Töi Lowalangi nisura ba zi öfa hurufo konsonan ba li Heberaiʼo יהוה, tesöndra arakhagö 7.000 kali ba Mbuku Niʼamoniʼö Heberaiʼo. Ba wamoʼeluaha daʼa, si öfa hurufo nifotöi Tetragramaton andre mufoʼeluaha ia tobali ”Yehowa”. Daʼö döi sabölö oya tesöndra ba Zura Niʼamoniʼö, töra moroi ba döi tanö böʼö. Hewaʼae oya laʼogunaʼö ira sanura Sura Niʼamoniʼö döi ba faka hegöi töi amalalata khö Lowalangi, simane ”Fondrege Zabölö”, ”Fondrege Zalawa”, ba ”Soʼaya”, hizaʼi ha Tetragramaton niʼogunaʼöra ba wanötöi töi Lowalangi.

Lowalangi Yehowa zameʼe ba dödö niha sanura Sura Niʼamoniʼö enaʼö laʼogunaʼö döinia. Duma-dumania, ibeʼe ba dödö Yoeli samaʼeleʼö ba wanura, ”Dozi soʼangaröfili töi Yehowa daʼö niʼorifi.” (Yoeli 2:32) Ibeʼe göi ba dödö zanura Sinunö, ”Yaʼaboto ba dödö niha wa ha yaʼugö zotöi Yehowa, ha yaʼugö Wondrege Zalawa ba gulidanö maʼasagörö.” (Sinunö 83:18) Ba mbuku Zinunö manö, so mato 700 kali tesöndra döi Lowalangi. Oya ngawua wehede puitis ba daʼö, niʼanunöisi ba nitötöi nono mbanua Lowalangi. Hizaʼi, hana wa lö hadöi töi Lowalangi ba zi hawaʼoya Sura Niʼamoniʼö si no lafoʼeluaha? Hana wa muʼogunaʼö ”Yehowa” ba wamoʼeluaha daʼa? Ba hadia geluaha döi Lowalangi, Yehowa?

Hana wa lö hadöi töi Lowalangi ba zi hawaʼoya Sura Niʼamoniʼö si no lafoʼeluaha? Oya ngawalö wanema linia. So zangumaʼö wa lö moguna saʼae so döi Lowalangi Fondrege Zabölö. Tanö böʼö, fao dödöra ba zi toʼölö lafalua ira niha Yahudi si lö omasi mangogunaʼö töi daʼö, ataʼu ira na teʼoʼaya döi Lowalangi. So göi zangumaʼö, börö me samösa lö sangila hewisa sibai wanötöi töi Lowalangi andrö, abölö sökhi laʼogunaʼö döi ba faka simane ”Soʼaya” mazui ”Lowalangi”. Hizaʼi, lö tefaudu wangera-ngera simane daʼö. Datafaigi hadia mbörö:

•   Niha sangumaʼö wa lö moguna saʼae so döi Lowalangi Fondrege Zabölö, sindruhunia lö laʼangeragö wa tesöndra döi Lowalangi ba zura siföföna si no lasali ba Daromali Lowalangi, farahu ba daʼö zi no lafazökhi fatua lö si tohare Keriso. Simane si no mufatunö mege, no ihonogöi Lowalangi enaʼö tesura döinia ba Daromalinia mato 7.000 kali. Ba daʼö aboto ba dödöda wa omasi ia na taʼila ba taʼogunaʼö döinia.

• Ira samoʼeluaha sangeheta töi daʼö ha börö me laʼameʼegö tödö zi toʼölö lafalua ira niha Yahudi, sindruhunia no olifu ira zabölö moguna. Hewaʼae lö omasi latötöi döi Lowalangi ira niha Yahudi sanali ösi Zura Niʼamoniʼö, hizaʼi lö laheta döi daʼö ba mbuku si no lasura. Ba ngaʼölu zura satua nisöndra ba Qumran, sahatö ba Nasi si Mate, oya tesöndra döi daʼö. So ösa zamoʼeluaha Sura Niʼamoniʼö samalalini töi Lowalangi faoma töi ba faka, yaʼia daʼö ”SOʼAYA” (lasura faoma hurufo segebua), irege daʼö zangoromaʼö wa so döi Lowalangi ba zura si oföna tesura. Sindruhunia, lafaduhuʼö wa tesöndra döi daʼö mato hauga ribu kali ba nösi Zura Niʼamoniʼö. Hizaʼi, hana wa aoha manö khöra ba wamalalini mazui ba wanayaigö töi Lowalangi ba Zura Niʼamoniʼö? Haniha zi so ba dödöra sanehegö khöra ba wombulöʼö töi daʼö? Ha yaʼira zangila.

