Mitos: Lö faduhu dödö ndra Samaduhuʼö Yehowa ba dalu-dalu mazui famadöhö fökhö moroi khö ndra doto.

 Sindruhunia: Maʼodödögö wangalui dalu-dalu si tefaudu ba si sökhi khöma samösa hegöi ba nösi nomoma. Na mofökhö ndraʼaga, möiga khö doto sonekhe ba satua-tua si tola mameʼe dalu-dalu si lö mangogunaʼö do. Maʼandrö saohagölö me no tedou waʼatua-tua ndra doto ba wameʼe dalu-dalu. Itaria, fameʼe dalu-dalu si lö mangogunaʼö do khö ndra Samaduhuʼö Yehowa lafalua göi zimane daʼö ba niha sato. Ba zi hawaʼoya soi, na so zofökhö tola lafili lö laʼogunaʼö transfusi darah enaʼö böi göna ira fökhö si fatöfa moroi ba ndro, mazui abula dödö tanö böʼö.

 Mitos: Faduhu dödö ndra Samaduhuʼö Yehowa wa famati zi tola mamadöhö fökhö zi samösa niha.

 Sindruhunia: Lö mafalua dandra sahöli-höli dödö ba wamadöhö fökhö.

 Mitos: Ebua sibai mböli dalu-dalu na lö muʼogunaʼö transfusi darah.

 Sindruhunia: Famadöhö fökhö si lö mangogunaʼö transfusi darah lö ebua mböli. a

 Mitos: Ato Zamaduhuʼö Yehowa, fao ndraono, zi mate ero röfi börö me lö latema transfusi darah.

 Sindruhunia: Fehede daʼa lö atulö. No lafalua halöwö sabua ira doto, duma-dumania, lö laʼogunaʼö transfusi darah ba ginötö laʼoperasi dödö niha, pembedahan ortopedis, hegöi transplantasi organ. b Niha sofökhö he iraono si lö mangogunaʼö transfusi darah, si toʼölönia alio döhö ira moroi ba zangongunaʼö do. c Aefa daʼö, lö hadöi si tola motatugöi wa mate zi samösa niha börö me lö iʼogunaʼö ndro, mazui auri ia börö me iʼogunaʼö ndro.

 Daa sanandrösa ba waʼafaduhu dödö ba agama, tenga ba wamadöhö fökhö. Itegu ita ba zura Amabuʼula Li si Föföna hegöi Amabuʼula Li si Bohou enaʼö böi taʼogunaö ndro. (1 Moze 9:4; 3 Moze 17:10; 5 Moze 12:23; Halöwö Zinenge 15:28, 29) Ba wamaigi Lowalangi, do fagölö ira waʼauri. (3 Moze 17:14) Andrö wa lö matema ndro tenga ha börö me maʼoʼö niwaʼö Lowalangi hizaʼi, ba wangandröma saohagölö börö me yaʼia Zomböi faʼauri.

 Lamane ira doto, na lö muʼogunaʼö ndro ba wamadöhö fökhö, fangera-ngera si lö sökhi daʼö, ba omasi mate. Hizaʼi, hauga fakhe aefa daʼö faböʼö wangera-ngera. Duma-dumania, me döfi 2004, imane sambua artikel si so ba jurnal pendidikan medis wa ”oya zi tefaudu nifalua ndra doto ba wameʼe dalu-dalu khö ndra Samaduhuʼö Yehowa si tola muʼogunaʼö ba zi so föna”. d Me döfi 2010, imane sambua artikel ba jurnal Heart, Lung and Circulation imane ”’famalua operasi si lö mangogunaʼö do’, si bagania tenga ha khö ndra S[amaduhuʼö] Y[ehowa] mufalua ia hizaʼi tobali duma-duma ba wamalua operasi nifalua ero maʼökhö”.

 Ngahönö ndra doto iadaʼa ba zi sagörö ulidanö laʼogunaʼö teknik konservasi darah ba ginötö lafalua operasi sabua si lö mangogunaʼö transfusi darah. Alternatif transfusi darah simane daʼö, lafalua göi ba soi segebua ba ato zi tenga Samaduhuʼö Yehowa zomasi.