Atulö sibai wehede daʼö hewaʼae na lö hadöi saʼae Sura Niʼamoniʼö si oföna tesura mböröta, he Buku Niʼamoniʼö Heberaiʼo hegöi Aramo a, simanö göi Mbuku Niʼamoniʼö Yunani Niha Keriso. Na simanö, hadia mbörö wa faduhu dödöda wa sindruhu-ndruhu tefaudu nösi Zura Niʼamoniʼö iadaʼa ba nösi zura si oföna tesura mböröta si no iʼehehaini Lowalangi?

Tola faduhu dödöda wa Sura Niʼamoniʼö si so iadaʼa tefaudu ba nösi zura si oföna tesura, börö me no ihonogöi Lowalangi iʼotarai mböröta wa hasambalö mufuli musura nösinia. b Duma-dumania, iʼoroisi Yehowa ba ndraono Gizaraʼeli enaʼö lafuli lasura Goroisa Moze, soguna khöra samösa. (5 Moze 17:18) Ibeʼe göi Lowalangi noro dödö ba niha Lewi enaʼö larorogö Goroisa Moze ba lafahaʼö daʼö ba ndraono Gizaraʼeli. (5 Moze 31:26; Nehemia 8:7) Me no teʼoloiʼö niha Yahudi ba Mbabilona, ibörögö so ndra sanura (Soferim). (Esera 7:6) Lua-luania, monönö waʼoya mbuku si no musali moroi ba mbuku si 39 andrö si so ba Mbuku Niʼamoniʼö Heberaiʼo.

Yaʼira sanura lahaogö laʼosisiʼö wanura ösi mbuku andrö ba zi hauga ngaotu fakhe. Me Abad Pertengahan, so mato hadauga niha Yahudi sanohugö halöwö fanura andrö. Lafotöi ira Kaum Masoret. Ösi zura siföföna si no ahori lasura ba wamobörö yaʼia daʼö Kodeks Leningrad, iʼotarai me 1008/1009 M. Hizaʼi me  pertengahan abad si 20, no lasöndra mato 220 nösi Zura Niʼamoniʼö mazui akhökhölania ba gotalua Ngaʼölu Nasi si Mate. Töra saribu fakhe me no lafazökhi nösi Zura Niʼamoniʼö andrö fatua lö lafazökhi Kodeks Leningrad. Me lafaedogö Ngaʼölu Nasi si Mate andrö ba Kodeks Leningrad, so sambua zoroma, yaʼia daʼö fagölö nösinia, hewaʼae na faböʼö ösa ngawua wehede niʼogunaʼö ba Ngaʼölu Nasi si Mate faoma Kodeks Leningrad.

Hewisa zi 27 buku ba Mbuku Niʼamoniʼö Yunani Niha Keriso? Buku daʼö so ösa nisura ndra sinenge Yesu Keriso ba so göi ndra nifahaʼö ba götö siföföna. Simane ira niha Yahudi sohalöwö ba wanura, lafalua göi zimane daʼö ira niha Keriso me götö siföföna. (Kolose 4:16) Hewaʼae me luo daʼö, iforege Kaisaro Romawi sotöi Diokletianus hegöi niha tanö böʼö ba wangohori buku niha Keriso, hizaʼi so manö nasa irugi maʼökhö nösi zura si oföna tesura hegöi akhökhölania si hauga ribu faʼoya.

Mufoʼeluaha göi ba li tanö böʼö zi no lasura ira niha Keriso. Ba wamobörö, mufazökhi wamoʼeluaha Zura Niʼamoniʼö ba li niha me föna simane li Armenia, Etiopia, Georgia, Koptik, Latin hegöi Siria.

Lö fagölö-gölö ngawua wehede niʼogunaʼö ba Zura Niʼamoniʼö nisura me mböröta. Tobali, hewisa wa tola taʼila nösi zura si oföna tesura?

Fagölö ira simane salua andre: Iʼandrö si samösa guru ba nono sekolania si daotu enaʼö lafuli lasura sambua bab moroi ba zi sambua buku. Hewaʼae na taya ba gafuriata bab sindruhunia, ba na faoma mufaedogö nisura zi daotu no mege, tola muʼila hadia nösi mbuku siföföna. Hewaʼae na tola manö so zi fasala nisura ndraono sekola, hizaʼi lö duhu fagölö sibai zi fasala andrö khöra. Simane daʼö göi na lafagölösi ira niha sagatua-tua gakhökhöla Zura Niʼamoniʼö si oföna tesura awö zi no mufuli musura, tola lasöndra hadia manö zi fasala nisura ndra sanura, ba latatugöi hadia zindruhunia niwaʼö ba zura si oföna tesura.

Hadia faduhu dödöda wa tefaudu nösi zura nitemada ba Zura Niʼamoniʼö si oföna tesura? Imane si samösa niha satua-tua sotöi William H. Green sanandrösa ba Mbuku Niʼamoniʼö Heberaiʼo, ”Tola tamane, lö hadöi buku böʼö nisura me mböröta si tefaudu sibai wamaʼema yaʼia.” Sanandrösa ba Mbuku Niʼamoniʼö Yunani  Niha Keriso, sasese mufotöi Amabuʼula Li si Bohou, imane si samösa niha satua-tua ba Zura Niʼamoniʼö sotöi F. F. Bruce, ”Abölö oya dandra-tandra soʼamakhaita ba Gamabuʼula Li si Bohou moroi ba dandra-tandra soʼamakhaita ba mbuku nisura niha böʼö me föna, ba samösa lö hadöi si fabuʼa ba daʼö.” Imane nasa, ”Na lö moʼamakhaita ba agama menaʼö Gamabuʼula Li si Bohou andrö, tatu ato zi faduhu tödö wa sindruhu-ndruhu Sura Niʼamoniʼö daʼö.”

