Tenga. Lö adage-dage ndraʼaga möi manuriaigö, hizaʼi, faduhu dödöma tenga börö me no mafalua daʼö wa teʼorifi ndraʼaga. (Efeso 2:8) Hadia mbörö?

 Fatimbaisi duma-duma daʼa: Khalaigö atö samösa ndra matua soböwö, ifabuʼu ba niha wa ibeʼe mbuala sebua böli na so zangondrasi nahia si no itatugöi ginötönia. Na faduhu dödöu ba zi no ifabuʼu andrö, hadia öfalua? Tatu manö! Tola manö göi öfatunö daʼö ba niha si fahuwu khöu mazui ba nösi nomou enaʼö latema göi mbuala andrö. Hewaʼae simanö, tenga daʼö geluahania yaʼugö zotatugöi buala andrö börö me no öfalua niʼandrönia. Buala andrö ha nibeʼenia.

 Simanö göi, faduhu dödö ndra Samaduhuʼö Yehowa sanandrösa ba waʼauri si lö aetu si no ifabuʼu Lowalangi ba niha soloʼö khönia. (Roma 6:23) Maʼodödögö wangombakha ba niha sanandrösa ba wamatima, enaʼö göi latema howu-howu andrö moroi khö Lowalangi. Hizaʼi, tenga me no möiga manuriaigö, hasambalö saʼe teʼorifi ndraʼaga. (Roma 1:17; 3:28) Sindruhunia, gofu hadia nifaluada, tenga sinangea ita wanema howu-howu sahöli-höli dödö moroi khö Lowalangi. ”Tenga börö gamuata si sökhi nifaluada, hizaʼi börö waʼahakhö dödönia.”—Tito 3:5.