Boto Solohe yaʼia daʼö sambua ngawawa niha Keriso si lö atoto, si no toʼölö ba wameʼe fanuturu lala khö ndra Samaduhuʼö Yehowa ba zi sagörö ulidanö. So dombua halöwöra yaʼia daʼö:

•   Mamaigi-maigi famaʼanö ba wohenaigö fanuturu lala moroi ba Zura Niʼamoniʼö si so ba publikasi, ba gangowuloa, hegöi ba zekola khö ndra Samaduhuʼö Yehowa.​—Luka 12:42.

•   Mamaigi-maigi halöwö nifalua ndra Samaduhuʼö Yehowa ba zi sagörö ulidanö, simane ba wameʼe fanuturu lala ba halöwö fanuriaigö hegöi ba wamaigi-maigi fangogunaʼö dolo-tolo si no aoha gölö fameʼe.

 Laʼoʼö ira Boto Solohe duma-duma moroi khö ndra ”sinenge ba satua sokubaloi ba Yeruzalema” me abad si föföna, sangai gangetula soguna ba mbanua niha Keriso. (Halöwö Zinenge 15:2) Hulö simane ndra sinenge hegöi satua sokubaloi andrö, tenga Boto Solohe zi tobali högö ba organisasima. Aboto ba dödöra niwaʼö Zura Niʼamoniʼö wa ha Yesu Keriso nifataro Yehowa Lowalangi zi tobali Högö ba mbanua niha Keriso.​—1 Korindro 11:3; Efeso 5:​23.

 Anggota Boto Solohe yaʼia daʼö Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, ba Jeffrey Winder. Mohalöwö ira ba gödo sebua si so ba Warwick, New York, AS.

 So önö panitia nifasindro Boto Solohe ba wamaigi-maigi ngawalö halöwö nifalua. Ero samösa anggota mohalöwö ia ba zi sambua panitia mazui töra.

•   Panitia Koordinator: Mamaigi-maigi ngawalö zalua soʼamakhaita ba huku, bencana alam, famakao si göna khö ndra Samaduhu’ö Yehowa börö nifaduhusima tödö, hegöi salua tanö böʼö si tola molua-lua khö ndra Samaduhuʼö Yehowa ba zi lö mudöna-döna.

•   Panitia Personalia: Mamaigi-maigi hadia zi no mutatugöi ba nösi nomo Mbetieli.

•   Panitia Penerbitan: Mamaigi-maigi halöwö percetakan hegöi ba wamaʼoheʼö publikasi si teʼodane-dane ba Zura Niʼamoniʼö, famazökhi nahia gorahua, gödo famoʼeluaha, hegöi ngawalö fasilitas gödo ndraha.

•   Panitia Dinas: Mamaigi-maigi halöwö fanuriaigö ’turia somuso dödö ba Wamatörö Lowalangi’.​—Mataiʼo 24:14.

•   Panitia Pengajaran: Labeʼe fanuturu lala ba wamaʼanö gö ba wamati si teʼodane-dane moroi ba Zura Niʼamoniʼö nifaʼema ba gangowuloa, ba zekola, hegöi audio ba video.

•   Panitia Penulisan: Labeʼe wanuturu lala ba wamaʼanö gö ba wamati si teʼodane-dane moroi ba Zura Niʼamoniʼö, nicetak hegöi nibeʼe ba situs web. Aefa daʼö, lafaigi-faigi göi halöwö famoʼeluaha.

 Baero daʼö, ero migu lafalua rafe ira Boto Solohe ba wamatunöisi soguna ba organisasi. Na rafe Mboto Solohe, laʼalui wanuturu lala moroi ba Zura Niʼamoniʼö, ba laʼoʼö wanuturu lala geheha Lowalangi enaʼö so wahasara dödöra ba wangai angetula.​—Halöwö Zinenge 15:25.

 Yaʼira andrö niha Keriso si tola mufaduhusi tödö ba latolo panitia nifazökhi Boto Solohe. (1 Korindro 4:2) Yaʼira andrö no toʼölö ba so khöra waʼatua-tua ba wanolo panitia andrö, ba fao ira göi ba rafe nifalua ero migu. Hewaʼae lö fao ira ba wangai angetula, hizaʼi tola labeʼe mbua gera-erara. Laʼoʼö göi gangetula nihalö ndra panitia, ba lafaigi-faigi waʼatedou hegöi bua ba gangetula zi no lahalö. Tola göi ifatenge ira Boto Solohe ba wamaigi ndra talifusöma si so ba ngawalö soi mazui fao ira acara simane pertemuan tahunan hegöi wisuda Gilead.