Manako a tautolu ke fakamalū e tau tega he kupu mooli ne tō e tautolu. (1Ko 3:6) Ka moua e tautolu e taha tagata ne fakakite e fiafia, mitaki ke toka e hūhū ka fakatutala e tautolu ka liliu atu a tautolu. To ati hake he mena nei e amaamanaki haana mo e fakamukamuka e tauteuteaga ha tautolu ma e liu aahi atu. Ka liliu atu a tautolu, tala age ki a ia e kakano ne o atu a tautolu ke tali e hūhū ne hūhū e tautolu he ahiahi atu ha tautolu kua mole.

• Ka tauteute haau a fakafeleveiaaga ma e gahua he taha fale ke he taha fale, fakatoka foki e taha hūhū ke tali ka liu atu. Liga fakavē ai ke he matapatu ne fakatutala he tohi ne foaki e koe. Po ke hūhū ne tali he taha he tau tohi fakaako ha tautolu ne maeke ia koe ke fakakite ka liu atu.

• Ka fakaoti e fakatutalaaga haau mo e tagata ne fakakite e fiafia, tala age kua manako a koe ke liu tutala mo ia ti talahau e hūhū liu aahi atu haau ne kua tauteute. Moua e vala tala matutaki ka maeke.

• Ka tala age a koe ki a ia to liu atu a koe he tulā kotofa, fakamooli e maveheaga haau.​—Mat 5:37.