MOUI KO E TAU KERISIANO
Fakaalofa ke he Atua mo e Katofia—Puhala ke Feaki Ai
Pete kua nakai tapiki mau e tau Kerisiano ke he Fakatufono faka-Mose, ko e tau poakiaga mua ue atu ne ua—ke fakaalofa ke he Atua mo e fakaalofa ke he katofia ha tautolu—kua fakakatoatoa agaia e manako ha Iehova ma tautolu. (Mat 22:37-39) Nakai moua noa e fakaalofa pihia. Kua lata ke feaki ai. Puhala fe? Taha puhala aoga ko e totou he Tohi Tapu he tau aho takitaha. Ka manamanatu a tautolu ke he tau faahi kehekehe he mahani he Atua nukua fakakite he tau Tohiaga Tapu, kitia e tautolu e “fulufuluola a Iehova.” (Sal 27:4) Ko e fua, tupu e fakaalofa ha tautolu ma Haana ti tatai fakahaga e puhala manamanatu ha tautolu mo e Haana. Omoomoi he mena nei a tautolu ke omaoma ke he tau poakiaga he Atua, putoia e poaki ke fakakite e fakaalofa foaki noa ma e falu. (Ioa 13:34, 35; 1Io 5:3) Hanei e tolu e puhala ke fiafia he totou e Tohi Tapu:
-
Fakaaoga e manamanatuaga haau, ti fakagahuahua ke he loto. Manamanatu ko koe i ai. Ko e heigoa haau ka kitia, logona, mo e hohogi? Ko e heigoa e tau logonaaga ha lautolu ne liga putoia ai?
-
Hikihiki e puhala haau. Hanei e falu manatu: Totou fakaleo lahi, po ke muitua ka e fanogonogo ke he tapakiaga autiō. Totou hagaao ke he taha tagata po ke matakupu pauaki he Tohi Tapu ka e nakai ni totou fakapapahi e tau veveheaga. Ma e fakatai, fakaaoga e Apenetiki A7 po ke B12 he New World Translation of the Holy Scriptures ke totou hagaao ki a Iesu. Totou e veveheaga katoa ne moua mai e lauga he aho. Totou fakapapahi e tau tohi he Tohi Tapu ke he magaaho ne tohia ai.
-
Totou ke maama. He totou taha e veveheaga he tau aho takitaha ti maama mo e manamanatu fakahokulo ki ai kua laukauka mai he totou e tau veveheaga loga ka e oti. Manamanatu ke he takatakaiaga. Kumikumi fakamatafeiga ki ai. Fakaaoga e tau mepe mo e falu fakamaamaaga foki. Kumikumi ke he taha manatu ne nakai maama e koe. Ka maeke, fakaaoga fakalahi e magaaho ke manamanatu fakahokulo ki ai.