Mangondrasi Betieli
Si fao faʼomuso dödö makaoni ndraʼugö ba wangondrasi gödo ndraha khöma, nifotöi Betieli. Ba zi hauga gödo ndraha khöma, so pameran si tola öfaigi.
Mufuli Mutehegö We’amöi Tur: Ba ngawalö soi, mufuli mufalua tur ba gödo ndraha khöda i’otarai 1 mbaŵa si Önö 2023. Ena’ö ö’ila danö bö’önia nasa, hubungi gödo ndraha somasi’ö ö’ondrasi. Böi möi’ö tur na no göna ndra’ugö COVID-19, mofa’aukhu, göna ndra’ugö flu, mazui no fakhamö fariawö ndra’ugö ba niha si positif COVID-19.
Amerika Serikat
Ba artikel da’a
Informasi Tur
Pameran
Tur ba Warwick si Tola Tafaigi ba Ta’anöröi Samösa
Sura Ni’amoni’ö hegöi Töi Lowalangi (The Bible and the Divine Name). Ba pameran da’a, so ngawalö Zura Ni’amoni’ö si no atua si tola lafaigi ira sangondrasi. Ba pameran da’a, oroma göi hewisa wa lö tebulö so döi Lowalangi ba Zura Ni’amoni’ö hewa’ae na ato niha samorege ba wanayaigö ya’ia. So göi sambua galeri, sangoroma’ö ngawalö Zura Ni’amoni’ö si no atua tanö bö’ö hegöi gama-gama sabölö atua sibai so’amakhaita ba Zura Ni’amoni’ö.
Ono Mbanua ba Döi Yehowa (A People for Jehovah’s Name). Ba pameran da’a, oroma sejarah ndra Samaduhu’ö Yehowa. Tola göi ö’ila gama-gama si no atua, gambara, hegöi waö-waö si no irai alua sangoroma’ö hewisa me izara-zara Yehowa ba wame’e fanuturu lala, famaha’ö hegöi ba wamatörö ono mbanuania ena’ö alua gohitö dödönia.
Gödo Sebua—Famati si Fao Bua-Bua (World Headquarters—Faith in Action). Da’a pameran sanutunö halöwö ndra panitia Boto Solohe, ba hewisa lalara ba wanolo ira Samaduhu’ö Yehowa ena’ö la’o’ö mene-mene Zura Ni’amoni’ö sanandrösa ba gangowuloa, ba wombali’ö nifaha’ö, ba wemanga ö wamati, hegöi ba wangoroma’ö fa’omasi.
Tur ba Patterson si Tola Tafaigi ba Ta’anöröi Samösa
Banua Nitutunö ba Zura Ni’amoni’ö Me Abad Siföföna. Hadia no irai ökhalaigö hewisa wa’auri niha me so Yesu ba gulidanö? Ba pameran da’a, tola ö’ila mazui fao ndra’ugö ba wamalua halöwö sero ma’ökhö nifalua niha me abad siföföna. Tola itolo ndra’ugö pameran da’a ena’ö itugu adöni dödöu ba wombaso Sura Ni’amoni’ö.
Koin Nitutunö ba Zura Ni’amoni’ö Me Abad Siföföna. Ba pameran da’a, mufaehagö ngawalö koin asli me abad siföföna si no mututunö ba Mbuku Ni’amoni’ö Yunani Niha Keriso. Itutunö göi ngawalö zadöni dödö sanandrösa ba koin andrö ba ifatunö hewisa wa mo’amakhaita da’ö ba waö-waö Zura Ni’amoni’ö.
”Nifaha’ö Yehowa Dania Ndraonou Ma’afefu.” Ba pameran da’a, mudunö-dunö sejarah so’amakhaita ba sekola hegöi famaha’ö nifalua organisasida. Faigi hewisa zekola andrö möi fanolo khö ndra talifusöda sangoroma’ö fa’aohagölö irege tobali ira samaha’ö si sökhi mazui tobali ira satua sokubaloi ba mbanua niha Keriso.
”Ta’oguna’ö Huku ba Wamaduhu’ö Turia Somuso Dödö.” Ba pameran da’a, mudunö-dunö sejarah ndra Samaduhu’ö Yehowa si lö mondröi famatira hewa’ae abölö-bölö wamakao nitaögöra. Faigi hewisa wa mofozu organisasida ba wangoguna’ö huku ba wango’awögö halöwö fanuriaigö ba zi sagörö ulidanö.