Kamata a Rusia ke fofō fakakautau a Ukraine ia Fepuari 24, 2022, ti fakahagahaga kelea e tau momoui he tau miliona tagata ne lali ke toka fakamafiti e motu ka e fehola. a

 “Pāpā e tau pomu. Lahi mahaki e matakutakuina haaku ti uka ke fakamaama ke he tau kupu. Mogo ne iloa e mautolu kua fai tuleni ke lau e tau tagata, fifili a mautolu ke ō kehe. Peke e koe e moui katoa haau ke he taha e kato fafa tote. Maeke ni a mautolu ke uta e tau lautohi fakatagata, tau tegavai, vai inu, mo e tau sineke (snack). Toka hifo oti e tau mena ne toe ka e ō ke he tuaga tuleni pete he pāpā e tau pomu.”​—Nataliia mai i Kharkiv, Ukraine.

 “Ato hoko e magaaho fakahiku, talitonu a mautolu to nakai fai felakutaki. Logona e au e pā foutu mai he falu matakavi he taone ti gatata e tau hio. Fifili au ke fano he uta ni e tau mena kua lata mooli. Toka e au e kaina he matahola 8 he pogipogi ti heke he tuleni ki Lviv mo e fano he pasi ki Poland.”​—Nadija mai i Kharkiv, Ukraine.

He vala tala nei

•  Ko e heigoa ne fakatupu mooli e matematekelea nei he tau tagata ne fehola?

•  Ono ki fe e tau tagata ne fehola ma e amaamanakiaga?

•  Maeke nakai e Tohi Tapu ke lagomatai e tau tagata ne fehola mogonei?

 Ko e heigoa ne fakatupu mooli e matematekelea nei he tau tagata ne fehola?

 Ko e matematekelea he fehola i Ukraine ne kamata ha ko e fofō fakakautau e Rusia. Ka e hokulo atu e mena ne fakakite he Tohi Tapu hagaao ke he tau mena ne fakatupu e tau matematekelea oti nei he fehola:

•   Tau fakatufono he tagata he lalolagi katoa ne kaumahala ke leveki e tau tagata. Ko lautolu ne pule kua fakaaoga e pule fakatufono ke he puhala fakamatematekelea.​—Fakamatalaaga 4:1; 8:9.

•   Satani ko e Tiapolo, ko e “iki he lalolagi nei,” ne omoomoi e fakaohoohoaga kelea muitui ke he tau tagata ati pehē e Tohi Tapu: “Ko e lalolagi oti ha he pule hana kua mahani kelea.”​—Ioane 14:30; 1 Ioane 5:19.

•   Lafi ke he tau lekua ne fitā he fakamamahi e tau tagata ke he loga e senetenari, kua nonofo a tautolu mogonei he magahala ne talahau tuai he Tohi Tapu: “Ko e tau aho fakamui to hohoko mai ai e tau aho uka.” (2 Timoteo 3:1) Mua atu, ko e tau aho nei to fakamailoga he tau felakutaki, tau matematekelea tupu pauaki, kū e tau mena kai, mo e tau gagao​—ko e tau mena tutupu ne omoomoi e tau tagata ke fehola.​—Luka 21:10, 11.

 Ono ki fe e tau tagata ne fehola ma e amaamanakiaga?

 Fakakite he Tohi Tapu ko e ha tautolu a Tufuga ko Iehova, b ko e Atua ne fakaalofa mo e fakaalofa hofihofi noa ke he tau tagata ne fehola mo lautolu ne toka e tau kaina. (Teutaronome 10:18) Mavehe e ia to fakamafola e ia e tau lekua he tau tagata ne fehola puhala he fakatufono haana he lagi ne fakahigoa ko e Kautu he Atua ka hukui e tau fakatufono he tagata. (Tanielu 2:44; Mataio 6:10) To fakaaoga e Iehova e Kautu haana ke utakehe aki a Satani ko e Tiapolo. (Roma 16:20) Ko e Kautu ia ko e fakatufono ma e lalolagi katoa, to utakehe e tau veheveheaga he tau katofia he tau motu. To eke e tau tagata oti kana mo magafaoa kaufakalataha he lalolagi katoa. To nakai liu ha tagata ke fehola mai he tau kaina ha lautolu, ha kua mavehe mai e Tohi Tapu: “To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai; ha kua vagahau mai ai pihia e fofoga a Iehova Sapaota.”​—Mika 4:4.

 Ko e Kautu he Atua ni ka foaki e tuluiaga tukulagi ke he tau matematekelea he fehola nukua lauia a tautolu mogonei. To fakaaoga e Iehova e Kautu haana ke utakehe e tau lekua ne fakaohooho e tau tagata ke fehola. Manamanatu ke he falu tuaga:

•   Felakutaki. “Kua fakahiku e [Iehova] e tau ato hoko ke he fakatulakiaga.” (Salamo 46:9) Ke iloa e puhala ka utakehe he Atua e tau fetotokoaki, totou e vala tala “Peace on Earth​—How Will It Come?”

•   Fakamamahi mo e favale. “To laveaki e [Iehova] a lautolu mai he favale mo e mahani kelea.” (Salamo 72:14) Ke maama e puhala ka hiki e tau fatuakiloto kelea he tau tagata, totou e tau fufuta he tau vala tala ne mataulu “Breaking the Cycle of Hatred.”

•   Mativa. “Ko e mena laveaki e [Iehova] a ia ne nofogati he hana kalaga mai.” (Salamo 72:12) Ke kitia e puhala ka utakehe he Atua e vaka he mativa, totou e vala tala “Is a Fair Economic System Possible?”

•   Kū e tau mena kai. “To ha i ai e puke aloalolima he tau saito ke he motu.” (Salamo 72:16) Ke iloa e puhala ka eketaha e Atua ke nakai fai tagata ka hoge, totou e vala tala “A World Without Hunger?”

 Maeke nakai e Tohi Tapu ke lagomatai e tau tagata ne fehola mogonei?

 Ē. He nakai ni foaki ke he tau tagata ne fehola e amaamanakiaga mooli, lagomatai foki he Tohi Tapu a lautolu ke fehagai mo e tau paleko mogonei.

 Matapatu fakaakoaga he Tohi Tapu: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e [mafola] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu.”​—Filipi 4:6, 7.

 Kakano: Ole ke he Atua ma e mafola he manamanatuaga mo e loto ke he ha tuaga ne fehagai mo koe. Kikite e vala tala he “Filipi 4:6, 7​—‘Do Not Be Anxious About Anything.’”