Tenga. Ira Samaduhuʼö Yehowa tenga sambua kultus. Hizaʼi, yaʼaga niha Keriso maʼodödögö wamalua duma-duma nibeʼe Yesu Keriso ba mafalua zi no ifahaʼö.

 Oya geluaha wehede ”kultus”. Hizaʼi, so dombua geluaha ”kultus” sasese abato ba dödö niha, ba lö tefarahu ndraʼaga ba zi dombua daʼa.

•   So zangumaʼö, kultus eluahania nifaduhusi tödö mazui agama sawena mufosindro. Samaduhuʼö Yehowa tenga agama sawena lafasindro. Hizaʼi, maʼoʼö duma-duma wamosumange Lowalangi nifalua niha Keriso siföföna. No tesura ba Zura Niʼamoniʼö hewisa wamosumangera Lowalangi hegöi famahaʼöra. (2 Timoteo 3:​16, 17) Maʼoʼö duma-duma nibeʼe si so ba Zura Niʼamoniʼö, börö me faduhu dödöma daʼö lala satulö ba wamosumange Lowalangi.

•   So göi zangumaʼö, kultus yaʼia daʼö sekte sataʼu ita nidöniaʼö zi samösa niha. Yaʼaga, Samaduhuʼö Yehowa, lö mabaliʼö si samösa niha tobali zondröniaʼö yaʼaga. Hizaʼi, maʼoʼö niwaʼö Yesu khö ndra nifahaʼönia, ”Ha samösa Zondröniaʼö yaʼami yaʼia daʼö Keriso.”​—Mataiʼo 23:10.

 Ira Samaduhuʼö Yehowa tenga kultus sataʼu ita, börö me mafalua goi-goi si möi fangaʼazökhi, he ba khöma samösa hegöi ba niha sato. Duma-dumania, matolo niha enaʼö laböhöli gamuata si möi famakiko, simane famadu-madu tuo mazui fangogunaʼö narkoba. Mafalua wamahaʼö niha ba wombaso hegöi fanura ba zi sagörö ulidanö. Mabeʼe göi wanolo ba zi göna bencana alam. Maʼodödögö sibai wamalua si sökhi ba niha fefu simane nifahaʼö Yesu.​—Mataiʼo 5:​13-​16.