Lö fao ndra Samaduhuʼö Yehowa ba politik börö nifaduhusira tödö ba agama. Tefaudu daʼa simane niwaʼö ba Zura Niʼamoniʼö. Lö madönisi dödö niha ba politik, lö mabeʼe lima ba wotuhini partai politik mazui samatörö sedöna mutuyu, lö fao ndraʼaga ba wangai dadaoma ba wamareta, ba lö fao ndraʼaga ba demo enaʼö aheta samatörö moroi ba dadaomania. Faduhu dödöma wa so dane-dane saro moroi ba Zura Niʼamoniʼö wa lö mafalua daʼa.

•   Maʼoʼö duma-duma nibeʼe Yesu, lö omasi ia ba wanemaʼö dadaoma ba politik. (Yohane 6:​15) Ifahaʼö ndra nifahaʼönia wa yaʼira ”tenga tana khö niha gulidanö” ba ifaduhuʼö khöra wa tebai faʼawö ira ba politik.​—Yohane 17:14, 16; 18:36; Mareko 12:13-​17.

•   Lö faröi ndraʼaga ba Wamatörö Lowalangi simane niwaʼö Yesu, ”Ba teturiaigö dania Wamatörö Lowalangi andrö, turia somuso dödö ba zi sagörö ulidanö misa.” (Mataiʼo 24:14) Börö me yaʼaga andre tenge-tenge si möi salahi ba wangombakhaʼö waʼatohare Famatörö Lowalangi, andrö wa lö fao ndraʼaga ba politik gofu hadia ia soinia hewaʼae ba soi si toroi yaʼaga.​—2 Korindro 5:​20; Efeso 6:​20.

•   Börö me lö faʼawö ndraʼaga ba politik, andrö wa lö hadöi si tobali daha-tahama ba wangombakha ba niha sanandrösa ba Wamatörö Lowalangi, gofu hewisa dödöra ba politik. Moroi ba wehede hegöi ba gamuatama, maforomaʼö wa ha Famatörö Lowalangi niʼodaligöma ba wangeheta abula dödö si so ba gulidanö andre.​—Zinunö 56:12.

•   Börö me lö fao ndraʼaga ba politik, andrö wa tola maʼokhögö waʼafatalifusöta ba zi sagörö ulidanö. (Kolose 3:​14; 1 Fetero 2:​17) Hizaʼi, agama si fao ba politik tola aboto wahasara dödö ba nono mbanuania.​—1 Korindro 1:​10.

 Mafosumange ndra samatörö. Hewaʼae lö fao ndraʼaga ba politik, mafosumange ndra samatörö si so ba mbanuama. Tefaudu daʼa ba zi no iwaʼö Sura Niʼamoniʼö, ”Fefu niha enaʼö laʼoʼö li ndra samatörö.” (Roma 13:1) Maʼoʼö huku, mabuʼa pajak, ba falulu fohalöwö ndraʼaga khö ndra famareta ba wangaʼasogö faʼohahau dödö ba nono mbanuania. Lö fao ndraʼaga ba demo ba wangaekhugö samatörö, tobali maʼoʼö mene-mene Zura Niʼamoniʼö enaʼö maʼohe ba wangandrö ”razo hegöi ira samatörö fefu”, mendrua manö ba ginötö lahalö gangetula si tola molua-lua ba wamosumangema Lowalangi.​—1 Timoteo 2:​1, 2.

 Mafosumange göi angetula niha sanandrösa ba politik. Duma-dumania, lö mafawukaisi ba ginötö lafalua pemilihan umum mazui lö madönisi dödö niha somasi mamili.

 Hadia sawena mahalö gangetula wa lö fao ndraʼaga ba politik? Tenga. Ira nifahaʼö Yesu hegöi niha Keriso meföna lahalö gangetula wa lö fao ira ba politik. Moloʼö buku Beyond Good Intentions, ”Hewaʼae faduhu dödöra wa moguna lafosumange ndra samatörö, lö fao niha Keriso me föna ba ngawalö zoʼamakhaita ba politik.” Simanö göi niwaʼö mbuku On the Road to Civilization wa niha Keriso meföna, ”lö omasi ira lahalö dadaoma ba politik”.

 Hadia tobali samawukaisi sambua soi ndraʼaga me lö faoga ba politik? Löʼö. Yaʼaga andre ono mbanua somasi atulö ba niha, andrö lö moguna aombö dödö ndra samatörö khöma. Börö me lö fao ndraʼaga ba politik, imane laporan National Academy of Sciences of Ukraine me döfi 2001, ”Ba ginötö iadaʼa, so ösa niha si lö omasi khö ndra Samaduhuʼö Yehowa börö me lö fao ira ba politik; daʼa mbörö wa lafobahulu ira rezim Nazi hegöi Komunis totaliter me föna.” Hizaʼi, hewaʼae tefakao ndra Samaduhuʼö Yehowa ba ginötö mamatörö Soviet, ”lö tebulö ira tobali ono mbanua soloʼö khö ndra samatörö. Lö falimo ira, ba lö laʼalui tana khöra ba ginötö mohalöwö ira ba kabu hegöi ba pabrik, ba lö tobali ira samawukaisi ba rezim komunis”. Simanö göi ba ginötö iadaʼa, itutunö ba gafuriata laporan andrö wa nifaduhusi tödö hegöi nifalua ndra Samaduhuʼö Yehowa lö ”tobali famawukaisi waʼahono dödö ba tenga samakiko fahasara dödö ba ngawalö soi”.