Iʼotarai 28 mbaŵa si Felezara 2020, mutaruʼö toga wamati: Buku Niʼamoniʼö Famoʼeluaha Gulidanö si Bohou murilis ba li Nias.

Famoʼeluaha Gulidanö si Bohou andre buku sebua böli börö me tefaudu nösinia ba lö faröi ba goroisa Lowalangi si no muʼehehaini. (2 Timoteo 3:​16) Hadia manö gera-era sambö tefaudu si no mutimbagö ba wamoʼeluaha Sura Niʼamoniʼö si bohou andre? Haniha mbörö wa tola mufaʼanö wamoʼeluaha si bohou andre? Ba hana wa faduhu dödömö wa tola mufaduhusi tödö Wamoʼeluaha Gulidanö si Bohou andre?

”Buku sabölö oya laku mufamawa ero röfi yaʼia daʼö Sura Niʼamoniʼö”, isura Declan Hayes, profesor bisnis international. Alimagö sibai, lö fefu Zura Niʼamoniʼö si no mufoʼeluaha andrö tefaudu nösinia. Duma-dumania, ba zi sambua Sura Niʼamoniʼö, so ngaʼörö mbuku niheta börö me ”aföli” zamazökhi yaʼia. Ba Zura Niʼamoniʼö tanö böʼö, so ngawua wehede mazui amalalata wehede nifaböʼöni börö me tola manö abao dödö zombaso ba ginötö andre. Duma-dumania, lakaoni ”Ama-Ina” khö Lowalangi enaʼö adöni dödö niha.

Era-era sambö tefaudu ba wamoʼeluaha Sura Niʼamoniʼö yaʼia daʼö sanandrösa ba döi Lowalangi, Yehowa. (So ösa sarjana samoʼeluaha yaʼia tobali ”Yahweh”.) Ba Zura Niʼamoniʼö si no mufuli musura me föna, töi Lowalangi musura ba zi öfa hurufo konsonan Heberaiʼo. Tola mufoʼeluaha ia tobali YHWH mazui JHVH. Ba Mbuku Niʼamoniʼö Heberaiʼo * manö, arakhagö 7.000 kali tesöndra döi si tohude andre. (2 Moze 3:​15; Sinunö 83:18) Börö daʼö, aboto ba dödöda wa omasi Zomböi yaʼita na laʼila ba laʼogunaʼö döi daʼö niha samosumange yaʼia!

Hizaʼi, ba zi hauga abad silalö, ataʼu niha Yahudi wanötöi töi Lowalangi ha börö nifaduhusira tödö. Ba gafuriata, tedönisi dödö niha Keriso ba zi no lafaduhusi tödö andrö. (Halöwö Zinenge 20:29, 30; 1 Timoteo 4:1) Iadaʼa, no si toʼölö ba gotalua ndra samoʼeluaha Sura Niʼamoniʼö ba wamalalini töi Lowalangi faoma töinia ba faka, yaʼia daʼö ”Soʼaya”. So ösa Zura Niʼamoniʼö si bohou mufaʼanö ba li Inggris, latayaigö ngawua wehede ’töi’ ba Yohane 17:6, me imane Yesu, ”No ufatunö döimö andrö.” Ba Alkitab Bahasa Indonesia Sehari-hari, imane wamoʼeluaha ayati daʼö, ”No uʼombakhaʼö ndraʼugö.”

So ösa sarjana sangumaʼö wa lafalalini döi Lowalangi faoma töinia ba faka yaʼia daʼö ”Soʼaya” ha börö me laʼoʼö zi toʼölö mufalua. Tanö böʼö, lahalö gangetula simane daʼö enaʼö monönö waʼalaku na mufamawa. * Hizaʼi, na muʼoʼö zi toʼölö mufalua andrö ba lö lafolakhömi Lowalangi, iʼelifi ira Yesu. (Mataiʼo 15:6) Baero daʼö, lö hadöi dane-danenia ba Zura Niʼamoniʼö wa tola mufalalini döi sindruhu faoma töi ba faka. Yesu Keriso manö oya döinia ba faka, simane ”Taromali Lowalangi” ba ”Razo yawa razo”. (Famaʼeleʼö 19:11-​16) Hadia moguna mufalalini döi Yesu faoma fazambua döinia ba faka andrö?

Daʼö gabula dödö sinangea muʼameʼegö tödö. Angeragö hadia niwaʼö konsultan ba wamoʼeluaha Sura Niʼamoniʼö ba India sanandrösa ba wangeheta töi Lowalangi ba Zura Niʼamoniʼö, ”Lö adöni dödö niha Hindu ba wangila töi ba faka khö Lowalangi; omasi ira laʼila döinia sindruhu, ba na lö laʼila döinia andrö, lö fahuwu ira khö Lowalangi sangokhögö töi daʼö.” Sindruhu, omasi göi laʼila daʼö ira niha sangalui Lowalangi. Moguna sibai laʼila haniha döi Lowalangi enaʼö lasöndra waʼaboto ba dödö sanandrösa khönia, tenga ha faʼabölö si lö boto, hizaʼi si sambua boto, si tola taʼila. (2 Moze 34:​6, 7) Andrö wa iwaʼö Sura Niʼamoniʼö, ”Dozi soʼangaröfili töi Yehowa daʼö niʼorifi.” (Roma 10:13) Niha samosumange Lowalangi, lö tola löʼö laʼogunaʼö döinia andrö!

