So. Hizaʼi, tenga ira Samaduhuʼö Yehowa zameʼe goi-goi andrö. Laʼoʼö fefu goi-goi hegöi fanuturu lala si so ba Zura Niʼamoniʼö si tobali fanolo ba wangai angetula si sökhi, si tefaudu ba zomasi Lowalangi. (Yesaya 48:17, 18) So goi-goi sanandrösa ba wakawasa si tola taʼangeragö. a

•   Fangowalu no famaböbö sandrohu faʼauri. (Mataiʼo 19:6) Moloʼö ira Samaduhuʼö Yehowa, fakawasa andrö ha ba niha sedöna mangowalu, andrö wa tenga si famai-mai daʼö.

•   Niha si fakawa ha niha si no ibönö döfi ba wangowalu. Eluahania, ”no ikhamö döfinia,” mazui no latalui ginötö waʼebua hokha sameʼe fasala gangetula nihalöra.—1 Korindro 7:​36.

•   Niha si no mangowalu tebai fakawa ira ba niha böʼö. Hewaʼae no fabali zi darua niha moloʼö huku ndra samatörö, hizaʼi na tenga börö wohorö wa fabali ira, lö fao dödö Lowalangi na ifuli mangowalu ira ba niha böʼö.​—Mataiʼo 19:9.

•   Ha ba niha si sara lala wamati tola mangowalu niha Keriso. (1 Korindro 7:​39) Lafotöi ia niha si sara lala wamati, tenga ha börö me iʼameʼegö tödö famatima. Eluahania sa, no tebayagö ia idanö tobali samösa Samaduhuʼö Yehowa, fao ia ba wanuriaigö, ba ifalua goi-goi Sura Niʼamoniʼö ba waʼaurinia. (2 Korindro 6:​14) Iʼotarai meföna, no ibeʼe Lowalangi goroisa ba nono mbanuania enaʼö mangowalu ira ha ba zi sara lala wamati khöra. (1 Moze 24:3; Maleakhi 2:​11) Irugi iadaʼa, tefaudu sibai goroisa andrö. b

•   Moguna lafosumange zatuara iraono. (Gamaedola 1:8; Kolose 3:​20) Iraono si toröi nasa ba ngai zatua moguna laʼoʼö goi-goi nibeʼe zatuara sanandrösa ba wakawasa. Duma-dumania, hauga fakhe ndröfira awena tola fakawa hegöi hadia manö zi tola lafalua na fakawa ira.

•   Moloʼö fanuturu lala si so ba Zura Niʼamoniʼö, na so Zamaduhuʼö Yehowa somasi fakawa, yaʼia samösa zotatugöi haʼökhö fakawa ia. Tefaudu daʼa ba goi-goi sangumaʼö, ”Iluʼi-luʼi sa noronia zamösana.” (Galatia 6:5) Hewaʼae simanö, ato niha satua-tua sangandrö fanuturu lala moroi khö ndra Samaduhuʼö Yehowa si no irai fakawa hegöi saro ba wamati.​—Gamaedola 1:5.

•   Oya gamuata sasese lafalua niha si fakawa saekhu ba horö sebua. Duma-dumania, itegu ita Sura Niʼamoniʼö enaʼö böi tafalua gamuata fohorö. Hizaʼi, tenga ha manandrösa daʼa ba wohorö nifalua zi darua niha si lö sangowalu, tobali manandrösa göi daʼa na faoma lababaya zaila nawöra, seks oral, mazui seks anal. (1 Korindro 6:​9-11) Ogoro Lowalangi ba niha samalua gamuata simane daʼö hewaʼae na lö nifaluara fohorö. (Galatia 5:​19-​21) Iʼelifi göi Sura Niʼamoniʼö niha sangumaʼö ”mbude-bude hokha”.—Kolose 3:8.

•   No tefuyu dödö niha. (Yeremia 17:9) Daʼö mbörö wa so niha samalua gamuata si fasala hewaʼae no iʼila wa fasala daʼö. Enaʼö lö ifelungu ira tödöra, moguna böi ha daru-darua ira ba nahia si lö niha-niha enaʼö lö tedönisi dödöra ba wamalua amuata si fasala. Moguna fao ira khö ndra awö-awöra. (Gamaedola 28:26) Niha Keriso somasi mangowalu, lö iʼalu-aluʼi ba internet haniha zinangea tobali foʼomonia, börö me oya gabula dödö si tola alua na fakawa ia ba niha si lö nasa aboto dödönia.​—Zinunö 26:4.