He 2022, ko e felakutaki, uka fakatupe, mo e lekua e takatakaiaga ne kaputia he tau vala tala. Ko e Tohi Tapu ni ne maeke ke fakamaama e kakano mooli he tau mena oti nei ne tutupu.

Ko e kakano mooli he tau mena tutupu he 2022

 Ko e tau mena tutupu he tau kua mole ne kitia maali foki kua nonofo a tautolu he mena ne talahau he Tohi Tapu ko e “tau aho fakamui.” (2 Timoteo 3:1) Ko e magahala ia ne kamata he tau 1914. Mailoga e tau mena tutupu mogonei ne felauaki mo e talahauaga he Tohi Tapu ke he vahā ha tautolu:

 “Tau tau.”—Mataio 24:6.

•   “2022 Ko e Tau ne Liu a Europa Lauia he Matakutakuina he Tau.” a

 “Tau hoge.”—Mataio 24:7.

•   “2022: Tau ne Hoge Lahi Mahaki.” b

 “Tau tatalu.”—Luka 21:11.

•   “Ko e liu mafuta mai he gagao polio, tuga he tupu lahi e monkeypox mo e COVID-19 kua matutaki ke hagahaga kelea, ti mailoga ki ai kua holo ki mua e pikitia he gagao nei mo e mamate e tau tagata.” c

 “Tau Mena Fakamatakutaku.”—Luka 21:11.

•   “Ko e vevela e matagi, tō e laā, tau afi, mo e hake e vai. Ko e vahā mafana he 2022 to manatu mooli e tau mena tutupu he matagi kelea lahi mahaki ne moumou mo e tamate e teau afe he tau momoui, malona e tau kaina he tau miliona tagata he lalolagi katoa.” d

 “Tau fakaagitau [po ke, miha.].”—Luka 21:9.

•   “Ko e holo ki mua he ita he tau tagata hagaao ke he lekua fakatupe, mua atu e tauuka he tau koloa, ti holo ki mua e totoko he tau tagata ke he fakatufono he 2022.” e

Ko e heigoa ka tamai he tau kahau?

 Nakai maeke ha tagata ke talahau mooli e mena ka tupu he 2023. Ka e iloa e tautolu, to nakai leva ti fakalava mai e Kautu he Atua, po ke fakatufono he lagi ke hiki e tuaga he lalolagi. (Tanielu 2:44) To utakehe he fakatufono ia e punaaga he matematekelea he tagata mo e fakamooli to hoko mai e finagalo he Atua ke he lalolagi.—Mataio 6:9, 10.

 Tomatoma a mautolu ki a koe ke muitua ke he fakatonuaga ha Iesu Keriso mo e “kia mataala” ke he tau mena tutupu he lalolagi hane fakamooli e perofetaaga he Tohi Tapu. (Mareko 13:37) Fakamolemole matutaki mai ki a mautolu ke iloa atu foki e puhala ka lagomatai he Tohi Tapu a koe mogonei mo e puhala ka foaki ki a koe mo e magafaoa haau e amaamanakiaga mooli ma e vahā i mua.