Hadia Lafaso Niha Ira Samaduhuʼö Yehowa Enaʼö Findra Ira moroi ba Agamara?
Löʼö. No irai mafatunö daʼa ba majalah Manuriaigö nifazökhima, ”Fasala na tafaso niha enaʼö findra ira moroi ba agamara.” a So mbörö wa lö omasi ndraʼaga mafaso niha. Datafaigi atö:
Lö irai ifaso niha Yesu ba wanemaʼö famahaʼönia. Aboto ba dödönia wa ha maʼifu somasi manemaʼö yaʼia. (Mataiʼo 7:13, 14) Me so ösa niha si lö omasi saʼae tobali nifahaʼönia börö me lö fao dödöra ba wamahaʼö si no ibeʼe, lö irai ifaso ira Yesu enaʼö laʼoʼö manö ia.—Yohane 6:60-62, 66-68.
No ifahaʼö Yesu ira nifahaʼönia enaʼö böi lafaso niha findra agama. Tobali, lö irai lafaso niha ira nifahaʼö Yesu ba wamondrongo turia somuso dödö nifaʼemara sanandrösa ba Wamatörö Lowalangi. Ha niha somasi mamondrongo niʼaluira.—Mataiʼo 10:7, 11-14.
Zaya-zaya gölö findra agama na börö nifaso, börö me somasi Lowalangi ha niha samosumange yaʼia soroi ba dödö.—5 Moze 6:4, 5; Mataiʼo 22:37, 38.
Hadia daʼö mbörö wa möiga manuriaigö enaʼö findra agama niha?
Maturiaigö turia Zura Niʼamoniʼö ”irugi wondrege danö”. Mafalua halöwö fanuriaigö andre ”föna niha sato hegöi ba nomo-omo misa” simane niwaʼö Zura Niʼamoniʼö. (Halöwö Zinenge 1:8; 10:42; 20:20) Simane niha Keriso ba götö föna, itaria laböbögö khöma zi lö duhu wa mafaso niha findra agama, irege lafotöi ndraʼaga solawa huku. (Halöwö Zinenge 18:12, 13) Hizaʼi, fasala niwaʼöra andrö. Lö irai mafaso niha enaʼö laʼoʼö hadia zi no mafaduhusi tödö. Faduhu dödöma wa moguna aboto ba dödö niha hadia niwaʼö Zura Niʼamoniʼö, enaʼö tola lahalö samösa gangetula moloʼö hadia zi no aboto ba dödöra.
Lö mafaso niha enaʼö findra agama. Mafalua halöwö ba agama, tenga börö me so gohitö dödöma ba politik mazui mafabuʼu ba niha wa mabeʼe fanolo hegöi kefe enaʼö fao ira ba agamama. Faböʼö ndraʼaga moroi ba niha sangotöigö yaʼira niha Keriso, hizaʼi lafalua zi lö omasi Keriso. b
Hadia tola findra agama zi samösa niha?
Iröi agama ndra tuania Gaberahamo
Tola. Iʼombakhaʼö khöda Sura Niʼamoniʼö wa si samösa niha tola ifili hezo agama somasi ia. No isura Zura Niʼamoniʼö haniha manö si no irai findra moroi ba agama satuara, ba lafosumange Lowalangi sindruhu. Duma-dumania, Aberahamo, Ruti, so ösa niha Atena, hegöi sinenge sotöi Faulo. (Yosua 24:2; Ruti 1:14-16; Halöwö Zinenge 17:22, 30-34; Galatia 1:14, 23) Aefa daʼö, no tesura ba Zura Niʼamoniʼö wa tola ihalö gangetula si samösa niha ba wondröi agama sindruhu, hewaʼae fasala gangetula nihalönia andrö.—1 Yohane 2:19.