Ösi Zura Heberaiʼo: New World Translation of the Hebrew Scriptures (Buku Niʼamoniʼö Heberaiʼo Famoʼeluaha Gulidanö si Bohou), nifazökhi me 1953-1960, mufoʼeluaha ia moroi ba Biblia Hebraica nifaʼanö Rudolf Kittel. Ba gafuriata, mufuli mubohouni nösi zura Heberaiʼo andrö tobali Biblia Hebraica Stuttgartensia hegöi Biblia Hebraica Quinta, börö me so zi bohou si no laʼosisiʼö ba Ngaʼölu Nasi si Mate hegöi ba nösi zura tanö böʼö. So ba daʼö Kodeks Leningrad hegöi nisura ba gahe zura nihalö moroi ba mbuku tanö böʼö enaʼö tola lafaedogö nösinia, farahu ba daʼö Pentateukh Samaria, Ngaʼölu Nasi si Mate, Septuaginta Yunani, Targum Aram, Vulgata Latin hegöi Peshitta Siria. No mufareso göi nösi zura Biblia Hebraica Stuttgartensia hegöi Biblia Hebraica Quinta me mufaʼanö edisi revisi New World Translation (Famoʼeluaha Gulidanö si Bohou) si no so iadaʼa.

Ösi Zura Yunani: Ba gangohorita abad si 19, niha satua-tua sotöi B. F. Westcott hegöi F.J.A. Hort, lafaedogö nösi Zura Niʼamoniʼö awö gakhökhölania ba wamaʼanö ösi zura Yunani sabölö tefaudu eluaha ba nösi zura si oföna lasura. Ba dalu abad si 20, laʼogunaʼö daʼö ira Panitia Samoʼeluaha Sura Niʼamoniʼö Gulidanö si Bohou ba wamoʼeluaha. Laʼogunaʼö göi nösi zura papirus nifaʼanö me föna, te me abad si dua ba tölu M. Ba gafuriata, itugu oya nösi zura papirus. Baero daʼö, so nösi zura Yunani nifaʼanö Nestle faoma Aland, ba so göi nifaʼanö lembaga United Bible Societies si teʼodane-dane ba zi bohou laʼosisiʼö. So ösa niʼosisiʼöra andrö niʼogunaʼö ba edisi daʼa.

Moloʼö ösi zura Yunani andrö, tola muʼila wa so ösa ayati ba Mbuku Niʼamoniʼö Yunani Niha Keriso si so ba wamoʼeluaha siföföna sibai, simane King James Version, sindruhunia daʼö ninönö niha sanura mangawuli, ba lö hadöi daʼö ba nösi zura si oföna tesura. No muheta ayati-ayati daʼö ba Zura Niʼamoniʼö ösa. Hizaʼi, börö me no mutatugöi iʼotarai me abad si 16 hewisa wamaʼoli ayati si toʼölö ba ngawalö wamoʼeluaha Zura Niʼamoniʼö, andrö wa so ösa zi lö hadöi ösi ayati ba Zura Niʼamoniʼö. Ayati-ayati andrö yaʼia daʼö Mataiʼo 17:21; 18:11; 23:14; Mareko 7:16; 9:44, 46; 11:26; 15:28; Luka 17:36; 23:17; Yohane 5:4; Halöwö  Zinenge 8:37; 15:34; 24:7; 28:29; ba Roma 16:24. Ba edisi daʼa, so nisura ba gahe zura gamaudu ayati-ayati si lö hadöi ösi andrö.

Fehede sanau si tobali fangasiwai ba Mareko 16 (ayati 9-20), ba fehede sadogo-dogo fangasiwai ba Mareko 16, hegöi ngawua wehede ba Yohane 7:53–8:11, sindruhunia lö hadöi ba zura si oföna tesura. Börö daʼö, lö mubeʼe ba edisi daʼa ayati-ayati si lö atulö andrö. c

Ngawua wehede tanö böʼö göi lafaudugö ira niha sagatua-tua moloʼö ngawua wehede sabölö tefaudu eluaha ba nösi zura si oföna tesura. Duma-dumania, moloʼö ösi zura tanö böʼö, imane Mataiʼo 7:13, ”Mitörö mbawa göli sise-ise andrö, börö me ebua mbawa göli ba ebolo lala saekhu ba waʼatekiko.” Ba edisi Terjemahan Dunia Baru si no numalö, lö hadöi ’bawa göli’ ba ayati daʼö. Hizaʼi, me no muhaogö mufareso nösi zura si oföna tesura, sindruhunia so ngawua wehede ”mbawa göli” ba daʼö. Andrö wa mubeʼe ngawua wehede daʼö ba edisi daʼa. So nasa wamaudugö tanö böʼö si fakhili-khili, hizaʼi lö ebua sibai nibulöʼö, ba lö hadöi ngawua wehede samulöʼö oroisa sebua ba Daromali Lowalangi.