Lö laʼowasaini ulang tahun ira Samaduhuʼö Yehowa, börö me faduhu dödöma wa lö omasi Lowalangi ba gowasa andrö. Hewaʼae lö niwaʼö ba Zura Niʼamoniʼö wa tebai laʼowasaini ulang tahun, hizaʼi no iforomaʼö Zura Niʼamoniʼö hadia manö zinangea taʼangeragö. Itolo göi ndraʼaga Zura Niʼamoniʼö enaʼö aboto ba dödöma hewisa wamaigi Lowalangi sanandrösa ba ulang tahun. Angeragö zi öfa ngawalö andre hegöi goi-goi Zura Niʼamoniʼö.

1.   Fangowasaini ulang tahun tehalö moroi ba wamahaʼö niha si tenga samosumange Lowalangi. Moloʼö Funk & Wagnalls Standard Dictionary of Folklore, Mythology, and Legend, mufalua gowasa andre börö me faduhu dödö niha wa ba ginötö luo ulang tahun zi samösa niha, ”tohare bekhu mazui malaʼika si lö sökhi ba wamakao niha si ulang tahun”. Itutunö göi ba mbuku andrö wa ”ba ginötö tohare ndra awö-awönia ba wamaʼema fehede famahowuʼö, tola telumöʼö ia”. Moloʼö buku The Lore of Birthdays, ba föna, mutöngöni sibai mbaŵa waʼatumbu andrö ”börö muʼogunaʼö ia ba wokhalaigö fozu waʼauri niha moloʼö ilmu perbintangan”. Imane nasa mbuku daö wa ”faduhu dödö niha me föna, wa so waʼabölö moroi ba lili niʼogunaʼö ba wangowasaini ulang tahun enaʼö tefondrondrongo wangandrö niha daʼö”.

    Hizaʼi, iʼelifi Sura Niʼamoniʼö niha sangogunaʼö waʼabölö mbekhu, mamaʼeleʼö, si fakelemu mazui ”tanö böʼönia soʼamakhaita ba daʼö”. (5 Moze 18:14, Terjemahan Dunia Baru; Galatia 5:​19-​21) Andrö wa ihuku Babilona me föna Lowalangi börö me laʼogunaʼö ilmu perbintangan ba wamaʼeleʼö. (Yesaya 47:11-15) Lö laʼalu-alui manö ira Samaduhuʼö Yehowa hezo moroi mböröta si toʼölö sasese lafalua niha. Hizaʼi, lö maʼosilöʼögö na so wanuturu lala si tefaudu moroi ba Zura Niʼamoniʼö.

2.   Ira niha Keriso si föföna lö laʼowasaini ulang tahun. Imane The World Book Encyclopedia wa ”moloʼö yaʼira wa fangowasaini ulang tahun no famahaʼö moroi ba niha si tenga samosumange Lowalangi”. Ifatunö khöda Sura Niʼamoniʼö wa fefu niha Keriso moguna laʼoʼö duma-duma nibeʼe ndra nifahaʼö, börö me duma-duma Yesu niʼoʼöra.—2 Tesalonika 3:6.

3.   Ha sambua niʼowasaini niha Keriso, yaʼia daʼö faʼamate Yesu, tenga baŵa waʼatumbunia. (Luka 22:17-​20) Imane Sura Niʼamoniʼö wa ”sökhi mbaŵa waʼamate, moroi ba mbaŵa waʼatumbu”. (Zangombakha 7:1) Me mate Yesu, no iʼokhögö töi si sökhi föna Lowalangi. Andrö wa abölö sökhi mbaŵa waʼamatenia moroi ba mbaŵa waʼatumbunia.—Heberaiʼo 1:4.

4.   Lö nisura Zura Niʼamoniʼö wa so nono mbanua Lowalangi sangowasaini ulang tahun. So dombua fangowasaini ulang tahun nisura ba Zura Niʼamoniʼö, hizaʼi samalua daʼö tenga samosumange Lowalangi. Si dombua fangowasaini andre, lö sökhi lua-luania.—1 Moze 40:20-22; Mareko 6:21-29.

 Simane satua böʼö, laʼomasiʼö ndraonora ira Samaduhuʼö Yehowa. Labeʼe göi mbuala ba owulo ira göi si fao faʼomuso dödö. Laʼoʼö duma-duma nibeʼe Lowalangi, sameʼe zi sökhi ba ndraononia gofu hawaʼara manö. (Mataiʼo 7:11) Andrö, lö afatö dödö ndraono Samaduhuʼö Yehowa. Lamane wangumaʼö:

•   ”Abölö omuso dödögu na labeʼe khögu mbuala ba ginötö si lö udöna-döna.”—Tammy, 12 fakhe.

•   ”Börö me lö uʼowasaini ulang tahun, lö utema mbuala ba ngaluo daʼö. Hizaʼi, ba ngaluo tanö böʼö, labeʼe khögu mbuala ira satuagu. Omuso sibai dödögu börö me ba zi lö udöna-döna labeʼe khögu.”—Gregory, 11 fakhe.

•   ”Na so ba wangera-ngeramö wa owasa andrö, so maʼifu kue ba so zinunö, moguna möiʼö nomogu ba faigi gowasa nifaluama!”—Eric, 6 fakhe.