia. Ohitö dödöma yaʼia daʼö enaʼö fagölö nösinia ba li siföföna, aoha wombaso hegöi fangila eluahania. Ba Lampiran, so faosatö ”Goi-Goi ba Wamoʼeluaha Sura Niʼamoniʼö”, ”Si No Tehenaigö ba Edisi Daʼa”, ba ”Hewisa Wa Tola Ofeta Khöda Zura Niʼamoniʼö”. Ba faosatö daʼa itutunö khöda hadia manö zi tebulö nifazökhi ba edisi daʼa.

Niha sangomasiʼö Lowalangi Yehowa hegöi samosumange yaʼia, omasi ira na so Daromali Lowalangi si no mufoʼeluaha salio aboto ba dödö ba si tefaudu. (1 Timoteo 2:4) Börö daʼö, mahenaigö edisi revisi daʼa ba li Inggris, ba maʼera-era enaʼö mufoʼeluaha edisi daʼa ba ngawalö li. Matötöna ba mangandrö ndraʼaga enaʼö Buku Niʼamoniʼö edisi daʼa, so gunania khömi, yaʼami sombaso, samorege ba ’wangalui Lowalangi . . . ba misöndra ia’.—Halöwö Zinenge 17:27.