Lafosumange ndra samatörö ira Samaduhuʼö Yehowa ba lö laʼaohasi ba dödö lambang negara. Tatu lö fatimba khöma na so niha si fahölu ba soira, labeʼe yawa dangara ba mandrera mazui laʼanunöisi lagu kebangsaan.

 Hizaʼi, no lahalö gangetula ira Samaduhuʼö Yehowa wa lö fao ira ba wamalua daʼö fefu börö me faduhu dödöra wa lö tefaudu daʼö ba nifahaʼö Zura Niʼamoniʼö. Tatu omuso dödöma na so zoʼameʼegö tödö hadia nifaduhusima tödö andrö, börö me maʼameʼegö tödö göi angetula niha böʼö si faböʼö moroi khöma.

Ba artikel daʼa tatutunö

•  Hadia manö nifahaʼö Zura Niʼamoniʼö sanandrösa ba daʼö?

•  Hewisa na so huku sotatugöi wa lö tola löʼö mufalua daʼö?

•  Hadia faʼawö dambai ndra Samaduhuʼö Yehowa sanandrösa ba politik mazui sosial?

 So dombua goi-goi moroi ba Zura Niʼamoniʼö si tobali dane-dane khöma ba wangai angetula:

•   Ha Yehowa zinangea tafosumange. Imane Sura Niʼamoniʼö, ”Ha khö Yehowa Lowalangiu mangalulu ndraʼugö ba öfosumange ia, ba ha khönia öbeʼe halöwö niʼamoniʼö.” (Luka 4:8) Na fahölu ita ba soida mazui taʼanunöisi lagu kebangsaan, asese so ngawua wehede sangoromaʼö wa ha ba soi si farahu yaʼita talulu waʼaurida. Lö lafalua daʼö ira Samaduhuʼö Yehowa börö me fatimba daʼö ba dödöra side-ide.

   Ba wamaigi ndra Samaduhuʼö Yehowa, fameʼe tanga yawa ba mandrera fagölö ia simane amuata famosumange, ba tebai tafalua daʼö moloʼö Sura Niʼamoniʼö. (1 Korindro 10:14) So hadauga pakar sejarah sangumaʼö wa mandrera andrö tola göi tobali ia lambang keagamaan. Simane nisura sejarawan sotöi Carlton J. H. Hayes, ”Nasionalisme andrö simane agama, so nifosumange hegöi si tobali lambang, yaʼia daʼö mandrera.” aSanandrösa ba niha Keriso me abad siföföna, imane samösa sanura buku sotöi Daniel P. Mannix, ”Latimbagö ira niha Keriso . . . wameʼe sumange khö kaisaro Romawi. Ba götöda andre, fakhili daʼö simane na latimbagö wameʼe yawa tanga ba mandrera.” b

  Hewaʼae na lö omasi ndra Samaduhuʼö Yehowa wameʼe yawa tanga ba mandrera, hizaʼi lö lafakiko, latunu mazui laʼosiwawöi mandrera hegöi tanö böʼönia si tobali lambang negara.

•   Fagölö fefu niha ba wamaigi Lowalangi. (Halöwö Zinenge 10:34, 35) Iwaʼö Sura Niʼamoniʼö wa ”moroi ba zi samösa niha ifazökhi [Lowalangi] fefu soi si toröi ba gulidanö”. (Halöwö Zinenge 17:26) Börö daʼö, faduhu dödö ndra Samaduhuʼö Yehowa wa lö tefaudu na so ngawawa mazui soi sabölö mafosumange moroi ba danö böʼö. Mafosumange fefu niha, gofu hezo so moroi ira hegöi nahia waʼatoröira.—1 Fetero 2:17.

 Lö fatuwu ndra Samaduhuʼö Yehowa khö ndra samatörö. Faduhu dödöma wa no ”nifakhoi Lowalangi” enaʼö mamatörö ira. (Roma 13:1-7) Faduhu göi dödöma wa moguna maʼoʼö niwaʼö ndra samatörö.—Luka 20:25.

 Hizaʼi, hewisa na so huku nitatugöi ndra samatörö si lö tefaudu ba niwaʼö Lowalangi? Itaria, maʼandrö khö ndra samatörö enaʼö labulöʼö gamakhoita andrö. c Hizaʼi, na tebai mufalua daʼö, lahalö gangetula ira Samaduhuʼö Yehowa ba ’woloʼö khö Lowalangi me yaʼia zamatörö yaʼira moroi ba woloʼö ba niha’.—Halöwö Zinenge 5:29.

 Löʼö. Lö faʼawö dambai ndra Samaduhuʼö Yehowa sanandrösa ba politik mazui sosial. Sindruhu sa, lö fahölu ndraʼaga ba soi, lö mabeʼe yawa dangama ba mandrera ba lö maʼanunöisi lagu kebangsaan. Hizaʼi, tenga daʼö geluahania wa faʼawö dambai ndraʼaga ba politik. Lö mafalua ia börö me maʼoʼö niwaʼö Zura Niʼamoniʼö sanandrösa ba daʼö.