Faduhu dödöma. Faduhu dödö ndra Samaduhuʼö Yehowa wa fefu nösi Zura Niʼamoniʼö andrö ”eheha Lowalangi zameʼe ba dödö niha, ba moguna ia”. (2 Timoteo 3:​16) Eluahania manandrösa daʼö ba Gamabuʼula Li si Bohou hegöi Amabuʼula Li Siföföna. Tobali, ira Samaduhuʼö Yehowa ba wanötöi Amabuʼula Li si Bohou yaʼia daʼö Buku Niʼamoniʼö Yunani Niha Keriso, börö me oföna lasura ia ba li Yunani. Amabuʼula Li Siföföna mufotöi ia Buku Niʼamoniʼö Heberaiʼo. Börö daʼö, lö tamane wa so moroi ba gotalua mbuku si so ba Zura Niʼamoniʼö si no atua mazui lö saʼae moguna.

 Me itema Faulo gangilata moroi khö Lowalangi, imane, ”Fefu hadia ia nisura me föna, tesura ia ba wamahaʼö yaʼita.” (Roma 15:4) Eluahania, oya wamahaʼö si tola tasöndra na tabaso Buku Niʼamoniʼö Heberaiʼo. Ba gotaluania yaʼia daʼö si no alua me föna ba so göi mene-mene si sökhi.

•   Moguna sibai hadia zalua me föna. Moroi ba Buku Niʼamoniʼö Heberaiʼo, ba daʼö taʼila hewisa me tewöwöi gulidanö ba hana wa tola aekhu niha ba horö. Na lö hadöi fangombakha simane daʼö, lö taʼila hezo moroi mbörötada ba hana wa tola mate niha. (1 Moze 2:7, 17) Aefa daʼö, ifatunö göi ba Gamabuʼula Li Siföföna sanandrösa ba niha somuso tödö hegöi si göna abula dödö simane nirasoida iadaʼa, ba hewisa Yehowa ba wanolo yaʼira.​—Yakobo 5:​17.

•   Mene-mene soguna. Ba Mbuku Amabuʼula Li Siföföna so zura Gamaedola hegöi sura Zangombakha. Si dombua buku andre so mene-mene zi sökhi soguna ba waʼaurida. So mene-mene hewisa enaʼö ohahau dödö zi sambua omo (Gamaedola 15:17), so göi mene-mene ba wangokhögö lala wangera-ngera si tefaudu sanandrösa ba halöwö (Gamaedola 10:4; Zangombakha 4:6), iraono si bohou ebua göi tola lafahaʼö ira enaʼö böi tobali zaya-zaya gölö waʼaurira (Zangombakha 11:9–​12:1).

 Baero daʼö, tola göi tafahaʼö ita ba goi-goi si so ba Goroisa Moze (lima mbuku si oföna si so ba Zura Niʼamoniʼö). Atulö sa wa lö lafalua ira niha Keriso Goroisa Moze, hizaʼi na tafalua goi-goinia tola itugu sökhi waʼaurida.​—3 Moze 19:18; 5 Moze 6:​5-7.