Mitos: Wa lö laʼowasaini Gowasa Fasa ira Samaduhuʼö Yehowa börö me tenga niha Keriso ira.

 Sindruhunia: Faduhu dödöma wa Yesu Keriso Zangefaʼö yaʼaga, ba maʼodödögö ba ”wanara lahenia”.—1 Fetero 2:21; Luka 2:11.

 Mitos: Lö faduhu dödömi wa no tesusugi Yesu moroi ba waʼamate.

 Sindruhunia: Faduhu dödöma wa no tesusugi Yesu; mafaduhuʼö wa daʼö dane-dane wamati ba niha Keriso, ba mafatunö ba wanuriaigöma.—1 Korindro 15:3, 4, 12-15.

 Mitos: Lö ibe dödömi ndraonomi na lö larasoi waʼomuso dödö ba wangowasaini Owasa Fasa.

 Sindruhunia: Maʼomasiʼö ndraonoma—maʼodödögö wamahaʼö yaʼira ba enaʼö omuso dödöra.—Tito 2:4.

•   Fangowasaini Owasa Fasa lö modane-dane ba Zura Niʼamoniʼö.

•   No iʼoroisi khöda Yesu ba wanörö tödö faʼamatenia, tenga femaosonia. Mafalua Wanörö Tödö faʼamatenia ero röfi tefaudu simane fangerai sura mbaŵa Zura Niʼamoniʼö.—Luka 22:19, 20.

•   Faduhu dödöma wa moroi ba ritus kesuburan kuno si toʼölö nifalua ba Gowasa Fasa, lua-luania lö omasi Lowalangi ba Gowasa Fasa. Iʼandrö khöda Lowalangi enaʼö ha khönia mangalulu ita, ba lö omasi ia na lafosumange ia si fao ngawalö si fatuwu khönia.—2 Moze 20:5; 1 Razo 18:21.

 Faduhu dödöma gangetula nihalöma wa lö mafalua Gowasa Fasa, no teʼodane-dane ba Zura Niʼamoniʼö, samarou yaʼaga wangogunaʼö ’faʼaboto ba dödö ba fangila wetahögö’, tenga ba wogoʼö-goʼö si toʼölö nifalua niha. (Gamaedola 3:21; Mataiʼo 15:3) Na lasofu khöma sanandrösa ba Owasa Fasa, matutunö hadia nifaduhusima tödö. Ba mafosumange göi gangetula nihalö niha böʼö ba zomasi lafalua.—1 Fetero 3:15.