Labeʼe. Asese labeʼe wanolo ira Samaduhuʼö Yehowa ba ginötö so bencana. Mabeʼe wanolo si tefaudu khö ndra talifusöma Samaduhuʼö Yehowa hegöi si tenga Samaduhuʼö Yehowa, simane niwaʼö Zura Niʼamoniʼö ba Galatia 6:10, ”Datafalua zi sökhi ba niha fefu, ba si oföna khö ndra talifusöda si sara lala wamati.” Mabeʼe göi wamarou dödö hegöi ba wamati mendrua manö na göna ira abula dödö.—2 Korindro 1:3, 4.

 Na alua bencana alam, ira satua sokubaloi si so ba mbanua si göna bencana alam, laforege ba wohubungi fefu ndra talifusö enaʼö laʼila wa lö hadia ia khöra ba labeʼe wanolo si tefaudu. Aefa daʼö, lafatunö fefu hadia zalua ira satua sokubaloi ba gödo ndraha Samaduhuʼö Yehowa ba soi si so yaʼira, ba lafatunö göi hadia manö wanolo si no lafalua.

 Na lö sagu khö ndra talifusö si so ba mbanua daʼö ba wameʼe fanolo, latatugöi ira Boto Solohe Samaduhuʼö Yehowa ba wameʼe fanolo. Simane daʼa göi nifalua niha Keriso me götö föna ba wanolo ndra talifusöra ba ginötö alua lofo sabölö-bölö. (1 Korindro 16:1-4) Gödo ndraha zamatenge Panitia Bantuan Kemanusiaan ba wameʼe fanolo. Ira Samaduhuʼö Yehowa moroi ba mbanua böʼö, fao göi ira ba wameʼe ginötöra hegöi kefera ba wanolo ira talifusö.—Gamaedola 17:17.

 Dolo-tolo si no latema ba gödo ndraha Samaduhuʼö Yehowa laʼogunaʼö ia ba ngawalö zoguna, simane ba wameʼe fanolo ba niha si göna bencana alam. (Halöwö Zinenge 11:27-30; 2 Korindro 8:13-15) Börö me lö lagazi ndra talifusö si möi ba wameʼe fanolo, andrö wa kefe niʼowuloi muʼogunaʼö ia ba wameʼe fanolo. Maʼonorogö tödö sibai dolo-tolo si no matema ba mahaogö maʼosisiʼö wangogunaʼö yaʼia.—2 Korindro 8:20.