Murilis New World Translation of the Christian Greek Scriptures (Buku Niʼamoniʼö Yunani Niha Keriso Famoʼeluaha Gulidanö si Bohou) me 1950 ba li Inggris, simanö göi New World Translation of the Holy Scriptures (Buku Niʼamoniʼö Famoʼeluaha Gulidanö si Bohou) si no ahori mufaʼanö, lafazökhi ia me 1961. Iʼotarai daʼö, ngafulu zuta zombaso ba zi töra 210 ngawalö li, no latema mbua moroi ba wamoʼeluaha Mbuku Niʼamoniʼö si tefaudu ba saoha fombaso andre.

Hizaʼi, me no numalö ginötö ba zi hauga wulu fakhe, ibörögö faböʼö geluaha ngawua wehede. Börö daʼö, aboto ba dödö Panitia Samoʼeluaha Sura Niʼamoniʼö Gulidanö si Bohou wa moguna lafalua wamohouni, enaʼö tofakha ba dödö zombaso ba ginötö daʼa. Börö daʼö, ba edisi daʼa no mufaböʼöni ngawua wehede hegöi lala wamaʼema yaʼia. Wa mufalua daʼö enaʼö:

• Laʼogunaʼö ngawua wehede si toʼölö ba salio aboto ba dödö niha. Ba wamoʼeluaha daʼa, no mufaböʼöni ngawua wehede me föna ba muʼogunaʼö ngawua wehede salio muʼila eluaha iadaʼa. So ngawua wehede si lö muʼila eluaha ba Zura Niʼamoniʼö Lembaga Alkitab Indonesia (LAI) ba li Nias. Duma-dumania ngawua wehede ”si so ba mbörö”, ato zi lö mangila eluahania iadaʼa. Andrö, ba Zura Niʼamoniʼö si no mufoʼeluaha andre, muʼogunaʼö ngawua wehede ”samaduhuʼö”. (Yesaya 43:10-12; 2 Timoteo 2:2) Lö laʼogunaʼö ngawua wehede ”furugö” börö me lö laʼila daʼö iraono si bohou ebua iadaʼa. Andrö wa muʼogunaʼö ngawua wehede ”tua”. (1 Moze 10:21; Heberaiʼo 7:4) Ngawua wehede ”beo” mufaböʼöni tobali ”pajak” börö me so geluahania tanö böʼö, yaʼia daʼö töi wofo ba Nias.—Esera 7:24; Mataiʼo 22:17.

  Ba Zura Niʼamoniʼö LAI li Nias, so ngawua wehede ”Yehowa ngahönö”. Ato zi lö mangila eluaha daʼö iadaʼa. Börö daʼö,  ba Zura Niʼamoniʼö si no mufoʼeluaha andre, ngawua wehede niʼogunaʼö yaʼia daʼö ”Yehowa samatörö saradadu zorugo”.—Yesaya 6:3; Zakharia 8:23.

• Lahaogö latutunö geluaha ngawua wehede ba Zura Niʼamoniʼö. Ba Zura Niʼamoniʼö LAI li Nias, ngawua wehede ”Syeol” ba li Heberaiʼo hegöi ”Hades” ba li Yunani lafoʼeluaha ia tobali ”banua tou”. Na ba li Nias, tola manö daʼö geluahania hulö nasa tola mowanua niha si no mate ba narö danö. Hizaʼi sindruhunia, Syeol hegöi Hades eluahania lewatö niha si no mate. Daʼö mbörö wa muʼogunaʼö ngawua wehede ”Lewatö” ba Zura Niʼamoniʼö si no mufoʼeluaha andre.—Sinunö 16:10; Halöwö Zinenge 2:27.

  Ba Zura Niʼamoniʼö LAI li Nias, iwaʼö ba daʼö wa Yesu andrö ’muforöfa ba zi dua rozi töla geu nifariwa’. Sindruhunia, ngawua wehede stauros moroi ba li Yunani eluahania töla geu. Ba daʼö mate Yesu, ba zi sara töla geu sadölö. Daʼö mbörö wa ngawua wehede ’töla geu’ niʼogunaʼö ba daʼa, börö me daʼö zi tefaudu ba wamoʼeluaha ngawua wehede li Yunani andrö.—Mataiʼo 27:31.

  Lö lafaböʼöni wangogunaʼö ngawua wehede ”bua” na sindruhu-ndruhu daʼö nitutunö. Hizaʼi, na muʼogunaʼö wehede daʼö ha niʼamaedolagö simane ba Zinunö 7:9 ba 26:2 hegöi Famaʼeleʼö 2:23, mufoʼeluaha ia moloʼö eluahania, yaʼia daʼö ”ösi dödö fondrege zabakha” mazui ”era-era fondrege zabakha”, ba mubeʼe ba gahe zura ngawua wehede ”bua”.

  Ngawua wehede ba li Heberaiʼo hegöi Yunani nifoʼeluaha tobali ”tawö” hegöi ”tandru”, lö lafoʼeluaha ia ero sambua ngawua wehede, hizaʼi lafoʼeluaha ia moloʼö waö-waö nitutunö. (5 Moze 32:14; Yobi 16:15) So ösa ngawua wehede simane daʼa nitutunö ba ”Geluaha Ngawua Wehede”.

