Börö waʼomasira khö Lowalangi hegöi awöra niha, terou dödö ndra Samaduhuʼö Yehowa ba wanuriaigö ba niha fefu sanandrösa ba duria somuso dödö si so ba Zura Niʼamoniʼö, ba laturiaigö göi daʼö ba niha si no irai mangumaʼö ”lö adöni dödögu”. (Mataiʼo 22:37-​39) Faʼomasi khö Lowalangi zamarou yaʼaga ba woloʼö fareta Nononia ba ’wamaduhuʼö’. (Halöwö Zinenge 10:42; 1 Yohane 5:3) Lö tebulö ndraʼaga ba wamalua yaʼia, simane nifalua ndra samaʼeleʼö me föna. (Yeremia 25:4) Börö me maʼomasiʼö nawöma niha, maforege ba wanuriaigö ’Famatörö Lowalangi andrö, turia somuso dödö’ enaʼö teʼorifi fefu niha, farahu ba daʼö niha si no irai lö omasi mamondrongo.​—Mataiʼo 24:14.

 Asese falukhaga ba niha sadöni tödö me mafuli ndraʼaga ba nomora, hewaʼae na lö adöni dödöra ba wamobörö. Angeragö zi tölu ngawalö andre:

•   Tola manö no findra ira moroi ba nomora.

•   So niha böʼö ba nomo andrö sadöni tödö ba duria nifaʼemama.

•   Tola tebulö zalua ba zi samösa niha. Börö ngawalö zalua ba gulidanö hegöi ba niha, tola manö itugu ’laʼameʼegö tödö soguna ba wamati’, ba adöni dödöra ba duria si so ba Zura Niʼamoniʼö. (Mataiʼo 5:3) Tola göi tebulö dödö niha si no irai fatuwu ba duria somuso dödö, simane sinenge sotöi Faulo.—1 Timoteo 1:13.

 Hewaʼae simanö, lö mafaso niha ba wanemaʼö turia nifaʼemama. (1 Fetero 3:​15) Faduhu dödöma wa ero samösa niha moguna ihalö gangetula samösa sanandrösa ba wamosumange Lowalangi?—5 Moze 30:19, 20.