Mitos: Lö lafalua Wanunu Fandru ira Samaduhuʼö Yehowa börö me lö faduhu dödöra khö Yesu.

 Sindruhunia: Yaʼaga niha Keriso. Faduhu dödöma wa ha Yesu Keriso lala waʼauri.—Halöwö Zinenge 4:12.

 Mitos: Mifabali wahasara dödö ba zi sambua omo börö me mifahaʼö niha enaʼö lö lafalua Wanunu Fandru.

 Sindruhunia: Maʼomasiʼö sibai fefu niha ba zi sambua omo, ba maʼogunaʼö Zura Ni’amoniʼö enaʼö so wahasara dödö ba zi sambua omo.

 Mitos: Lö hadöi khömi ”amuata si sökhi ba Wanunu Fandru” simane faʼoböwö, faʼatulö ba gulidanö, ba faʼasökhi dödö ba niha böʼö.

 Sindruhunia: Ero maʼökhö maforege wamalua faʼoböwö ba faʼatulö ba niha fefu. (Gamaedola 11:25; Roma 12:18) Duma-dumania, lala ba wamaluama angowuloa hegöi ba wanuriaigö tefaudu ba niwaʼö Yesu, ”Lö nibeʼemi böli me mitema, andrö na mibeʼe göi böi miʼandrö mböli.” (Mataiʼo 10:8) Baero daʼö, madönisi dödö niha ba Wamatörö Lowalangi me ha daʼö dötönaföda ba wogamö faʼatulö ba gulidanö.—Mataiʼo 10:7.

•   No iʼoroiʼö khöda Yesu ba wanörö tödö faʼamatenia, tenga faʼatumbunia.—Luka 22:19, 20.

•   Ira sinenge Yesu hegöi ira nifahaʼönia me föna, lö irai lafalua Wanunu Fandru. Imane New Catholic Encyclopedia wa ”fangowasaini baŵa waʼatumbu andre awena mubörögö ia me döfi 243 [M]”, töra otu fakhe iʼotarai me mate ndra sinenge Yesu safuria.

•   Lö hadöi tandra wa tumbu Yesu me 25 mbawa si Felendrua; lö irai tesura ba Zura Niʼamoniʼö mbawa waʼatumbu Yesu.

•   Faduhu dödöma wa lö fatema ba dödö Lowalangi Fanunu Fandru börö me daʼö famahaʼö agama niha baero.—2 Korindro 6:17.

 Ato nasa zamalua Fanunu Fandru andre hewaʼae laʼila daʼö moroi ba wamahaʼö agama niha baero, ba lö hadöi ba Zura Niʼamoniʼö. Sinangea na laʼangeragö: Hana wa lö lafalua daʼa ira niha Keriso hewaʼae ato niha zamalua yaʼia? Hana wa asese lafadunö-dunö daʼa?

 Ifarou ita Sura Niʼamoniʼö enaʼö mangera-ngera samösa ita, ’taʼoigö wangera-ngerada’. (Roma 12:1, 2) Ifahaʼö ita Sura Niʼamoniʼö enaʼö taʼofönaiʼö zindruhu. (Yohane 4:23, 24) Tobali, hewaʼae maʼameʼegö tödö niwaʼö niha sanandrösa ba khöma, maʼodaligö goi-goi Zura Niʼamoniʼö hewaʼae na börö daʼö fatuwu niha khöma.

 Hewaʼae lö mafalua Wanunu Fandru, mafosumange gangetula niha sanandrösa ba daʼö. Lö mataha-taha niha naʼomasi ira wamalua Fanunu Fandru.