Löʼö. Tobali, mabulöʼö hadia nifaduhusima tödö na lö tefaudu ia ba Zura Niʼamoniʼö.

 Ara fatua lö mafazökhi Kitab Suci Terjemahan Dunia Baru ba li Inggris me döfi 1950, oya famoʼeluaha Zura Niʼamoniʼö nifaresoma si tobali dane-dane ba nifaduhusima tödö. Fatimbaisi tödöu hadia manö nifaduhusi tödö ndra Samaduhuʼö Yehowa si no ara mafaduhusi tödö, ba fareso hadia tefaudu daʼö moloʼö Sura Niʼamoniʼö.

1.   Nifaduhusima tödö: Lowalangi andrö tenga Lowalangi Sambua Tölu. Imane majalah Zion’s Watch Tower nifazökhi me baŵa si Fitu 1882, hewaʼae faduhu dödöma khö Yehowa, Yesu, hegöi eheha niʼamoniʼö, lö matema wamahaʼö si lö tefaudu moloʼö Sura Niʼamoniʼö wa yaʼira andrö no Lowalangi sambua tölu simane niwaʼö-waʼö niha

     Niwaʼö Zura Niʼamoniʼö: ”Yehowa ba no Lowalangida, ha Yehowa, ha yaʼia!” (5 Moze 6:4) ”Ba ha sambua Lowalangi, Ama andrö, ba zi otarai fefu hadia ia, ba yaʼita ba ba khönia ita ba ha samösa Zoʼaya, Yesu Keriso, samaʼema fefu hadia ia, ba yaʼita ba moroi khönia.” (1 Korindro 8:6, Lembaga Alkitab Indonesia) Imane Yesu, ”Me no sebua moroi khögu Nama.”​—Yohane 14:28, Lembaga Alkitab Indonesia.

2.   Nifaduhusima tödö: Lö hadöi famakao ba galitö narako. Majalah Zion’s Watch Tower nifazökhi me baŵa si Önö 1882, ihalö ngawua wehede ba Roma 6:23 nifoʼeluaha moroi ba King James Version, si tobali tuhonia, yaʼia daʼö ”Luo Horö Sa ba Faʼamate”. Imane majalah andrö, ”Ayati daʼa aoha khöda ba wangila eluahania. Sahöli dödöda, hewaʼae ato niha zi faduhu tödö wa moroi khö Lowalangi Taromali andre, hizaʼi tenga daʼö nifaduhusira tödö, ba lamane wangumaʼö wa moloʼö Sura Niʼamoniʼö, luo horö yaʼia daʼö faʼauri si lö aetu ba wamakao galitö narako.”

     Niwaʼö Zura Niʼamoniʼö: ”Sosala zaetu noso!” (Hezekieli 18:​4, 20) Huku safuria nibeʼe ba niha solawa khö Lowalangi tenga alitö narako, tobali ”faʼatekiko sagötö faʼara”.​—2 Tesalonika 1:9.

3.   Nifaduhusima tödö: Famatörö Lowalangi sindruhu-ndruhu sambua famatörö, tenga si so ba dödö. Imane majalah Zion’s Watch Tower nifazökhi me baŵa si Felendrua 1881 sanandrösa ba Wamatörö Lowalangi, ”Na tefasindro wamatörö andrö, daʼö samakiko famatörö si so ba gulidanö andre.”

     Niwaʼö Zura Niʼamoniʼö: ”Ba na luo razo andrö, ba iʼasogö gamatöröwa Lowalangi ba zorugo, amatöröwa si tebai adudu, götö-götö waʼara, ba faʼasalawa daʼö, ba lö möi ba niha böʼö; irasa dania gamatöröwa no mege fefu, ba ihori, ba yaʼia, ba lö tebulö, irugi zi lö aetu.”​—Danieli 2:​44

 Löʼö. Oya famoʼeluaha Zura Niʼamoniʼö niʼogunaʼöma na möi ndraʼaga manuriaigö. Sindruhu sa, mabeʼe ba niha Zura Niʼamoniʼö Terjemahan Dunia Baru ba lö maʼandrö mbölinia, börö me no tefarahu daʼö ba program famahaʼö ba Zura Niʼamoniʼö si lö muʼandrö kefe. Hizaʼi, lö fatimba khöma na niha nifahaʼöma andrö iʼogunaʼö famoʼeluaha Zura Niʼamoniʼö tanö böʼö.