Moloʼö Deklarasi Universal Hak Asasi Manusia, tola ifili agama somasi ia si samösa niha. Fao dödö Perserikatan Bangsa-Bangsa ba Deklarasi daʼa si tobali ”dane-dane huku internasional soguna ba hak asasi manusia”. Imane Deklarasi andrö wa si samösa niha ”tola findra agama mazui ifaböʼöni zi faduhu dödönia” hegöi ”ba wangalui, ba wanema, hegöi ba wanutunö turia si no irongo”, farahu ba daʼö nifaduhusi tödö ba agama. c Tatu manö, fefu niha moguna göi lafosumange nifaduhusi tödö niha böʼö hegöi na latimbagö wangera-ngera si lö tefaudu ba dödöra.
Na findra agama zi samösa niha, hadia iʼosiwawöi zi toʼölö lafalua ösi nomonia?
Tatu löʼö. Ifarou ita Sura Niʼamoniʼö enaʼö tafosumange fefu niha gofu hadia agamania. (1 Fetero 2:17) Baero daʼö, laʼoʼö niwaʼö Zura Niʼamoniʼö ira Samaduhuʼö Yehowa ba wamosumange zatuara hewaʼae na faböʼö agamara.—Efeso 6:2, 3
Hizaʼi, lö fefu niha fao dödöra ba wamahaʼö si so ba Zura Niʼamoniʼö. Imane samösa ndra alawe ba Zambia, ”Ba mbanuama, niha si findra agama . . . lafotöi ira niha si no faröi ba nösi nomo hegöi ba niha mbanua.” Daʼö zalua khönia me ono alawe ia me ibörögö ifahaʼö ia ba Zura Niʼamoniʼö khö ndra Samaduhuʼö Yehowa, ba ihalö gangetula wa findra agama ia. Imane, ”Asese lawaʼö ira satuagu wa lö omuso dödöra ba afatö sibai dödöra khögu. Omasido sibai na fao dödöra ba gangetula nihalögu. . . . Ba ginötö ufili wa lö faröi ndraʼo khö Yehowa, ba lö fao ndraʼo ba zi toʼölö lafalua ba agama, tenga daʼö geluahania wa faröi ndraʼo ba nösi nomogu.” d
a Faigi ba majalah Menara Pengawal 1 Mbaŵa si Sara 2002 ngaʼörö 12, ngenoli si 15.
b Duma-dumania, me döfi 785 M, ibeʼe fareta Charlemagne enaʼö labunu gofu hania manö si lö omasi tebayagö idanö tobali niha Keriso ba Saxony. So göi Perjanjian Perdamaian Augsburg nitandra tangani niha si fasuwö ba Imperium Romawi Suci me döfi 1555 M. Itutunö ba Perjanjian andrö wa fefu niha samatörö ba mbanuania lö tola löʼö findra agama ira tobali agama Katolik Roma mazui Lutheran, ba fefu nono mbanuania göi moguna lafaogö ira ba agama andrö. Niha si lö omasi moguna laheta ira moroi ba mbanua andrö.
c Hak-hak simane daʼö no lafaduhuʼö ba Piagam Afrika tentang Hak Asasi Manusia dan Bangsa, Deklarasi Amerika tentang Hak dan Kewajiban Manusia, Piagam Arab tentang Hak Asasi Manusia 2004, Deklarasi Hak Asasi Manusia ASEAN (Perhimpunan Bangsa-Bangsa Asia Tenggara), Konvensi Eropa Mengenai Hak Asasi manusia, dan Perjanjian Internasional tentang Hak-Hak Sipil dan Politik. Hewaʼae simanö, so göi soi si no fao tödö ba perjanjian-perjanjian daʼa hizaʼi lö lafalua molo’ö huku si no mubeʼe andrö.
d Yehowa daʼö döi Lowalangi si no tesura ba Zura Niʼamoniʼö.
Te Göi Adöni Dödöu
ESSENTIAL BIBLE TEACHINGS
Hadia Ahori Itema Fefu Wamosumange Lowalangi?
Ato zi faduhu tödö wa lö salania na öfili agama somasiʼö.
FAMAHA’Ö ZURA NI’AMONI’Ö
Tandraigö Wamaha’ö Nifaluama
Faha’ö ndra’ugö ba Zura Ni’amoni’ö khö zi samösa samaha’ö, lö mu’andrö gefe.