Lö’ö. Faduhu dödö ndra Samaduhuʼö Yehowa wa fefu hadia ia oi nifazökhi Lowalangi. Hizaʼi, lö fao dödöma ba kreasionisme. Hadia mbörö? Börö me so wamahaʼö kreasionisme si lö tefaudu ba wamahaʼö Zura Niʼamoniʼö. Faigi duma-duma si dombua ngawalö andre:

1.   Faʼara ngaluo wamazökhi. Moloʼö niha si faduhu tödö ba kreasionisme, si önö ngaluo wamazökhi niwaʼö ba Zura Niʼamoniʼö sindruhu-ndruhu önö kali 24 za. Hizaʼi, ba Zura Niʼamoniʼö, eluaha ’ngaluo’ tola daʼö geluahania inötö sara sibai.​—1 Moze 2:4; Zinunö 90:4.

2.   Faʼara gulidanö. Lamane ira si faduhu tödö ba kreasionisme wa faʼara gulidanö andre awena hauga ribu fakhe. Sindruhunia, moloʼö Sura Niʼamoniʼö, ulidanö awö mbanua si yawa no so iʼotarai fatua lö si önö ngaluo wamazökhi. (1 Moze 1:1) Börö daʼö, ira Samaduhuʼö Yehowa lö fabuʼa-buʼa ira ba zi no iforomaʼö ilmiah wa ulidanö andre tola manö miliaran fakhe waʼara.

 Hewaʼae na yaʼaga, Samaduhuʼö Yehowa, faduhu dödöma fefu hadia ia oi niwöwöi Lowalangi, lö fatimba khöma ilmu pengetahuan ilmiah. Faduhu dödöma Sura Niʼamoniʼö sindruhunia tefaudu ba sains.