Löʼö. Lö latimbagö vaksin ira Samaduhuʼö Yehowa. Ba wamaigima, niha Keriso ero zamösana zangai angetula sanandrösa ba vaksin. Ato ndra Samaduhuʼö Yehowa sanemaʼö vaksin.

 Matemaʼö perawatan medis si sökhi ba maʼameʼegö tödö sibai waʼatedou ba ilmu kedokteran, si tola möi mangalösi de’ala salua wökhö sabölö-bölö. Maʼandrö sibai saohagölö khö ndra tim medis ba zi no lafalua, mendrua manö ba ginötö si basaki andre.

 Falulu fohalöwö ndra Samaduhuʼö Yehowa khö ndra sohalöwö ba dinas kesehatan. Duma-dumania, iʼotarai me ibörögö alua pandemi COVID-19, lö laböhöli ira Samaduhuʼö Yehowa ba wameʼe fangelama ba situs daʼa ba zi ngaotu ngawalö li. Lafarou dödö niha enaʼö laʼoʼö wanuturu lala si no mubeʼe faböi göna ira fökhö andre. Duma-dumania, moguna laʼoʼö wanuturu lala sanandrösa ba waʼowulo niha sato, lö lafahatö ira ba niha bö’ö, lafalua karantina, lasasai dangara, lafake masker, ba lafalua wanuturu lala tanö böʼö si no latatugöi ira samatörö.—Roma 13:1, 2.

 Ba zi ngafulu fakhe, no mututunö goi-goi andre ba publikasi ndra Samaduhuʼö Yehowa:

•   No angetulada ero zamösana ngawalö zoʼamakhaita ba perawatan kesehatan.—Galatia 6:5.

   ”[Majalah daʼa] lö itatugöi hadia dalu-dalu hegöi terapi sinangea muʼogunaʼö, ba lö ibeʼe mene-mene sanandrösa ba perawatan medis. Ohitö dödö majalah andre yaʼia daʼö ba wanutunö hadia zi no alua, ba ira sombaso saʼae zotatugöi hadia gangetula sinangea lahalö.”—Awake!, 8 Mbaŵa si Dua 1987.

   ”Yaʼugö samösa zotatugöi hadia moguna mu-vaksin ndraʼugö hegöi iraonomö.”—Awake!, 22 Mbaŵa si Walu 1965.

•   Maʼalui perawatan medis börö me maʼameʼegö tödö sibai wa’aurima.—Halöwö Zinenge 17:28.

   ”Latema’ö ngawalö perawatan medis ira Samaduhuʼö Yehowa ba wanolo yaʼira ba wanaögö fökhöra. Laʼomasiʼö waʼaurira ba lafalua gofu hadia ia zi tola mondrorogö faʼaurira andrö, na tefaudu daʼö ba Zura Niʼamoniʼö.”—The Watchtower, 1 Mbaŵa si Fitu 1975.

   ”Omasi ndra Samaduhuʼö Yehowa ba wanemaʼö dalu-dalu hegöi perawatan medis. Omasi ira enaʼö döhö wökhöra ba anau nosora. Sindruhunia, simane si samösa niha Keriso ba abad siföföna sotöi Luka, so ösa ndra Samaduhuʼö Yehowa sohalöwö tobali doto. . . . Tatu manö, laʼameʼegö tödö sibai waʼerege dödö niha sameʼe perawatan medis ira Samaduhuʼö Yehowa, mendrua manö me no latehegö waʼaurira ba wamalua halöwöra. Laʼandrö göi saohagölö ba wanolo si no labeʼe irege alö wökhöra.”—Menara Pengawal, 1 Mbaŵa si Dua 2011.