So mbörö wa lö fao ndra Samaduhuʼö Yehowa ba wasuwöta, ya’ia da’ö:

1.   Maʼoʼö Lowalangi. Imane Sura Niʼamoniʼö wa ”labaliʼö faku ziʼölira” ono mbanua Lowalangi ba ”löʼö saʼae lafamaha ira ba wanuwö”.—Yesaya 2:4.

2.   Maʼoʼö Yesu. No irai imane Yesu khö Wetero, ”Saembugö wödamö. Fefu zamake föda ba mate ia dania ba wöda.” (Matai’o 26:52) Daʼa zangoromaʼö wa lö ifarou Yesu ndra nifahaʼönia wefao ba wasuwöta.

    Laʼoʼö hadia niwaʼö Yesu ira soloʼö khönia wa yaʼira ”tenga tana khö niha gulidanö”, andrö wa lö faʼawö ira ba politik. (Yohane 17:16) Lö lafalua demo ba wolawa nifalua saradadu ba lö lataha niha weʼamöi ba dinas militer.

3.   Laʼomasiʼö niha böʼö. Ibeʼe faretania Yesu khö ndra nifahaʼönia enaʼö ’faoma laʼomasi’ö nawöra’. (Yohane 13:34, 35) Daʼa mbörö wa so khöra wahasara dödö khö ndra talifusöra ba zi sagörö ulidanö, ba samösa lö hadöi somasi ba wanuwö talifusöra.—1 Yohane 3:10-12.

4.   Laʼoʼö duma-duma niha Keriso me föna. Imane Encyclopedia of Religion and War, ”ira nifahaʼö Yesu me föna lö omasi ira fao ba wasuwöta hegöi ba dinas militer” börö me aboto ba dödöra na lafalua daʼö ”lö tefaudu ba huku faʼomasi hegöi ba wangomasiʼö si faʼudu khöra”. Imane göi teolog Jerman Peter Meinhold wa niha Keriso me föna ”na omasi tobali niha Keriso ba tobali göi saradadu, lö fagöna daʼö”.

 Ira Samaduhuʼö Yehowa moguna ira ba niha sato ba tenga samawukaisi banua si toröi yaʼira. Mafosumange ndra samatörö börö me maʼoʼö niwaʼö Zura Niʼamoniʼö sangumaʼö:

•   ”Fefu niha enaʼö laʼoʼö li ndra samatörö.”—Roma 13:1.

•   ”Mibeʼe khö Kaisaro tana khö Kaisaro.”—Mataiʼo 22:21.

 Andrö wa maʼoʼö huku, mabuʼa pajak, ba fao ndraʼaga ba wotuhini ira famareta si möi fangohahau dödö nono mbanua.