Watch Tower Bible and Tract Society of Pennsylvania yaʼia daʼö badan hukum nifasindro me döfi 1884 barö huku Commonwealth of Pennsylvania, AS. Lafasindro badan hukum daʼa ira Samaduhuʼö Yehowa ba wotuhini halöwö nifaluara ba zi sagörö ulidanö, simane famazökhi Zura Niʼamoniʼö hegöi publikasi si teʼodane-dane ba Zura Niʼamoniʼö.

 Tefaudu moroi ba gefe si no teʼowuloi, ohitö dödö badan hukum andre moʼamakhaita ia ba ”agama, pendidikan, hegöi sosial”, töra-töra ba ”wanuriaigö hegöi ba wamahaʼö niha sanandrösa ba Wamatörö Lowalangi barö wamatörö Yesu Keriso”. Ha yaʼira nikaoni zi tobali anggota ba badan hukum andre ba lö teʼodaligöi daʼö ba waʼebua dolo-tolo si no labeʼe. Ira sangai halöwö ba badan hukum andre, direktur hegöi anggotania, falulu fohalöwö ira khö ndra Boto Solohe Samaduhuʼö Yehowa.

 Baero Watch Tower Bible and Tract Society of Pennsylvania, oya nasa badan hukum si no lafasindro ira Samaduhuʼö Yehowa si so ba ngawalö soi. So ösa moroi ba gotalua badan hukum andre, lö tebulö ba wangogunaʼö ngawua wehede ”Watch Tower”, ”Watchtower”, mazui lafoʼeluaha ia moloʼö li niʼogunaʼö ba zi sambu-sambua mbanua.

 Sagötö me no lafasindro badan hukum andre oya halöwö zi no makhamö, simane:

•   Penulisan dan Penerbitan. No mafazökhi Sura Niʼamoniʼö mato 220 zuta waʼoya. No mafazökhi göi ngawalö mbuku si teʼodane-dane ba Zura Niʼamoniʼö mato 40 miliar ba zi töra 700 ngawalö li. No lafaʼanö Zura Niʼamoniʼö online si lö muʼandrö böli ba zi töra 120 ngawalö li ba situs web jw.org. Ba situs daʼa tola göi lasöndra wanema li moroi ba wanofu-nofu simane, ”Hadia Wamatörö Lowalangi Andrö?”

•   Pendidikan. So ngawalö zekola si no mafaʼanö ba wamahaʼö ba Zura Niʼamoniʼö. Duma-dumania, iʼotarai me döfi 1943, töra 8.000 ndra Samaduhuʼö Yehowa si fao ba Sekolah Alkitab Gilead Menara Pengawal. Lafahaʼö ira tobali utusan injil mazui ba wotuhini hegöi ba wolului halöwö nifaluama ba zi sagörö ulidanö. Ero migu, zuta niha waʼato sanema mbua moroi ba gangowuloa niha Keriso nifaluama, ba so ösa zi tenga Samaduhuʼö Yehowa. Mafahaʼö göi niha si lö mangila mombaso hegöi manura, ba mafazökhi mbuku soguna ba daʼö ba zi 120 ngawalö li.

•   Sosial. Mabeʼe wanolo ba waʼaniha ba zi göna abula dödö, zalua börö niha simane genosida (fangohori zi sambua mado) ba Rwanda me döfi 1994, ba matolo göi niha si göna bencana alam simane ndruru danö ba Haiti me döfi 2010.

 Badan hukum si no mafasindro andrö zi tobali fanolo ba halöwö nifaluama. Hizaʼi, lö maʼodaligö sibai badan hukum andre ba wamalua fefu halowöma. Ero samösa niha Keriso, laʼonorogö tödö wamalua goroisa Lowalangi, yaʼia daʼö ba wamalua halöwö fanuriaigö hegöi ba wamahaʼö niha sanandrösa ba duria somuso dödö. (Mataiʼo 24:14; 28:19, 20) Faduhu dödöma wa hasambalö itolo ndraʼaga Lowalangi, ba yaʼia ”zamanöi” halöwö nifaluama.—1 Korindro 3:6, 7.