Tala Tumau: Ua logona hifo kua lata a koe ke fakamaama e tau mena oti. Fakaaoga e Iesu e tau hūhū ke lagomatai e tau tagata ke manamanatu mo e hokotia ke he manatu hako. (Mat 17:24-27) Ko e tau hūhū ne fakaalaala e fakaakoaga ti lagomatai a koe ke fifili e mena ne maama mo e talitonu he tagata fakaako haau. (be-E 253 ¶3-4) Ka hūhū, kia fakauka ti leo ke he tali. Ka hepe e tali he tagata fakaako, ua tala age ki a ia e tali hako ka e takitaki atu a ia ke hokotia ke he manatu hako he hūhū foki falu hūhū. (be-E 238 ¶1-2) Tutala he puhala kua maeke e tagata fakaako ke iloa e tau manatu foou.​—be-E 230 ¶4.

Taute Ai ke Uka: Kalo kehe he manako ke talahau e tau mena oti ne iloa e koe hagaao ke he matakupu. (Ioa 16:12) Hagaaki ke he matapatu manatu he paratafa. (be-E 226 ¶4-5) Ko e tau vala tala fakamatafeiga ne fulufuluola foki ka fakataukalau e tau matapatu manatu. (be-E 235 ¶3) Ka maama he tagata fakaako e matapatu manatu, holo atu ke he taha paratafa.

Taute Noa Ni he Vala Tala: Ko e foliaga ha tautolu ke hokotia ke he loto, nakai ko e taute noa ni he vala tala. (Luk 24:32) Fakagahua e malolō he Kupu he Atua he hagaaki ke he tau matapatu kupu Tohi Tapu he fakaakoaga. (2Ko 10:4; He 4:12; be-E 144 ¶1-3) Fakaaoga e tau fakataiaga mukamuka. (be-E 245 ¶2-4) Manamanatu ke he tau paleko fakatagata mo e tau taofiaga he tagata fakaako, ti hikihiki e fakaakoaga ke lata mo ia. Hūhū e tau hūhū pehēnei: “Fēfē e logonaaga haau ke he tau mena kua fakaako e koe?” “Ko e heigoa ne fakaako he mena nei ki a tautolu hagaao ki a Iehova?” “Ko e heigoa e aoga ne kitia e koe he fakagahua e fakatonuaga pihia?”​—be-E 238 ¶3-5; 259 ¶1.