• Itugu aoha wombaso. Sura Niʼamoniʼö LAI li Nias tesura ia ba hurufo me föna. Hizaʼi, lagu wanura hurufo daʼö iadaʼa lö laʼogunaʼö saʼae börö me abua wombaso yaʼia. Andrö wa lö muʼogunaʼö hurufo simane daʼö ba Zura Niʼamoniʼö nifoʼeluaha andre enaʼö aoha wombaso. Duma-dumania, ”soera” tobali ”sura”, ”Jehowa” tobali ”Yehowa”, ”Jesoe” tobali ”Yesu”, ”yadoehoe” tobali ”yaduhu”, ”samadoehoeʼö” tobali ”samaduhuʼö”, ba oya nasa danö böʼönia.

   Fefu zi no mubohouni ba Zura Niʼamoniʼö andre, no muʼohe ba wangandrö, muhaogö sibai wamoʼeluaha, ba lö laʼaohasi ba dödö halöwö si sökhi ba wamobörö si no lafalua ira Panitia Samoʼeluaha Sura Niʼamoniʼö Gulidanö si Bohou.

Ba Zura Niʼamoniʼö si no mufoʼeluaha andre, oya nisura ba gahe zura, yaʼia daʼö:

• ”Mazui” Famoʼeluaha tanö böʼö moroi ba li Heberaiʼo, Aramo hegöi Yunani sarakhagö fagölö eluaha.—1 Moze 1:2, nisura ba gahe zura soguna ba ngawua wehede ’faʼabölö Lowalangi’; Yosua 1:8, ”öfatou-tou tödöu”.

• ”Mazui te” Famoʼeluaha tanö böʼö si faböʼö eluaha moroi ba waö-waö nitutunö, hizaʼi tola nasa mufoʼeluaha ia simane daʼö.—1 Moze 21:6, ”fao ira khögu waʼiki”; Zakharia 14:21, ”niha Ganaʼana”.

• ”Sin.” Fangadogoiʼö moroi ba ngawua wehede ”sindruhunia”, yaʼia daʼö famoʼeluaha ero sambua ngawua wehede mazui eluahania siföföna ba li Heberaiʼo, Aramo hegöi Yunani.—1 Moze 30:22, ”manabina”; 2 Moze 32:9, ”sabeʼe högö”.

• Eluaha ba hadia mbörö wa lafotöi ia simane daʼö Eluaha döi (1 Moze 3:17, ’Adamo’; 2 Moze 15:23, ”Mara”); faʼabua hegöi suʼa-suʼa si no muzara-zara (Mataiʼo 25:15, ”talenta”); fehede fangali (1 Moze 49:25, ”Ia”); ba onönöta tanö böʼö si möi fanolo ba Lampiran hegöi Eluaha Ngawua Wehede.—Sangombakha 9:10, ”Lewatö”; Mataiʼo 5:22, ”Gehena”.

Ba ngaʼörö tanö föna, so duho ”Enaʼö Taʼila Nösi Daromali Lowalangi”, ifatunö ba daʼö dane-dane wamahaʼö Zura Niʼamoniʼö. Ba ngaʼörö tanö furi, so duho ”Famaʼoli Mbuku Zura Niʼamoniʼö”, ”Indeks Ngawua Wehede Zura Niʼamoniʼö”, ba ”Eluaha Ngawua Wehede Zura Niʼamoniʼö”. Eluaha Ngawua Wehede andre zanolo niha enaʼö aboto ba dödöra ngawua wehede si so eluaha ba Zura Niʼamoniʼö. Ba Lampiran A so duho-tuho, yaʼia daʼö: ”Goi-Goi ba Wamoʼeluaha Sura Niʼamoniʼö”, ” Si No Tehenaigö ba Edisi Daʼa”, ”Hewisa Wa Tola Ofeta Khöda Zura Niʼamoniʼö”, ”Töi Lowalangi ba Mbuku Niʼamoniʼö Heberaiʼo”, ”Töi Lowalangi ba Mbuku Niʼamoniʼö Yunani  Niha Keriso”, ”Tabel: Ira Samaʼeleʼö hegöi Razo-Razo Yehuda awö Razo Ndraono Gizaraʼeli”, ”Waö-Waö Waʼauri Yesu ba Gulidanö”. Ba Lampiran B so peta, tabel hegöi onönöta tanö böʼö si tola laʼogunaʼö ira niha sowölö-ölö ba wamahaʼö yaʼira ba Zura Niʼamoniʼö.

Ero famobörö Mbuku Zura Niʼamoniʼö, so duho-tuho moroi ba faza hegöi ayati soʼamakhaita, irege aboto ba dödö zombaso nösi mbuku andrö maʼafefu. Kolom si so ba gotalua ero sagörö, ba daʼö so referensi silang soʼamakhaita ba ayati tanö böʼö. Hizaʼi, ha ayati sabölö moʼamakhaita nifili.