• Hewaʼae so zangumaʼö wa tebai latötöi döi Lowalangi börö me lö laʼila hewisa zindruhunia wanötöi yaʼia, hizaʼi lö taha-tahara ba wanötöi töi ”Yesu”. Sindruhunia sa, ira nifahaʼö Yesu me abad siföföna faböʼö wanötöira töi Yesu, tenga simane fanötöi niha Keriso ba götö daʼa. Niha Keriso Yahudi te latötöi ia Yesyua. Na fanötöira ”Keriso”, te Masyiakh, mazui ”Mesia”. Niha Keriso sangogunaʼö li Yunani latötöi ia Iesous Khristos, na niha Keriso sangogunaʼö li Latin latötöi ia Iesus Christus. Börö wanuturu lala moroi khö Lowalangi, andrö wa musura döi daʼö ba li Yunani bakha ba Zura Niʼamoniʼö. Daʼa zangoromaʼö wa niha Keriso me abad siföföna latötöi döi Yesu simane sasese latötöi niha sato ba li Yunani. Simanö göi Panitia Samoʼeluaha Sura Niʼamoniʼö Gulidanö si Bohou, aboto ba dödöra wa tefaudu wangogunaʼö töi ”Yehowa”, hewaʼae na lö fagölö sibai wanötöi yaʼia simane fanötöi töi Lowalangi ba li Heberaiʼo me föna.

Hana wa ”Yehowa” niʼogunaʼö ba Wamoʼeluaha Gulidanö si Bohou? Ba li Indonesia, si öfa hurufo Tetragramaton (יהוה) lasura ba hurufo konsonan YHWH. Hulö simane ngawua wehede tanö böʼö nisura ba li Heberaiʼo me föna, lö hadöi hurufo vokal ba Tetragramaton. Me laʼogunaʼö li Heberaiʼo me föna ba wehedera sero  maʼökhö, aoha ba niha sombaso ba wonönö hurufo vokal si tefaudu.

Mato saribu fakhe me no awai lasura Mbuku Niʼamoniʼö Heberaiʼo, niha Yahudi sagatua-tua labeʼe gamakhoita sanandrösa ba dandra-tandra fanötöi ngawua wehede enaʼö laʼila hadia hurufo vokal niʼogunaʼö ba wombaso li Heberaiʼo. Hizaʼi, me luo daʼö ato niha Yahudi zi faduhu tödö wa tebai latötöi döi Lowalangi, andrö wa laʼogunaʼö döi amalalata si tobali fogati. Andrö me lasali Tetragramaton, hurufo-hurufo vokal moroi ba döi amalalata daʼö laʼorudugö ba zi öfa hurufo konsonan döi Lowalangi. Lua-luania, ba nösi zura si no mubeʼe tandra-tandra fanötöi ngawua wehede, lö oroma wa simane daʼö wanötöi töi Lowalangi ba li Heberaiʼo. So zangumaʼö wa fanötöi töi daʼö ”Yahweh”, so göi zi faböʼö bua gera-era. Ba Ngaʼölu Nasi si Mate, so ösa zura 3 Moze ba li Yunani, ba no mufoʼeluaha ba daʼö döi Lowalangi tobali Iao. Lawaʼö ira sanura ba li Yunani me föna wa fanötöi yaʼia Iae, Iabe, ba Iaoue. Hizaʼi, lö taʼila tatatugöi hezo zabölö atulö ba wanötöi yaʼia. Lö taʼila hewisa nono mbanua Lowalangi me föna ba wanötöi töi daʼö ba li Heberaiʼo. (1 Moze 13:4; 2 Moze 3:15) Hewaʼae simanö, lö aombö dödöda wa asese iʼogunaʼö döinia andrö Lowalangi na fahuhuo ia ba nono mbanuania, ba lö hadöi göi taha-tahara wangogunaʼö töi daʼö na fahuhuo ira khö Lowalangi hegöi ba niha tanö böʼö.—2 Moze 6:2; 1 Razo 8:23; Sinunö 99:9.