Me no mufazökhi Mbuku Niʼamoniʼö Yunani Niha Keriso Famoʼeluaha Gulidanö si Bohou ba li Inggris si oföna sibai me döfi 1950, daʼö zi tobali toga wamati. Ba zi fulu fakhe aefa daʼö, muzara-zara wamazökhi Buku Niʼamoniʼö Heberaiʼo. Me döfi 1961, Sura Niʼamoniʼö si no ahori so ba li Inggris mufazökhi ba zi sambua jilid. Sahöli-höli dödöda, no mufoʼeluaha döi Lowalangi yaʼia daʼö Yehowa ba Wamoʼeluaha Gulidanö si Bohou, arakhagö 7.000 kali tesöndra ia ba Gamabuʼula Li Siföföna. Sabölö tohudenia nasa, no mufangawuli döi Lowalangi ba Mbuku Niʼamoniʼö Yunani Niha Keriso, * tesöndra 237 kali waʼoya.

Tenga ha tobali famolakhömi Lowalangi me no mufangawuli döinia andrö, hizaʼi ibulöʼö göi waʼaboto ba dödöda. Duma-dumania, ato zamoʼeluaha Mataiʼo 22:44, ”No iwaʼö Soʼaya khö Zoʼaya yaʼo.” Hizaʼi sindruhunia, haniha zi fahuhuo ba haʼökhö fahuhuo ia? Na ba Wamoʼeluaha Gulidanö si Bohou, simane daʼa wamoʼeluahania Mataiʼo 22:44, ”No iwaʼö Yehowa khö Zoʼaya yaʼo”, tefaudu sibai ba Zinunö 110:1. Börö daʼö, tola lafaehusi ira sombaso haniha Lowalangi Yehowa ba haniha Nononia.

Samazökhi Famoʼeluaha Gulidanö si Bohou andre yaʼia daʼö Watch Tower Bible and Tract Society, badan hukum sosalahini ira Samaduhuʼö Yehowa. Ba zi töra otu fakhe, ira Samaduhuʼö Yehowa andre no lafazökhi ba lafaʼoheʼö misa Zura Niʼamoniʼö ba zi sagörö ulidanö. So ngawawa ndra Samaduhuʼö Yehowa samaʼanö Famoʼeluaha Gulidanö si Bohou, töinia Panitia Samoʼeluaha Sura Niʼamoniʼö Gulidanö si Bohou. Fefu zi farahu ba panitia andrö lö omasi ira na yaʼira nifosumange, andrö wa lö laʼombakhaʼö döira irugi waʼamatera.​—1 Korindro 10:31.

Hana wa famoʼeluaha daʼa mufotöi ia Famoʼeluaha Gulidanö si Bohou? Ba wehede famasao nisura ba edisi 1950, itutunö wa daʼö zoʼamaedolagö faʼafaduhu dödöda saro wa no so niha gulidanö ”föna mbawandruhö gulidanö si bohou” simane nifabuʼu ba 2 Fetero 3:​13. Simane nisura ndra panitia andrö, sagötö ”waʼatebulö gulidanö satua andre tobali ulidanö si bohou”, moguna sibai mutatugöi enaʼö mohaga ”zindruhu andrö sohau-hau moroi ba Daromali Lowalangi” soroma moroi ba wamoʼeluaha Sura Niʼamoniʼö.

Muʼameʼegö tödö sibai waʼatefaudu. Ira samoʼeluaha ba li Inggris, lafoʼeluaha ngawua wehede moroi ba li Heberaiʼo, Aramo hegöi Yunani, laʼogunaʼö nösi zura fondrege zi sökhi. Lahaogö sibai laʼosisiʼö ngawua wehedenia enaʼö tefaudu sibai ba nösi zura si oföna tesura, hizaʼi laʼogunaʼö li salio laʼila eluaha ira sombaso ba ginötö andre.

Lö tokea ita me so ösa ndra sarjana sanuno Famoʼeluaha Gulidanö si Bohou andre börö waʼalöfaröinia hegöi faʼatefaudunia. Professor Benjamin Kedar-Kopfstein, sarjana li Heberaiʼo ba Israel, imane me döfi 1989, ”Me ufalua penelitian linguistik ba Zura Niʼamoniʼö Heberaiʼo hegöi ba ngawalö wamoʼeluahania, asese uʼogunaʼö edisi li Inggris nifotöi Famoʼeluha Gulidanö si Bohou. Ero ufalua daʼö, itugu faduhu dödögu wa soroi ba dödö wamazökhi buku andrö börö me laʼodödögö enaʼö tefaudu waʼaboto ba dödöra.”

