Börö me Samaduhuʼö Yehowa ndraʼaga, maʼodödögö enaʼö so waʼohahau dödö yomo ba nomo. Mafosumange Lowalangi börö me yaʼia Zamobörö fongambatö. (1 Moze 2:21-24; Efeso 3:14, 15) Ibeʼe goi-goi ba Zura Niʼamoniʼö si tola manolo niha si no mongambatö ba zi sagörö ulidanö enaʼö so khöra waʼohahau dödö.

 Maʼodödögö sibai ba woloʼö mene-mene si so ba Zura Niʼamoniʼö enaʼö tobali ndraʼaga foʼomo ira matua, foʼomo ira alawe, ba satua si sökhi. (Gamaedola 31:10-31; Efeso 5:22–6:4; 1 Timoteo 5:8) Mene-mene si so ba Zura Niʼamoniʼö tola ibeʼe waʼohahau dödö ba zi sambua fongambatö hewaʼae na faböʼö agamara. (1 Fetero 3:1, 2) Datafaigi hewisa wehede si dahauga niha me no tobali Samaduhuʼö Yehowa woʼomora:

•   ”Ba zi önö fakhe fangowaluma, fakara-kara manö ndraʼaga ba abu sibai dödöma. Hizaʼi, me no tobali Samaduhuʼö Yehowa Ivete, itugu so khönia waʼomasi hegöi faʼebolo dödö. Börö me no tebulö gamuatania, aro wongambatöma.”​—Clauir, moroi ba Brazil.

•   ”Lö fao dödögu me ibörögö foʼomogu, Chansa, ba wamahaʼö yaʼia ba Zura Niʼamoniʼö khö ndra Samaduhuʼö Yehowa, börö me so ba wangera-ngeragu wa yaʼira andrö samaʼudu nösi nomo. Hizaʼi, ba gafuriata aboto ba dödögu wa Sura Niʼamoniʼö tobali fanolo ba wongambatöma.”​—Agness, moroi ba Zambia.

 Ba ginötö manuriaigö ndraʼaga, matutunö ba niha wa mene-mene ba Zura Niʼamoniʼö tola tobali fanolo khöra

•   Ba wangalui foʼomo si sökhi

•   Enaʼö so waʼohahau dödö ba ndröfi wamobörö fangowalura

•   Ba wangokhögö fahuwusa si sökhi khö nama hegöi ina matua

•   Enaʼö atua-tua ba wangogunaʼö kefe

•   Enaʼö lö asese fakara-kara

•   Ba wangefaʼö sala nawöra

•   Ba wamahaʼö iraonora

 Tola manö alua zimane da’ö. Duma-dumania, moloʼö lembaga riset Sofres me döfi 1998, so 1 moroi ba zi 20 fongambatö sangokhögö gabula dödö sabölö-bölö, na ha foʼomo ira matua mazui foʼomo ira alawe zi tobali Samaduhuʼö Yehowa.

 No irai iwaʼö Yesu wa itaria alua gabula dödö ba nösi nomo soloʼö khönia. (Mataiʼo 10:32-36) Moloʼö Sejarawan Will Durant, ba ginötö wamatörö Romawi, ”laböbögö zi lö duhu ba niha Keriso wa yaʼira andre samabali ösi nomo”. a Ba ginötö iadaʼa, laböbögö göi zimane daʼö khö ndra Samaduhuʼö Yehowa. Tobali, hadia sindruhu wa alua gabula dödö ba zi sambua wongambatö börö me no tobali Samaduhuʼö Yehowa woʼomonia?

 Ba ginötö ihalö gangetula Mahkamah Eropa ba Hak Asasi Manusia sanandrösa ba wamobahulu nibeʼe khö ndra Samaduhuʼö Yehowa wa yaʼira samabali ösi nomo, iwaʼö wa sasesenia zangaʼasogö gabula dödö ba nomo yaʼia daʼö ösi nomo si tenga Samaduhuʼö, börö me lö omasi ”itema ba iʼosiwawöi agama dalifusönia”. Imane nasa Mahkamah, ”Wa no si toʼölö alua daʼa ba nösi nomo si lö fagölö agama, simanö göi ndra Samaduhuʼö Yehowa.” b Hewaʼae fatuwu niha ba nifaduhusi tödö ndra Samaduhuʼö Yehowa, lö tebulö ira ba woloʼö mene-mene Zura Niʼamoniʼö, ”Böi misulöni zi lö sökhi awönia si lö sökhi. . . . Na tola, migohi waʼatulö ba niha fefu.”​—Roma 12:17, 18.

 Laʼoʼö ndra Samaduhuʼö Yehowa hadia niwaʼö Zura Niʼamoniʼö wa tola mangowalu ira ”asala ba khö Zoʼaya”, yaʼia daʼö ha ba zi fagölö agama khöra. (1 Korindro 7:39) Mene-mene daʼa teʼodane-dane ba zura niʼamoniʼö, ba sökhi lua-luania. Duma-dumania, imane artikel me döfi 2010 ba Journal of Marriage and Family (Jurnal Fangowalu hegöi zi Sambua Omo) wa si toʼölönia laʼokhögö wahuwusa si sökhi na ”mangowalu zi samösa niha ba zi sara lala wamati khönia”. c

 Hizaʼi, lö irai lafarou ira Samaduhuʼö Yehowa enaʼö laröi woʼomora si tenga Samaduhuʼö. Imane Sura Niʼamoniʼö, ”Na so dalifusö ira matua si so foʼomo ira alawe si tenga si sara lala wamati, ba omasi woʼomonia andrö fao ira, böi yamuröi woʼomonia ira alawe andrö. Na so dalifusö ira alawe si so foʼomo ira matua si tenga si sara lala wamati, ba omasi woʼomonia andrö fao ira, böi yamuröi woʼomonia ira matua andrö.” (1 Korindro 7:12, 13) Laʼoʼö goroisa daʼa ira Samaduhuʼö Yehowa.