Na simanö, hana wa ”Yehowa” niʼogunaʼö ba wamoʼeluaha daʼa? Börö me no ara muʼogunaʼö döi Lowalangi andrö ba waö-waö li Nias.

Sura Niʼamoniʼö si oföna sibai ba li Nias mufazökhi me 1892 (Amabuʼula li si bohou) ba Amabuʼula li siföföna mufazökhi me 1911. Aefa daʼö me 1913, ahori lafaʼanö fefu nösi Zura Niʼamoniʼö  iʼotarai 1 Moze ofeta Wamaʼeleʼö. Tesöndra ba daʼö döi Lowalangi mato hauga ribu kali, yaʼia daʼö ”Yehowa”. Baero daʼö, tesöndra göi döi ”Yehowa” andrö ba zinunö niʼanunöisi ba gosali hegöi ba gama-gama nifalemba ba dowa. Ba daʼö oroma wa no ara muʼogunaʼö döi ”Yehowa” andrö ba zi hauga wulu fakhe faʼara.

Simane daʼö göi döi Lowalangi niʼogunaʼö ba li tanö böʼö. Duma-dumania, töi Lowalangi si oföna sibai tesöndra ba Zura Niʼamoniʼö li Inggris me 1530, ba Pentateukh nifoʼeluaha William Tyndale. Asese iʼogunaʼö ”Iehouah”. Itugu numalö ginötö ba tebulö li Inggris, andrö wa mufaudugö wanura töi Lowalangi ba li niʼogunaʼö iadaʼa. Duma-dumania me 1612, iʼogunaʼö ngawua wehede ”Iehovah” Henry Ainsworth ba mbuku Zinunö si no ifoʼeluaha. Aefa daʼö me 1639, laʼogunaʼö ”Jehovah” ba mbuku daʼö me lafuli lahaogö ba lafazökhi si fao ba Pentateukh. Me 1901, ira samoʼeluaha Sura Niʼamoniʼö American Standard Version, laʼogunaʼö ”Jehovah” ero tesöndra döi Lowalangi ba nösi zura li Heberaiʼo.

Hadia geluaha döi Yehowa? Ba li Heberaiʼo, töi Yehowa tehalö moroi ba kata kerja si no mufoʼeluaha tobali ”alua”, ba ato ndra sagatua-tua sangumaʼö wa töi Yehowa andrö bentuk kausatif (ngawua wehede sangoromaʼö wa yaʼia mbörö) ba li Heberaiʼo. Börö daʼö, aboto ba dödö Panitia Samoʼeluaha Sura Niʼamoniʼö Gulidanö si Bohou wa eluaha döi Lowalangi yaʼia daʼö ”Yaʼia Mbörö Wa Alua”. Faböʼö-böʼö niwaʼö ndra sagatua-tua irege lö taʼila tatatugöi wa ha daʼö geluaha satulönia. Hizaʼi, tefaudu sibai geluaha döi daʼö khö Yehowa börö me yaʼia Zomböi fefu hadia ia ba lö tebulö iʼoʼozui gohitö dödönia. Tenga ha asala ifazökhi mbanua si yawa awö danö hegöi ngawalö zonoso satua-tua, hizaʼi ifalua göi zomasi ia awö gohitö dödönia.

Tobali, eluaha döi Yehowa andrö tenga ha ndrege kata kerja si so ba 2 Moze 3:14, ”Ubaliʼö Ndraʼo Gofu Hadia Manö Zomasido.” Ambö ibotokhi geluaha döi Lowalangi fehede daʼö, ha sambua gamuata Lowalangi niforomaʼönia, yaʼia daʼö tola tobali ia gofu hadia ia ba wamalua ohitö dödönia, gofu hadia zalua. Hizaʼi, tenga ha ndrege daʼö geluaha döi Yehowa. Tola göi ifarou gomböila dangania enaʼö tobali ira gofu hadia ia ba wamalua ohitö dödönia.