No sinangea na lafazökhi Wamoʼeluaha Gulidanö si Bohou ira Samaduhuʼö Yehowa ba niha si lö mangogunaʼö li Inggris. Iadaʼa, no mufazökhi wamoʼeluaha andrö, he si no ahori so hegöi si löʼö, ba zi 191 ngawalö li. Enaʼö aoha wamazökhi yaʼia, so lala wamoʼeluaha Sura Niʼamoniʼö si no lasöndra, yaʼia daʼö laʼorudugö ngawua wehede Zura Niʼamoniʼö faoma teknologi komputer. No mufasindro departemen Pelayanan Penerjemahan ba wanolo ira samoʼeluaha. Lafataro ndra Panitia Penulisan ira Boto Solohe Samaduhuʼö Yehowa ba wamaigi-maigi halöwö famoʼeluaha Sura Niʼamoniʼö. Hizaʼi, hewisa sibai wamalua halöwö daʼa?

Si oföna, niha Keriso si no molulu faʼaurira khö Lowalangi, lafataro ira tobali tim samoʼeluaha. Moloʼö si no irai alua, abölö sökhi wamoʼeluaha nifalua ndra samoʼeluaha si falulu fohalöwö ba tim moroi na fabali-bali ira wohalöwö. (Amaedola 11:14) Si toʼölönia, fefu anggota tim no toʼölö lafoʼeluaha publikasi ndra Samaduhuʼö Yehowa. Aefa daʼö, lahaogö wamomaha tim daʼa ba goi-goi wamoʼeluaha Sura Niʼamoniʼö hegöi ba wangogunaʼö ngawalö program komputer si no mudouʼö ba wotuhuni halöwö daʼa.

Muʼoroisi khö ndra tim samoʼeluaha enaʼö lafaʼanö Zura Niʼamoniʼö si tefaudu ba salio laʼila eluaha ira niha si toʼölö. Na lö fasala atö geluahania, lafoʼeluaha ia ero sambu-sambua ngawua wehede, hizaʼi tebai lafuyuʼö wamoʼeluaha ösi zura si oföna tesura. Hewisa wamalua daʼa? Nehegö atö Zura Niʼamoniʼö sawena mufazökhi andre. Lafili ngawua wehede si tefaudu ba li Nias ira samoʼeluaha, si tola laʼogunaʼö ba ngawua wehede sasese tesöndra ba Zura Niʼamoniʼö Famoʼeluaha Gulidanö si Bohou. Watchtower Translation System si so ba komputer, iforomaʼö ngawua wehede Zura Niʼamoniʼö si faoma moʼamakhaita ba si fagölö eluaha. Baero daʼö, iforomaʼö göi ngawua wehede li Yunani mazui Heberaiʼo si tobali böröta ngawua wehede li Inggris, enaʼö aboto ba dödö zamoʼeluaha hewisa dania wamoʼeluaha ngawua wehede li Yunani mazui Heberaiʼo andrö na tesöndra ia ba danö böʼö. Na hasara dödö ndra samoʼeluaha ba ngawua wehede andrö, labörögö wamoʼeluaha Sura Niʼamoniʼö, laʼogunaʼö komputer ba wangoromaʼö ngawua wehede si fagölö eluaha ba li Nias, ba lafoʼeluaha ero sambu-sambua ayati.

Hewaʼae simanö, famoʼeluaha andrö tenga ha asala mufaböʼöni zi sandrohu fehede faoma ngawua wehede tanö böʼö. Muforege sibai ba wotatugöi enaʼö ngawua wehede si no mufili ba li Nias tefaudu ba nösi Zura Niʼamoniʼö ero sambu-sambua waö-waö. Muʼameʼegö tödö göi wamaigi amakhoita li hegöi sintaksis-nia enaʼö ami ba wombaso ba lö faböʼö ba zi toʼölö muʼogunaʼö. Oroma sibai wamorege si no mufalua ba halöwö daʼa. Edisi li Nias ba Wamoʼeluaha Gulidanö si Bohou sindruhu-ndruhu famoʼeluaha Taromali Lowalangi saoha ba wombaso, aboto ba dödöda, alio muʼila geluaha ba tefaudu ba nösi zura si oföna tesura. *

Mafarou ndraʼugö enaʼö öfareso samösa Mbuku Niʼamoniʼö Famoʼeluaha Gulidanö si Bohou. Tola öbaso ia secara online mazui ba aplikasi JW Library, mazui tola öhalö sambua zi no mucetak ba mbanua niha Keriso Samaduhuʼö Yehowa sahatö ba nahiamö. Tola öbaso ia si fao faʼafaduhu dödö wa no muhaogö mufoʼeluaha wehede Lowalangi ba li niʼogunaʼömö. Lö moguna muʼaombösi tödö, ba zi lö ara tö hasambalö fao dödömö wa Sura Niʼamoniʼö si bohou mufazökhi andre sindruhu-ndruhu toga wamati!