Na so Zamaduhuʼö Yehowa si no tebayagö idanö, hizaʼi lö möi ia saʼae ba wanuriaigö mazui lö fariawö ia ba niha si sara lala wamati khönia, lö mafandröndröuʼö ndraʼaga khönia. Hizaʼi mahatöʼö ndraʼaga khönia ba maforege enaʼö ifuli terou dödönia ba wamati.

 Lö maʼanemaiʼö maʼefasi niha samalua horö sebua. Hizaʼi, na so samösa Samaduhuʼö Yehowa si no tebayagö idanö ba ifuli-fuli ia ba wamalua amuata si lö tefaudu ba Zura Niʼamoniʼö ba lö ifalalini gera-erania, laʼaröuʼö ia mazui laʼefasi ia moroi ba gangowuloa. Imane ba Zura Niʼamoniʼö, ”Miheta ba gotaluami niha si lö sökhi andrö.”—1 Korindro 5:13.

 Hewisa na foʼomo ira matua niʼefasi hizaʼi Samaduhuʼö Yehowa nasa woʼomonia hegöi iraononia? Tebulö gamakhaitara ba wamati, hizaʼi lö tebulö wa yaʼira si sambua ösi nomo. Lö tebulö fongambatöra, faʼomasira, hegöi soʼamakhaita ba nösi nomora.

 Niha si no muʼefasi tola möi ia ba gangowuloama. Na omasi ia, tola latema mene-mene moroi khö ndra satua sokubaloi. Ohitö dödöra enaʼö ifuli tobali ia Samaduhuʼö Yehowa. Matemaʼö si fao faʼomuso dödö niha si no muʼefasi samalalini era-erania ba sangoromaʼö wa omasi ia ifuli tobali Samaduhu’ö Yehowa ba ifaudugö lala waʼaurinia ba goi-goi Zura Niʼamoniʼö.