Taute he Tau Fakamoli a Iehova e tau matagahua ke lagomatai aki e lotu mo e tau tagata ke molea 200 e motu. Ka e kavi ni ke 35 e motu ia ne moua e tau tupe foaki ke totogi aki e tau fakamoleaga ha lautolu. Puhala fe kua leveki e tau fakamoleaga he tau motu ne nakai monuina lahi?

Kua fakatutala e Kau Fakatufono he Tau Fakamoli a Iehova ke he tau manako fakaagaaga mo e tau matagahua he tau matakainaga Fakamoli he lalolagi katoa. Kua fatifati mo e fakaaoga fakamitaki e tau tupe. Ka lahi e tupe kua moua he la ofisa ke leveki aki e tau matagahua he matakavi kua foaki e lautolu e falu tupe ke he tau motu kua nakai lahi e mena ne moua. Muitua he fakatokaaga nei e fakafifitakiaga he tau Kerisiano fakamua atu he felagomataiaki ke “fakatatai ai.” (2 Korinito 8:14) Fakaaoga e lautolu e muhumena ke lagomatai e nofogati he falu Kerisiano ne tote e mena moua.

Fēfē e logonaaga he tau matakainaga ha tautolu ne moua e tau tupe nei mai he falu la ofisa? Ma e fakatai, i Tanzania ne molea e hafa e puke tagata ne tote hifo ke ua e talā he aho ke momoui ai, ne fakaaoga e tau tupe ia ke fakafoou aki e Fale he Kautu ne fakaaoga he Fakapotopotoaga Mafinga. Tohi he fakapotopotoaga: “Tali mai he fakafoou, ne tokologa lahi e tagata ne o mai! Loto fakaaue a mautolu ke he fakatokatokaaga ha Iehova mo e tau matakainaga he lalolagi katoa ma e fakamokoi ha lautolu, ti maeke a mautolu ke moua e matakavi fulufuluola nei ke tapuaki ai.”

Falu he tau matakainaga ha tautolu i Sri Lanka ne matematekelea he kū e tau mena kai ha ko e gagao COVID-19. Ko Imara Fernando mo e tama taane haana ko Enosh e falu ia lautolu. Ka e fakaaue ke he tau tupe foaki mai he falu motu kua moua e laua e lagomataiaga kua lata. He lautohi, ne tohi e laua: “Fakaaue a maua ke he tau matakainaga ne fakakite e fakaalofa ki a maua he tau magaaho uka nei. Fiafia mooli a maua ke fai vala he magafaoa nei, ti liogi tumau a maua ke lagomatai e Iehova e tau matakainaga oti he tau aho fakamui nei.”

Mena fe ni ne nonofo ai e tau matakainaga ha tautolu, kua omoomoi a lautolu ke foaki e tau mena moua ha lautolu. Ma e fakatai, ko Enosh ne taute e puha tote ke tuku e tau tupe haana ke foaki ke lagomatai e tau magafaoa kua matematekelea. Fakakite e Guadalupe Álvarez e aga fakamokoi pihia foki. Nofo a ia he taha vala i Mesikō ne tokogahoa ne moua e totogi tote po ke nakai moua tumau e totogi. Ka e foaki e ia e tau mena kua fahia a ia ki ai. Tohi e ia: “Fakaaue au ki a Iehova ma e mitaki mo e fakaalofa fakamooli haana. Iloa e au ko e tau tupe ne tuku e au to lafi ke he tau tupe ne tuku he falu mo e to aoga ke he tau matakainaga haaku ne matematekelea.”

Ko e tau la ofisa ne fakafano e tau tupe ke he tau matakavi ne matematekelea kua fiafia he taute pihia. “Ke he loga e tau tau ko e gahua he motu ha mautolu kua lata ke moua e lalagoaga fakatupe he falu motu,” he talahau e Anthony Carvalho ne fekafekau he La Komiti i Brazil. “Ha ko e lalagoaga nei, kitia e mautolu e ofoofogia he tupu ki mua. Mogonei kua hiki e tuaga fakatupe ha mautolu ti maeke a mautolu ke lagomatai e falu. Kua onoono e tau matakainaga ha mautolu mogonei ke he gahua fakamatala he lalolagi katoa mo e kitia e mena kua maeke ia lautolu ke lagomatai ko e tau tutaki fakamakai ha Iesu.”

Ha e fe e puhala he Tau Fakamoli a Iehova kua lalago e tau matakainaga ha lautolu kua matematekelea? He nakai fakafano fakahako atu e tupe ke he tau la ofisa he tau motu kehe ka e foaki ke he gahua he lalolagi katoa. Maeke ke taute e mena nei he tuku he puha mena fakaalofa he fakapotopotoaga ne tū ai “Gahua he Lalolagi Katoa” po ke puhala he donate.pr418.com. Kua loto fakaaue lahi mahaki ke he tau tupe foaki oti ia.