KAKANO KUA AOGA AI: Tuga e laulahi he tau koloa fakaaoga, ko e matutaki kapitiga he initanete (social network) kua maeke ke lagomatai po ke fakahagahaga kelea. Ko e falu Kerisiano ne fifili ke nakai fakaaoga e matutaki kapitiga he initanete. Ka e falu ne fakaaoga ai ke matutaki mo e tau magafaoa mo e tau kapitiga. Ka kua manako e Tiapolo ke fakaaoga fakahehē e tautolu e matutaki kapitiga he initanete ti moumou e tuaga mitaki mo e malolō fakaagaaga ha tautolu. Ke tuga a Iesu, maeke ia tautolu ke fakaaoga e tau matapatu fakaakoaga he Kupu he Atua ke mailoga e tau hagahaga kelea ti kalo kehe ai.​—Luk 4:4, 8, 12.

TAU MATAHELE KE KALO KEHE AI:

• Molea e fakaaoga he social media. He lahi e magaaho ne mole he fakaaoga e matutaki kapitiga he initanete po ke matutaki vala tala he initanete (social media) ka fofō e magaaho uho ha tautolu kua lata ma e tau mena fakaagaaga

  Fakaakoaga he Tohi Tapu: Efe 5:15, 16; Flp 1:10

• Onoono ke he tau mena fakalialia. Ko e kitekite ke he tau fakatino fakaohooho ka takitaki ke he velagia ke he tau fakatino telefua po ke mahani feuaki. Ko e totou he tau vala tala tiaki taofiaga ka moumou e tua he tagata

  Fakaakoaga he Tohi Tapu: Mat 5:28; Flp 4:8

• Tuku e tau talahauaga po ke tau ata ne nakai lata. Ha kua fakavai e loto, liga hihiga e tagata ke tuku e tau talahauaga po ke tau ata ne nakai lata ke he matutaki kapitiga he initanete. Ti kua moumou he mena nei e tuaga mitaki he tagata po ke fakalolelole e tua haana

  Fakaakoaga he Tohi Tapu: Rom 14:13; Efe 4:29

KITEKITE E VITIŌ FAKAAOGA FAKAILOILO E SOCIAL-NETWORK, TI TUTALA KE HE PUHALA KE KALO HE TAU TUAGA NĀ: