Ne fakaheke e Paulo mo Sila e Atua ke he lologo he haia a laua he fale puipui. (Gah 16:25) He vahā foou nei, ne uhu he tau matakainaga e tau lologo he Kautu he kemuaga pagotā i Sachsenhausen, Nazi Germany, mo e he uta fakapaea ki Siberia. Fakakite he tau fakafifitakiaga nei e malolō he tau lologo ke omoomoi e loto malolō he tau Kerisiano ne fehagai mo e tau kamatamata.

Loga e tau vagahau foki ka nakai leva ti moua e tohi lologo foou ne fakahigoa “Sing Out Joyfully” to Jehovah. Ko e ha tohi lologo ne kua moua e tautolu, maeke a tautolu ke tokaloto e tau kupu he fakamahani ai ke uhu he tapuakiaga he magafaoa. (Efe 5:19) Lagomatai he agaaga tapu mogoia a tautolu ke liu manatu e tau lologo ka tupu ha kamatamata. Maeke e tau lologo he Kautu ke lagomatai a tautolu ke hagaaki ke he amaamanakiaga ha tautolu. To omoomoi foki he tau lologo ia a tautolu ka fehagai mo e tau kamatamata. Ti ka mitaki e tau logonaaga ha tautolu, lagomatai he tau kupu atihake a tautolu ke “lologo ai mo e leo lahi mo e fiafia” ha ko e tuaga mitaki he loto. (1No 15:16; Sal 33:1-3) Kia eketaha a tautolu mo e fakaaoga fakamitaki ha tautolu a tau lologo he Kautu!

KITEKITE E VITIŌ KO E LOLOGO NE ATIHAKE E TAU TAGATA GAHUA, TI TALI E TAU HŪHŪ NĀ:

• Ko e heigoa e tau tutūaga ati takitaki e Matakainaga ko Frost ke fati e lologo?

• Omoomoi fēfē he lologo e tau matakainaga he kemuaga pagotā i Sachsenhausen?

• Ko e tau tutūaga fe he tau aho takitaha ka fakamalolō he tau lologo he Kautu a koe?

• Ko e tau lologo fe he Kautu kua manako a koe ke ako manatu?